1 Oheredao uzeuze, Badiꞌa ḡahunohauꞌeteꞌe neḡa zuhiꞌaḡa boro boroꞌa, vaze boro boro, ebu Mose goro ḡoeꞌa ihozeꞌeteꞌe azaḡa, kanisoro azaḡa niduꞌa teite ḡoꞌaniro. Ebu Iesu utadu, tutune onamiro. Roma gavana*, Iudea habaꞌa ḡianeꞌeteꞌe vazeḡa, niḡa Pirato, ani evora riꞌiniro. 2 Piratoꞌa ḡadiniro. 'Ḡaꞌe Iuda azaḡa zuhiꞌaḡahehe?' Iesuꞌa naenaeninaꞌa, 'Ḡaeꞌa eꞌe raꞌeteꞌe.' 3 Badiꞌa ḡahunohauꞌeteꞌe neḡa zuhiꞌaḡa boro boroꞌa ḡoere aduga aduga ḡehaḡa ani rana ḡoeriro. 4 Piratoꞌa hena bare ḡadiniro. 'Ḡa mene naenaeziꞌehehe? Ḡianoꞌi, ḡoere aduga aduga ḡehaḡa ḡae rana ḡoereꞌeteꞌe!' 5 Rehano Iesu ani mene bare ḡoeriro. Eꞌebone Pirato ani doudiro.

6 Pasika muiḡa madaḡano iḡaiḡa, Iudea azaḡaniꞌa umidiroteꞌe idunaḡano, ḡutaudoteꞌe vazeḡa ꞌahoga tuḡune bunido. 7 Eꞌe madaḡano ḡuꞌa neḡano ḡutaroteꞌe azaḡa teite vaze ꞌahoga niḡa Barabasiꞌa radiudo. Aniꞌe utitiroteꞌe zamaḡano vaze ꞌahoga maroteꞌe vazeḡa. 8 Vaze ḡuḡuvaḡaniꞌa Pirato vaḡe onairoteꞌea, uminiro, aneꞌa iḡaiḡa haḡaidoteꞌe haḡaiḡa haḡaoga. 9 Piratoꞌa ḡadiziro, raenaꞌa, 'Zaꞌe zae veize Iuda azaḡa zuhiꞌaḡa ꞌomo tuḡune bunoga urateꞌehehe?' 10 Mazaḡa Pirato ani edeḡa, Badiꞌa ḡahunohauꞌeteꞌe neḡa zuhiꞌaḡa boro boroꞌa ane evora Iesu riꞌinirotaꞌaꞌe, zeḡeꞌa ahiahiniro ꞌahine. 11 Rehano Badiꞌa ḡahunohauꞌeteꞌe neḡa zuhiꞌaḡa boro boroꞌa Barabasi tuḡune bunoga rae, vaze ḡuḡuvaḡa ḡunuḡano inare ḡoeriro. 12 Ebu Piratoꞌa hena bare ḡadiziro. 'Tena, zaeꞌa Iuda azaḡa zuhiꞌaḡa rae huneꞌetaꞌaꞌe nougiꞌuma?' 13 Ze naenaeni hounaꞌiro, raenaꞌa, 'Satauronoꞌi!' 14 Piratoꞌa hena ḡadiziro. 'Nouga ꞌahi? Ani nagini haḡai sauꞌa haḡairo?' Rehano ze bare bare hounaꞌenaꞌa, 'Satauronoꞌi!' reiro. 15 Eꞌanoꞌo Pirato ani, vaze ḡuḡuvaḡa zamaꞌa ehoroga rae, Barabasi tuḡune buniro. Ebu Iesu ani, Pirato ḡoere idunaḡano masinadu, satauronoga veize tuḡuniro.

16 Uti azaḡaniꞌa Iesu gavana ne zamaḡa tutune onamiro. Ebu zeꞌa nabudize niduꞌa huze nuꞌoziro. 17 Ebu dabua kanaḡa vidoharo. Vadiganoꞌe ire renoga mae ḡuadu, ovoe redoharo, zuhiꞌa rouga raduni. 18 Ebu ꞌevore ḡihineꞌenaꞌa, ꞌahige reiro. 'Iuda azaḡa zuhiꞌaḡa o! Mada manoḡa!' 19 Gubu hina vadigano bouniro, ebu soꞌabide vaniro, ebu obena hina tuḡadu, soꞌone kuraro. Zeḡe niduꞌa tibutibe ꞌouge haḡairo. 20 Ebu ḡirihohau hauḡirotene, dabua kanaḡa fuhiꞌohanadu, ane dabua hina bare vidoharo. Ebu satauronoga rae, tutune buniro.

21 Kurune ne vazeḡa, niḡa Simonaꞌa guniꞌa neḡanonoꞌo onairo. Aniꞌe Alesana ebu Rufo moze. Ebu uti azaḡaniꞌa tuḡutuḡuniro, Iesu satauro odohoga veize. 22 Ebu Iesu tutune onamiro, habaniḡa Gologota. Eꞌe ḡoeꞌa huganiꞌe 'Vadini isiga habaꞌa'. 23 Murava niḡa muro*, eꞌe teite tibune beꞌuniroteꞌe |ivaini|r vuḡa Iesu haro, ane ahiriꞌa mene ufeta giginoga veize. Rehano mene gagiro. 24 Ebu Iesu satauroniro. Iesu dabua niduꞌaꞌe hadi arahohanadu, iniuꞌa meꞌuma radu, ḡahugotitiro. 25 Ani satauronirotaꞌaꞌe, oherebau mone mada fuꞌo ḡazaḡa (9am) zamaḡano. 26 Nagini uꞌano satauroniroteꞌe ḡoeꞌaꞌe ꞌahige tiro. 'IUDA AZAḠA ZUHIꞌAḠA' 27 Ḡonore azaḡa aheu ane teite idaḡa satauroziro, ꞌahoga ane edaꞌe moneo, ebu ꞌahoga ane kauri moneo. 28 Aꞌe buka zaḡoḡa zamaḡano tiroteꞌe ḡoeꞌaniꞌa fureraro. ꞌAhige reiro. 'Aniꞌe haḡae tauḡi tauḡeꞌeteꞌe azaḡa teite tibune meꞌodiro.'

