Muⱪeddes Kalam (yǝngi yeziⱪ) Korintliⱪlarƣa «1» 6

Bir-biri bilǝn dǝwalixixⱪa bolamdu?

1 Silǝrning aranglarda ɵzara arazliⱪ ix bolsa, uni muⱪǝddǝs bǝndilǝrning bir tǝrǝp ⱪilixiƣa tapxurmay, ⱨǝⱪⱪaniysizlarning aldida dǝwalixixⱪa petinalamsilǝr?□ 2 Muⱪǝddǝs bǝndilǝrning dunyani soraⱪ ⱪilidiƣanliⱪini bilmǝmsilǝr? Əgǝr dunyani silǝr soraⱪ ⱪilidiƣan ix bolsa, ǝmdi ziƣirqilik ixlarni ⱨǝl ⱪilixⱪa yarimamsilǝr?■ 3 Pǝrixtilǝr üstidinmu ⱨɵküm qiⱪiridiƣanliⱪimizni bilmǝmsilǝr? Xundaⱪ bolƣanikǝn, bu ⱨayattiki ixlarni ⱨǝl ⱪilix ⱪanqilik ix idi?□ 4 Silǝrdǝ muxu ⱨayattiki ixlar üstidin ⱨɵküm ⱪilix zɵrür tepilƣanda, jamaǝt arisida tɵwǝn dǝp ⱪaralƣanlarni uni ⱨǝl ⱪilixⱪa salmamsilǝr?□ 5 Muxularni silǝrni hijalǝtkǝ ⱪaldurux üqün dǝwatimǝn. Əjǝba, aranglarda ɵz ⱪerindaxliri otturisida ⱨɵküm qiⱪarƣudǝk dana kixi yoⱪmu, ⱨǝtta birimu yoⱪmu? 6 Uning ornida, ⱪerindax bilǝn ⱪerindax dǝwalixiwatidu, — wǝ kapirlar aldida xundaⱪ ⱪilidu! 7 Əmǝliyǝttǝ ɵz aranglarda dǝwalarning bolƣanliⱪining ɵzi silǝrgǝ nisbǝtǝn bir ǝyibtur. Nemixⱪa uwalqiliⱪⱪa qidimaysilǝr? Nemixⱪa naⱨǝⱪqilikkǝ yol ⱪoymaysilǝr?■ 8 Əksiqǝ, silǝr naⱨǝⱪqilik ⱪiliwatisilǝr, hiyanǝt ⱪiliwatisilǝr, yǝnǝ kelip ⱪerindaxliringlarƣa xundaⱪ ⱪilisilǝr!

9 Ⱨǝⱪⱪaniysizlarning Hudaning padixaⱨliⱪiƣa warisliⱪ ⱪilalmaydiƣanliⱪini bilmǝmsilǝr? Aldinip kǝtmǝnglar! Buzuⱪqiliⱪ ⱪilƣuqilar, butpǝrǝslǝr, zina ⱪilƣuqilar, bǝqqiwazlar, baxⱪa ǝrlǝr bilǝn buzuⱪluⱪ ⱪilƣuqilar, ■ 10 oƣrilar, nǝpsaniyǝtqilǝr, ⱨaraⱪkǝxlǝr, tɵⱨmǝthorlar yaki aldamqi-kazzaplar Hudaning padixaⱨliⱪiƣa warisliⱪ ⱪilalmaydu; 11 bǝzinglar dǝrwǝⱪǝ xundaⱪ bolƣansilǝr; ǝmma silǝr Rǝb Əysa Mǝsiⱨning namida wǝ Hudayimizning Roⱨi bilǝn yuyuldunglar, pak-muⱪǝddǝs ⱪilindinglar, ⱨǝⱪⱪaniy ⱪilindinglar.■

