18
Kaem king David ko niara ikiam ale saongam wore ko amilmil den
(Yawe kager kari alo nuguting te se Saul kuting te ko ura kari David bataguru tam se David wur imi batogam)* 2 Samuel 2:1-51 arikko.
1 O Yawe, ani ninguru ka kuesam;
ni sokel ani aisisam.
2 Yawe mu aninga manga gek am, aninga bitua gek am, se aninga bataguru ta kari;
nu aninga Kaem, manga biya bo iwita,
se ani kararasam ale aga kager kari memek nunga ko te yumusam.
Nu aninga karem, se aninga sokel.
3 Aninga niara Kaem nup biya kote beterem,
se nu kager kari nuguting te aga bataguru tam.
4 Ani kuera mayang aga taliparam;
lom biya aga ira kaluwuram.
5 Kuera mateng ko mayang aga talipi saparam;
dagarok iwita aga iluwam.
6 Se ani angamang uririkira sipira mu ningi Yawe aurem,
aninga Kaem aga sangukko kote niarem,
se nu ko temple ningi baga se agiring
ikiam ale dogowa gurugam ale aga niara ikiam.
7 Noko gomang magara mu ali sisuwuram
se duruk bibiya yukuman.
8 Ale tama bur kuamuru gogong te aratukaso;
ale tama kuamili korang te buluk buluk makaso, ale melmasak kai kai namakaso.
9 Nu taiti gomang kaogam ale tai kaparam;
se taiti nuwi kaetam mu sowek bowa ningi anikaso.
10 Engel cherubim bo nu giam ale ilak bingam taiso iwita tairam;
ko ariga marir bo luman karogo iwita nu giam ale ilak tairatela tai kaparam.
11 Tuwik ko taiti nuwi kaetam mu ningi numi kaluwuram,
taiti nuwi ko tiromorom mu nu lautam.
12 Noko kumik nikim biya taiti nuwi ningi
nikim kapakaso, ale pure iwita biliwilik makaso,
ale tuwik muguri bibiya iwita kapakaso.
13 Yawe ko nup kuali biya mu duruk
wonong te baga se sokel karogo aikaso se pure iwita pagakaso.
14 Ale pure nikim mu gatu iwita bitakaso se kari memek nunga parusuwukaso.
15 O Yawe, ni iningirem se kamuru te daula aratam ale gagi kuring kauram se
saun manga wetang te aratam;
se ali ningi ali ko nukuri ilukuawuwaram mu wetang te aratam tala.
16 Yawe kualala baga se kuting garukam ale aga tagi patawuram;
gagi biya aga iram, bare nu aga tagiram se bausem.
17 Aninga kager kari mu gek am nunguningkiri,
se ani nunga kiarikko me terong;
bare nu nuguting te aninga bataguru tam.
18 Ani tom memek ningi kaperem se
kager kari taiman agarak kagerman,
bare nu aga saongam.
19 Nu aninga saongam ale kuwim ningo te aga beteram;
nu aninga kueram ale aga bataguru tam.
20 Ani munan laili karo tuem, se Yawe koma ningo aisam;
ani memek bo me beterem, se nu marak ningo aisam.
21 Ani noko munan diram la karem;
ani munan memek bo me beterem, ale abiring me gurugu tuem.
22 Ani pempem la noko munan mu angama sengem ko aniso,
se kuring me kulukurukasam.
23 Ani noko motam te angimik ikup bo mena;
ani aimi ko ninguru sinar tokasam, ale memek bo me bitakasam.
24 Se Yawe aninga munan laili arigam ale koma ningo aisam;
mu awuk, ani noko motam te diram la bagakasam.
25 O Kaem, awiriya ni ko ko kua kaposo,
mu ni ka kua kapara ko munan mu kote betesam;
se awiriya munan ningo beteso,
mu ni ka munan ningo kote betesam.
26 Awiriya munan diram la beteso, mu ni munan diram mu ilak betesam;
bare awiriya munan daeldel bita lagoso,
mu ni aguwaya nu bitarko mu nikate mu am mel gotektir.
27 Mu awuk, ni awiriya numi karogo kaposo, mu ni sangaru tasam;
bare ni awiriya numi patawuso, mu ni ilak kapasam.
28 Nigita, O Yawe, ani nikinang aisisam;
aga Kaem, ni aninga tiromorom bataguru sapasam ale nikim aisisam.
29 Ni te mu ani aga kager kari memek alo
am nunga menawurik nongorak pelerikko;
ni aga Kaem abiring ko bager, mu ani kager mu ko lauta am parusuwurikko.
30 Kaem ko munan mu ningo se diram;
nu mel bo bitirukko balso mu nu eng karo tuso;
se kariimet nu kararasan mu nu nononga karem bagoso.
31 Kaem bo awuk wore Yawe iwita bagoso? Mena.
Nu kota suanta Kaem se nanga Manga Gek am.
32 Kaem kota sokel aisiso ale aga bitarso.
33 Nu aninga asiwik sokel tuso,
se ani deer iwita duruk kuamuru te araga sanamasam.
34 Nu kager aga kasurso, ale agiting sokel tuso,
se ani daga wol aora biya mu tagisam.
35 O Yawe, kager ningi ni keta aninga saonga karem bagerem;
nika kiting sengam te agiting duap ningi aga iluwem;
ni kua kaperem ale nup biya aisem.
36 Ni aninga lage nungem ale ulaluwurem,
bore te se ani asiwik ponor te me gurikirem.
37 Ani aga kager kari nunga karem
nongorak namerem ale nunga iluwem;
ani ninguru nunga maguwurem ale nunga menawurem.
38 Ani nunga ita parusuwu asiwik duap ningi nunga beterem;
udagi barasamonko koma mena.
39 Ni kager ko sokel ani aisem;
ale aga kager kari arungu kapa adeleng duap ningi nunga awurem.
40 Ni uwuta beterem se ani nodogotak ali karogo irem ale nunga menawurem.
41 Nuna saonga ko niaman, bare kariimet bo nunga sangukko mena;
nuna Yawe kote niaman, bare nu nuguring me iluwam.
42 Ani ninguru nunga maguwurem se
kupkup marir gi karogo namoso iwita arataman;
ale lom gege iwita lage te nunga warem.
43 Ni aga kager kari memek alo nuguting te aga sangaru taem;
ale ani sor suen biya nunga supuling biya ko aga beterem.
Se kariimet ani me nunga ikia mu aitak ani abowa ningi bagasan.
44 Nuwi saki ko kariimet aninga aip biya ikisan,
ale nguangasan ale taisan nubugura kulukuru ani aisisan.
45 Nuna nguanga nguanga nunga yumura
kuwim aora mu bita bita aningate taisan.
46 Ikialko, Yawe pempem bagoso!
Nu aninga Manga Gek am, se aga Saonga;
nup biya pempem anirukko!
47 Nuguta nu Kaem, aninga luan taso,
ale sor saki nunga gi ani abowa tuguso,
48 ale kager kari nuguting te aga tagi batagarso.
Yawe, ni aga kager kari nongoma te nup biya ani aisem;
ni aninga sangem se aga kager kari me aga moman se kuerem.
49 Buta se ani sor saki ko kariimet nongoma te nika nip biyala patawurikko;
ale nika nip patawu se wur iluwekko.
50 Kaem ani king ko aga balu beteram se bagasam;
noko kua nangara kumik menara mena mu ani David se aga kuriang gue lilim la pempem nanga iramuram.