29 Uhiḡano vitau onamiroteꞌe azaḡaniꞌa, vadinize miruneꞌenaꞌa, roniro. ꞌAhige reiro. 'Uuu! Ḡa Kuru Neḡa Zaḡoḡa fahadu, mada uḡidu zamaḡano ohoniꞌuma reiroteꞌe vazeḡa! 30 Satauroonoꞌo buanadu, ḡaeꞌa ḡae bare ḡaboꞌoꞌi!' 31 Badiꞌa ḡahunohauꞌeteꞌe neḡa zuhiꞌaḡa boro boroꞌa, Mose goro ḡoeꞌa ihozeꞌeteꞌe azaḡa teite Iesu ḡirihohauꞌenaꞌa, ḡoretitiro. ꞌAhige reiro. 'Ani vaze ḡabozido. Rehano aniꞌa ane bare mene ḡaboneꞌohe. 32 Keriso, Isaraela azaḡa zuhiꞌaḡa, satauroonoꞌo buanoꞌi, emeḡeꞌa ḡiaꞌadu, ḡae mazao fioga veize.' Ane teite idaḡa satauroziroteꞌe azaḡa zuni ḡoere sauꞌa hina roniro.

33 Madai madaḡa (12am) reirotene, haba niduꞌa uzaboraro, onamo ḡorava madaḡa uḡidu (3pm) meiro. 34 Ḡorava madaḡa uḡidu (3pm) meirotene, Iesuꞌa ḡihau huaro. 'Eloi, Eloi, lama sabatani?' Ḡoere eꞌe huganiꞌe, 'Eḡe Badiꞌa, eḡe Badiꞌa, ḡa nougadu ḡiahe modeha?' 35 Satauro uhiḡano edaroteꞌe azaḡa nu, eꞌe igirotene, ꞌahige reiro. 'Ḡianoꞌi! Ani Elia huneꞌohe.' 36 Vaze ꞌahoganiꞌa dure onaadu, vari maḡa fuꞌureꞌeteꞌe heuḡa ꞌuruḡa, |ivaini|r vuḡa ḡiḡiꞌa zamaḡano taradu, gubu somoḡano autiro. Ebu Iesu ḡohani haro, gagoga veize. Ebu ꞌahige reiro. 'Guhianoꞌi, nugo ḡianihi, Eliaꞌa ovaadu, mae buniꞌuma ga mene.' 37 Iesu ani ḡihau huaro. Ebu iriga reꞌadu, rudaro. 38 Ebu eꞌe zamaḡano, Kuru Neḡa Zaḡoḡa ꞌueꞌeteꞌe dabuaḡa hitanaonoꞌo zigau ꞌaꞌadu ovoiro, ebu aheu reiro. 39 Uti vazeḡa boro ꞌahoganiꞌa, Iesu satauro zamao edanadu, ḡiane radiro. Aniꞌa Iesuꞌa ꞌouge rudaroteꞌe horonirotene, ꞌahige reiro. 'Hubehune vaze ꞌadiꞌe Badiꞌa Ubuga.'

40 Roḡae nu zuni monoꞌo edanadu, ḡianiro. Zeḡe boꞌaḡanoꞌe, Maria, ani Magadala neḡa roḡaeḡa; zuni Maria, ani Iakobo zuhuꞌa zu Iosefa viꞌze; ebu roḡae ꞌahoga, niḡa Salome. 41 Zeꞌe, Iesuꞌa Galilea habaꞌano radiroteꞌe madaḡano, ane teite onamiro, ebu tuḡureḡa egoharoteꞌe roḡaeḡa. Ebu Iesu teite Ierusalema neḡa eriroteꞌe roḡaeḡa ḡehaḡa zuni eꞌea.

42 Ḡoravararo. Aꞌe Bana Madaḡa izema mougano, ogomu haḡae tiꞌeteꞌe madaḡano, 43 Iosefa, Arimatea ne vazeḡa, Iudea kanisoro vaze boro ꞌahoga, ani zuni Badiꞌaꞌa ibitohaꞌuma madaḡa guhiniroteꞌe vazeḡa. Ani Pirato vaḡe onamoga mene riharo. Ani onamadu, Iesu ahiri umidiro. 44 Pirato ani, Iesuꞌa hube rudana ga mene rae zamariro. Uti vazeḡa boro ꞌahoga hunadu, Iesuꞌa hube rudana ga mene rae ḡadiniro. 45 Ani mazaonoꞌo Iesuꞌa rudaroteꞌe igirotene, Iosefa tuḡuniro, Iesu ahiri mouga veize. 46 Iosefa ani, dabua ꞌuruḡa manoḡa hoitiro. Iesu satauroonoꞌo mae bunadu, dabua hina ꞌumiro. Ebu hadi iduḡa zamaḡano tiro. Eꞌe iduḡaꞌe vatava huꞌiroteꞌe iduḡa. Ebu hadi boro hina idu ibihetaḡa kiune ꞌuiro. 47 Maria, Magadala ne roḡaeḡa, zuni Maria, Iosefa viꞌa, anianine Iesu tiroteꞌe habaꞌa ḡiane radiro.