19
Kaem lage suen biya te ikia ningo nanga kasurso
(David ko wur)
1 Taiti gomang kualala aniso mu Kaem ko ningo nanga kasurso;
melmasak taiti gomang te mu Kaem ko kiwol wetang te saposo.
2 Kowarkalal suan suan mu mel imi suen la ko nanga kasuruwoso;
tirom suan suan karogotala ko nanga kasuruwoso.
3 Kowarkalal se tirom nungumik nuguring mena,
se mel imi ko balmon se me ikinakkowo.
4 Bare nunga nuguring ali lilim te geraga saparam;
nunga den mu sor suen la te geragam.
Taiti gomang te Kaem worem ko kawam bo kaolam.
5 Worem turomola basu arataso mu
kari bo imet iru tam ale ko amilmil te ko kawam beteso ale arataso iwita;
agi kari bo kolara nagura imi ko nagurokko numi nungurso burangoso iwita.
6 Worem taiti duap koma sang te duap beteso ale nama koma sang te kaposo;
mel bo ta noko kowar ko yumurokko yam me terong, mena.
7 Kaem ko munan den mu yam
dirkiriyam, se marak iru nangarso;
noko den balam mu ana te ira
sanamanakko, se awiriya ikia ko tukunangaso wore ikia tuso.
8 Kari Biya ko den mu munan ningo
nangarso, se awiriya karo tuso mu amilmiloso;
noko den gilalong mu yawarakala
nunguning se nikinang ningo nangarso.
9 Awiriya Yawe ko kua kaposo mu kilek ningo beteso,
se kilek umu pempem ani lagarukko;
den nu balso mu ningo la,
se diram nunguningkiri.
10 Kaem ko den mu mel ningo ningo suen biya nunga kia saparam,
ali imi ko mel duap duap mu yam nunga kia saparam nunguningkiri;
buta se den imi mu ana nangamang ninguru tunakko.
11 Yawe, nika den mu ani nika ura kari ikia ningo aisiso;
ani nika den karo tusam mu te ni aninga daiga bagara ningo aisisam.
12 Bare awiri kota ko memek suen la ko iki saposo? Mena.
Buta se ani munan memek sang beterem
wore me ko ikiem agi, angamili saparam agi mu, ni siwu aisuko.
13 Ale aga sangaru se memek ko iki se wore am ngual me bitirikko;
aga sangaru se munan memek mu me aga bituokko;
uwuta aga bitar mu ani ni kema te memek biya bo mena, ningo la bagarikko.
14 Aninga agiring te den, se aninga
angamang motam nunguning, mu ningo la ni kema te anirukko.
O Yawe, ni aninga Manga Gek am se aninga Sangaru Ta Kari.