Muⱪeddes Kalam (yǝngi yeziⱪ) Zǝkǝriya 7

Roza tutux toƣruluⱪ ⱪoyulƣan soal wǝ rǝddiyǝlik jawab

1 Darius padixaⱨning tɵtinqi yili toⱪⱪuzinqi ay, yǝni «Hislǝw»ning tɵtinqi küni, Pǝrwǝrdigarning sɵzi Zǝkǝriyaƣa kǝldi. 2 Xu qaƣda Bǝyt-Əl xǝⱨiridikilǝr Xerǝzǝr wǝ Rǝgǝm-Mǝlǝklǝrni Pǝrwǝrdigardin iltipat soraxⱪa ǝwǝtkǝnidi. 3 Bǝyt-Əldikilǝr: «Samawi ⱪoxunlarning Sǝrdari bolƣan Pǝrwǝrdigarning ɵyidiki kaⱨinlardin, xuningdǝk pǝyƣǝmbǝrlǝrdin: «Ⱨǝrbirimiz kɵp yillardin beri ⱪilƣinimizdǝk, bǝxinqi ayda ⱨǝrbirimiz yǝnila ɵzimizni baxⱪilardin ayrip, yiƣa-zarƣa olturuximiz kerǝkmu?» — dǝp soranglar» dǝp tapiliƣanidi.□

4 Pǝrwǝrdigarning sɵzi manga kelip mundaⱪ deyildi: —

5 «Zemindiki barliⱪ turuwatⱪan hǝlⱪⱪǝ ⱨǝm kaⱨinlarƣa sɵz ⱪilip mundaⱪ soriƣin: — «Silǝr muxu yǝtmix yildin beri bǝxinqi ay wǝ yǝttinqi aylarda roza tutup yiƣa-zar ⱪilƣininglarda, silǝr manga, ⱨǝⱪiⱪǝtǝn manga roza tuttunglarmu? □ 6 Yegininglar, iqkininglar, bu pǝⱪǝt ɵzünglar üqünla yǝp-iqkininglardin ibarǝt boldi ǝmǝsmu? □ 7 Bular Yerusalem wǝ uning ǝtrapidiki xǝⱨǝrliri aⱨalilik bolƣan, taza awatlaxⱪan qaƣlarda, jǝnubiy Yǝⱨuda wǝ tɵwǝn tüzlǝnglik aⱨalilik bolƣan qaƣlarda, Pǝrwǝrdigar burunⱪi pǝyƣǝmbǝrlǝr arⱪiliⱪ jakarliƣan sɵzlǝr ǝmǝsmu?

8 Pǝrwǝrdigarning sɵzi Zǝkǝriyaƣa kelip mundaⱪ deyildi: —

9 «Samawi ⱪoxunlarning Sǝrdari bolƣan Pǝrwǝrdigar mundaⱪ dǝydu: — «Ⱨǝⱪiⱪiy adalǝtni yürgüzünglar, bir-biringlarƣa meⱨir-muⱨǝbbǝt wǝ rǝⱨim-xǝpⱪǝt kɵrsitinglar, 10 tul hotun wǝ yetim-yesirlarni, yat adǝmlǝr wǝ namratlarni bozǝk ⱪilmanglar; ⱨeqkim ɵz ⱪerindixiƣa kɵnglidǝ yamanliⱪ oylimisun. ■ 11 Biraⱪ ata-bowiliringlar anglaxni rǝt ⱪilƣan, ular jaⱨilliⱪ bilǝn boynini tolƣap, anglimasⱪa ⱪulaⱪlirini eƣir ⱪilƣan; □ 12 ular Tǝwrat ⱪanunini wǝ samawi ⱪoxunlarning Sǝrdari bolƣan Pǝrwǝrdigarning Ɵz Roⱨi bilǝn burunⱪi pǝyƣǝmbǝrlǝr arⱪiliⱪ ǝwǝtkǝn sɵzlirini anglimasliⱪ üqün kɵnglini almastǝk ⱪattiⱪ ⱪilƣanidi; xunga samawi ⱪoxunlarning Sǝrdari bolƣan Pǝrwǝrdigardin intayin ⱪattiⱪ ƣǝzǝp qüxkǝn; 13 xundaⱪ boldiki, Mǝn ularni qaⱪirƣanda ular anglaxni rǝt ⱪilƣandǝk, ular qaⱪirƣanda Mǝnmu anglaxni rǝt ⱪildim» — dǝydu samawi ⱪoxunlarning Sǝrdari bolƣan Pǝrwǝrdigar, ■ 14 — «wǝ Mǝn ularni ular tonumaydiƣan barliⱪ ǝllǝr arisiƣa ⱪara ⱪuyun bilǝn tarⱪitiwǝttim; ularning ketixi bilǝn zemin wǝyran bolƣan, andin uningdin ɵtkǝnlǝrmu, ⱪaytⱪanlarmu bolƣan ǝmǝs; qünki ularning sǝwǝbidin illiⱪ zemin wǝyranǝ ⱪilinƣan».□