Teninglar Hudaning ibadǝthanisidur

12 «Ⱨǝmmǝ nǝrsǝ manga ⱨalaldur», ǝmma ⱨǝmmǝ nǝrsǝ paydiliⱪ boluwǝrmǝydu; «ⱨǝmmǝ nǝrsǝ manga ⱨalaldur», ǝmma mǝn ⱨeqⱪandaⱪ nǝrsining humariƣa ⱪul bolmaymǝn. □ ■ 13 «Yemǝkliklǝr axⱪazan üqün, axⱪazan bolsa yemǝkliklǝr üqündur»; ǝmma Huda u wǝ bu ⱨǝr ikkisini yoⱪⱪa qiⱪiridu; tǝn bolsa buzuⱪqiliⱪ üqün ǝmǝs, bǝlki Rǝb üqündur; Rǝb tǝn üqündur. □ 14 Huda Rǝbni tirildürdi, xuningdǝk biznimu Ɵz ⱪudriti bilǝn ɵlümdin tirildüridu. ■ 15 Teninglarning Mǝsiⱨning ǝzaliri ikǝnlikini bilmǝmsilǝr? Undaⱪta, Mǝsiⱨning ǝzalirini elip, paⱨixǝ ayalning ǝzaliri ⱪilsam bolamdu? Ⱨǝrgiz bolmaydu! 16 Kim paⱨixǝ ayal bilǝn baƣlanƣan bolsa uning bilǝn bir tǝn bolidu, dǝp bilmǝmsilǝr? Qünki «ǝr-ayal ikkisi bir tǝn bolidu» — deyilgǝnidi. □ ■ 17 Əmma Rǝbgǝ baƣlanƣuqi bolsa Uning bilǝn bir roⱨtur. ■ 18 Buzuⱪluⱪtin ⱪeqinglar. «Insanlarning ⱨǝrbir sadir ⱪilƣan gunaⱨi ɵz tenining sirtida bolidu!» — ǝmma buzuⱪluⱪ sadir ⱪilƣuqi ɵz tenigǝ ⱪarxi gunaⱨ ⱪilidu. □ 19 Silǝrning teninglar silǝrni turalƣu ⱪilƣan, Huda tǝripidin silǝrgǝ iltipat ⱪilinƣan Muⱪǝddǝs Roⱨning ibadǝthanisi, silǝr ɵzünglarni ɵzümningki ǝmǝs dǝp bilmǝmsilǝr? □ ■ 20 Qünki silǝr qong bǝdǝl bilǝn setiwelinƣansilǝr; xunga teninglarda Hudani uluƣlanglar.■

□6:1 «Silǝrning aranglarda ɵzara arazliⱪ ix bolsa, uni muⱪǝddǝs bǝndilǝrning bir tǝrǝp ⱪilixiƣa tapxurmay, ⱨǝⱪⱪaniysizlarning aldida dǝwalixixⱪa petinalamsilǝr?» — «petinalamsilǝr?» — Hudaning bu ixlarƣa ⱪaratⱪan ƣǝzipigǝ yüzlinixkǝ petinalamsilǝr?, demǝk.

■6:2 Mat. 19:28; Luⱪa 22:30.

□6:3 «muⱪǝddǝs bǝndilirining dunya üstidin soraⱪ ⱪilixi ... (2-ayǝt) ... Pǝrixtilǝr üstidinmu ⱨɵküm qiⱪirixi» — bu ixlar toƣruluⱪ «ⱪoxumqǝ sɵz»imizni kɵrüng.

□6:4 «jamaǝt arisida tɵwǝn dǝp ⱪaralƣanlarni uni ⱨǝl ⱪilixⱪa salmamsilǝr?» — baxⱪa birhil tǝrjimisi: «uni ⱨǝl ⱪilixⱪa jamaǝttǝ ⱨeq orni yoⱪlarni salamsilǝr?». Lekin 5-ayǝtnimu kɵrüng.

■6:7 Pǝnd. 20:22; Mat. 5:39; Rim. 12:17; 1Tes. 5:15; 1Pet. 3:9.

■6:9 Gal. 5:19; Əf. 5:5; Wǝⱨ. 22:15.

■6:11 Əf. 2:2; Kol. 3:7; Tit. 3:3; Ibr. 10:22.

