5
Munan ningo diram ko Kaem
(David ko wur)
1 O Yawe, ni aninga aira ikiko;
de gurugu ale aga angamang niara ikiko!
2 Ni aga King se aga Kaem, aga aira iki ale aga sangaruko!
Ani nikate diram guranek betesam.
3 Yawe, ni turomola pempem aninga guranek ikisam;
aninga aira nikate betesam ale
koma ko angimik bita lagasam.
4 Ni Kaem, ni munan memek ko me amilmilasam;
kariimet memek alo mu ni kerak me bagamonko.
5 Nunumi patawura ko kariimet alo mu ni kema te me bagamonko;
mu awuk, kariimet memek betesan mu ni me nunga kuesam.
6 Den nunguning me bala ko kariimet mu ni nunga maguwusam;
ale nuguting gue ago mu se, kawel ko kariimet mu ni me ta nunga kuesam nunguningkiri.
7 Bare ani nika gemang lila biya mu te se, nika kuwim laili ningi am tairikko;
ani aimi karogo kapa se, angama ka temple laili mu tuek ale abugura kulukekko.
8 Yawe, aninga kager kari alo suen biya anisan;
buta se ni ka munan ningo diram mu te aga lage dingumur ale agarak namarko.
9 Den nuguring te arataso mu am kawel la;
nunga nongomang motam mu bo maguwura ko kiwem karogo terong mam.
Nunga nodogotak nuguring mu kuera ko mutim iwitata;
se nunga nungamili mu den kawel te balsan.
10 Buta se Kaem, ni koma memek nungaruko!
Nongota nunga ikia memek betesan umu nunga taliparuk se memek tamonko.
Nunga memek suen biya mu koma ko nunga karoko,
mu awuk, nuna ni kiring batagorman ko moke.
11 Bare kariimet nika kuesan ale ni nunga sangaruko kete taisan, mu ni nunga bitarsam,
se nuna amilmilamon ale amilmil te wur ilu se lagamonko.
12 Mu awuk, ni kariimet ningo diram mu marak nungarsam;
Yawe, ni nunga kuesam, ale nunga karem iwita nunga kaluwusam.