□7:3 «bǝxinqi ayda ⱨǝrbirimiz yǝnila ɵzimizni baxⱪilardin ayrip, yiƣa-zarƣa olturuximiz kerǝkmu?» — «bǝxinqi ay»diki roza tutux bolsa ǝslidiki ibadǝthanining wǝyran ⱪilinƣanliⱪiƣa ⱨǝsrǝt bildürüx üqün idi. Babil imperiyǝsining ⱪoxunliri ibadǝthanini bǝxinqi ayning 9-künidǝ wǝyran ⱪilƣanidi, andin hǝlⱪni 70 yil sürgün ⱪilip baxⱪurƣan. Muxu kixilǝr: «Ibadǝthana ⱨazir ⱪaytidin ⱪuruluwatⱪan bolƣaqⱪa, bu rozini tutuweriximiz kerǝkmu?» — dǝp oyliniwatⱪanidi.

□7:5 «Silǝr muxu yǝtmix yildin beri bǝxinqi ay wǝ yǝttinqi aylarda roza tutup yiƣa-zar ⱪilƣininglarda...» — «yǝttinqi ay»diki roza, waliy Gǝdǝliyaning ⱪaza ⱪilinƣanliⱪini ǝslǝx mǝⱪsitidǝ tutulƣan roza bolup, uning wapatiƣa ⱨǝsrǝt bildürüx üqün idi (Tǝwrat, «Yǝrǝmiya», 40-41-bablar). Bu Babil imperiyǝsi Pǝlǝstinni ixƣal ⱪilƣan mǝzgildiki ǝng ahirⱪi pajiǝlik wǝⱪǝ idi.

□7:6 «Yegininglar, iqkininglar, bu pǝⱪǝt ɵzünglar üqünla yǝp-iqkininglardin ibarǝt boldi ǝmǝsmu? » — demǝk, silǝrning roza tutuxunglar yǝp-iqixinglarƣa ohxax, pǝⱪǝt ɵzliringla üqündur. Roza tutuxning mǝⱪsiti Hudani izdǝx ǝmǝs, bǝlki «ɵz-ɵzigǝ iqini aƣritix»tin ibarǝt boluxi mumkin. Yǝnǝ bir imkaniyiti, bu ayǝttiki «yemǝk» wǝ «iqmǝk» bǝlkim ⱨeyt-bayramlarni kɵrsitidu. Huda ulardin: «muxu ⱨeyt-bayramlarni ɵzünglar üqün tǝbriklidinglarmu, yaki mǝn üqün tǝbriklidinglarmu?» — dǝp sorawatidu.

■7:10 Mis. 22:22

□7:11 «ular jaⱨilliⱪ bilǝn boynini tolƣap» — ibraniy tilida «ular mürisini jaⱨil ⱪilip...».

■7:13 Pǝnd. 1:28; Yǝx. 1:15; Yǝr. 11:11; 14:12

□7:14 «ularni... ⱪara ⱪuyun bilǝn tarⱪitiwǝttim» — yaki «ularni ... ⱪara ⱪuyun bilǝn tarⱪitiwetimǝn».