4
Kari Kaem nu bitarso wore ko amilmil den
(David ko wur)
1 O aninga Kaem ningo diram, ani nikate airik mu agiring ilupko!
Ani ikup memek ningi bagasam ewere te aga sangaru se aeman saparikko;
nika gemang aisu ale aga wosenga ikiko.
2 O kariimet, nina tom amaru te aninga
Kaem yawara nibiring tua ko munan mu bita talko ya?
Ale mel duap duap nunguning mena ko kuesan mu se, kaem kawel nunup patawuwasan mu nibiring tualko ya?
3 Nina ninguru ikialko:
Yawe kariimet ningo diram mu nunga balam noko mam;
se ani Yawe arusam mu nu ani agiring ikiso.
4 Nina nguanga se munan memek me beteralko;
ninga anira kuwim te taga aniral kutek mal ale nengemang motam ninguru ko ikialko.
5 Yawe tama bita tua mu diram la beteral,
ale nu la kote loaga se lagaralko.
6 Kariimet suen biya esesan,
“Awiri nanga sanguk se daiga bagara ningo ariginakko?” masan.
Se Yawe, nika gemang lila te ka ningo nuam anananga nangimik te bitarko.
7 Se tom na inang se waen iru sor magaruk mu
ani ninguru amilmilarikko.
8 O Yawe, ni la aga bitarsam, se ani terong bagasam.
Buta se ani mel bo ko me nguangasam;
ani taga anisam mu lila te ani kuesam.