□6:12 «ⱨǝmmǝ nǝrsǝ manga ⱨalaldur» — bu sɵz-ibarǝ bǝlkim Korintliⱪlar üqün Injildiki yemǝk-iqmǝklǝr toƣruluⱪ bolƣan tǝlimlǝrning bir ⱪisⱪartilmisi boluxi mumkin. Bu ⱨǝⱪiⱪǝtkǝ yeⱪin bolƣini bilǝn, Pawlus ⱨazir ularƣa yemǝk-iqmǝklǝr toƣruluⱪ baxⱪa tǝrǝplǝrdinmu oylax kerǝk, dǝp tǝlim bǝrmǝkqi.

■6:12 1Kor. 10:23.

□6:13 «Yemǝkliklǝr axⱪazan üqün, axⱪazan bolsa yemǝkliklǝr üqündur» — baxⱪiqǝ eytⱪanda: «yemǝkliklǝr ⱪorsaⱪni toydurux üqün, ⱪorsaⱪ bolsa yemǝkliklǝrni singdürüx üqün». Korintliⱪlardin bǝziliri bu gǝpni baxⱪa ixlarƣa tǝtbiⱪlap, «tenimizning ⱨǝrⱪandaⱪ eⱨtiyajliri yaki arzu-ⱨǝwǝslirini haliƣanqǝ ⱪanduruwǝrsǝk bolidu» dǝp oylaytti. Lekin, jinsiy ǝhlaⱪsizliⱪⱪa kǝlsǝk bu toƣra ǝmǝs, ǝlwǝttǝ. «Rǝb tǝn üqündur» — adǝmni ⱨǝyran ⱪilarliⱪ bu bayan toƣruluⱪ «ⱪoxumqǝ sɵz»imizni kɵrüng.

■6:14 Rim. 8:11; 2Kor. 4:14.

□6:16 «ǝr-ayal ikkisi bir tǝn bolidu» — bu Hudaning Adǝm’atimiz wǝ Ⱨawa’animiz toƣruluⱪ bolƣan sɵzi («Yar.» 2:24); bu sɵz ⱨǝrbir ǝr-ayalliⱪ munasiwǝttǝ ǝmǝlgǝ axurulidu.

■6:16 Yar. 2:24; Mat. 19:5; Mar. 10:8; Əf. 5:31.

■6:17 Əz. 36:26-28; 1Kor. 12:13; Yar. 2:24

□6:18 «Insanlarning ⱨǝrbir sadir ⱪilƣan gunaⱨi ɵz tenining sirtida bolidu!» — bǝzi alimlar, bu sɵzlǝrni Pawlusning ɵziningki, dǝp ⱪaraydu; ǝmma baxⱪa gunaⱨlirimiz (mǝsilǝn, nǝpsaniyǝtqilik, ⱨaraⱪkǝxlik)mu tenimizgǝ yaman tǝsir yǝtküzmǝmdu? Yǝtküzidu, ǝlwǝttǝ. Xunga bizningqǝ bu sɵzlǝrni Korintliⱪlarning ɵzliriningki hata kɵzⱪarixi dǝp oylaymiz; ular bu sɵzni buzuⱪluⱪ (wǝ baxⱪa «jismaniy» gunaⱨlarni) ⱪilixⱪa baⱨanǝ ⱪilatti. Pawlus uni ǝmdiliktǝ ularning hata kɵzⱪaraxlirini toƣrilimaⱪqi boluwatatti.

□6:19 «Huda tǝripidin silǝrgǝ iltipat ⱪilinƣan» — bizningqǝ «silǝrgǝ iltipat ⱪilinƣan» degǝnlik «Muⱪǝddǝs Roⱨ»ni kɵrsitidu. Xundaⱪmu mumkinqilik barki, u bu ayǝttiki «silǝrning teninglar» yaki «ibadǝthana»ni kɵrsitidu.

■6:19 1Kor. 3:16; 2Kor. 6:16; Əf. 2:21; Ibr. 3:6; 1Pet. 2:5.

■6:20 1Kor. 7:23; Gal. 3:13; Ibr. 9:12; 1Pet. 1:18.