1 Bana Madaḡa madaḡa hauḡirotene, Maria, ani Magadala neḡa roḡaeḡa, zu Maria, ani Iakobo viꞌa, ebu roḡae ꞌahoga, niḡa Salome, zeḡe uḡiduni murava hohoḡa manoḡa hoitiro, Iesu ahiri zauhohanoga veize. 2 Fura madaḡano, irarirotene, zeꞌe idu habaꞌa onamiro. 3 Zeḡe daꞌo neneḡaniro, raenaꞌa, 'Iniuꞌa idu ꞌuoga hadiḡa ꞌomo kiune vaḡinofiꞌuma?' 4 Ebuni zeꞌa dude iḡunirotene, hadiꞌe avoꞌao kiune touga horoniro. Hadiḡaꞌe boro bagaḡa. 5 Zeḡe huga idu habaꞌa zamaḡa diuḡirotene, ene maraḡaḡa ꞌahoganiꞌa, edaꞌe moneo ehoriroteꞌe horoniro. Dabuaḡaniꞌe ꞌuruḡa bagaḡa zuni faḡa bagaḡa. Roḡae uḡidu ai vineze deꞌoriro. 6 Rehano aniꞌa ziro, raenaꞌa, 'Ago rihanoꞌi! Zaꞌe Iesu, Nazareta neḡa vazeḡa, satauroniroteꞌe vazeḡa vaḡeꞌohe. Ani ai ḡabode iḡuneha. Ani ꞌadao oꞌoꞌa. Ane ahiꞌa tiroteꞌe iḡuꞌa ḡianoꞌi! 7 Ai onamoꞌi! Iesu tahiꞌa tahiꞌa ebu Petero zoꞌi! ꞌAhige rae zoꞌi, “Iesuꞌa ibite Galilea onamiꞌuma. Eꞌeabuꞌu, aniꞌa ziroteꞌe idunaḡano, ane teite hidiꞌuma.” ' 8 Ebuni zeḡe huga idu habaꞌanonoꞌo ferau buaro, mazaḡa ahirize rereraro, ebu vineze zuni deꞌoriro. Ebuni ḡoere ꞌahogani zuni vaze ꞌahoga mene ziro, mazaḡa riharo ꞌahi.

9 Fura madaḡano, oherebau uzeuze, Iesu ani ḡabode iḡuniro, ebuni Maria, Magadala ne roḡaeḡa, ani mazao ibite fureraro. Aniꞌe vine sauꞌa fuꞌo tu aheu fare (7) ane mazaonoꞌo hegoze buziroteꞌe roḡaeḡa. 10 Ani onamadu, Iesu teite radiudoteꞌe azaḡa, zeḡe zamaze areꞌenaꞌa, niaroteꞌe zizugano ziro. 11 Zeꞌe, Iesu ai runeonoꞌo bare gabode iḡuniroteꞌe, zuni Mariaꞌa ani horoniroteꞌe hariḡa igiro. Rehano ani ḡoere mene mae ḡihiniro.

12 Vesuꞌu ani anine Ierusalema ne guniꞌaḡa onamirotene, Iesuꞌa zeḡe zamao fureraro, rehano iraḡaꞌe nufiro. 13 Ani anine baradu, nabudize ziro, rehano zeḡe ḡoere mene mae ḡihiniro.

14 Hena mada ꞌahogano, Iesu tahiꞌa gaubanana tiba fare (11) zeꞌa ogaudoteꞌe zamaḡano, Iesuꞌa zeḡe mazao fureraro. Ebuni taꞌiro zini ḡoreziro, vaze ḡoere rae modeꞌeteꞌe uꞌano, zuni zeḡeꞌa fefeneꞌeteꞌe uꞌano. Mazaḡa aniꞌa ḡabode iḡuniroteꞌea horoniroteꞌe azaḡa ḡoereꞌe mene mae ḡihiniro. 15 Aniꞌa ziro, raenaꞌa, 'Haba niduꞌa onamoꞌi! Hari manoḡa, vaze niduꞌa mazao haramoꞌi! 16 Haramo mae ḡihiniꞌuma zuni bapatizoniꞌuma vazeḡaniꞌe, Badiꞌaꞌa ḡaboniꞌuma. U mene mae ḡihiniꞌuma vazeḡaniꞌe, Badiꞌa kota boro madaḡano, ibiḡaniꞌa turaꞌuma. 17 Haramo mae ḡihiniꞌuma azaḡaniꞌe haḡai nu badeḡa ꞌadi haḡaiꞌuma: vine sauꞌa eḡe niḡano hegoze buziꞌuma, ago izigano ḡoeriꞌuma, 18 mohe sauꞌa mae ḡihiniꞌuma, rune muravaḡa gagiꞌuma, rehano mene sausauziꞌuma, ꞌevoreze ugi azaḡa ragano tiꞌuma, ebu manoriꞌuma.'

19 Zuhiꞌa Iesuꞌa ḡoreze hauḡirotene, Badiꞌaꞌa ani adure ḡoha, mae ḡihine itiro. Ebu Badiꞌa edaꞌe moneo ehoriro. 20 Ze ai onamadu, haba niduꞌa zamaḡano haramiro. Zuhiꞌa Boro zuni zeḡe teite gaue tiburaudo, ebuni gigiꞌa inaraḡa haḡaeꞌeteꞌe haḡaiḡa hina zeḡe ḡoere idaneete.