2
Nzhaal gon be wdizh chul cheen yalnaban
1 Kwaanzee nkinra le be kwaan né wdizh chul kwaan mzaa xaa kwent lo be, napa chepga chepga kalaa beya. 2 Nel chelee wdizh kwaan nzhé re mandad cheen Dios lo Ches non, nu re xaa kwaan nambinta nu namleta mted xaa xaa bid, 3 telisa ded be bid chelee be naselazht be wdizh chul ne cheen yalnaban kwaan tira, kwaan nonra. Lee re be ne, wli nak wdizh chul ne, nel yilotlaka lee Xaa Nabeyy mzaa kwent cheena, nu noka re xaa mbina mzaa kwent cheena lo be. 4 Dios mlu wli nak re wdizh chul ne lo be, nel mle xaa zyen kwaan gro doo nu mzelazh xaa re kwaan lo be, nu kwaane mle Mbi Naban modxa nzhekla Dios.
Jesucrist ngok myet kwenta re be
5 Kwaanzee nanabeyyt re mandad cheen Dios yizhyo kub kwaan kazaa nu kwent. 6 Nel nzho tub pa lo Xkyech Dios nkee:
Nzak na nanont re myet yizhyo,
kwaanzee ndedyall na ne na xomod nselazh lu re myet nu nkanap lu xaa.
7 Naxchet mle nanont lu xaa lo re mandad cheen lu,
nixa sbaa mzaa lu yalnabeyy lo xaa,
nu mle non lu xaa;
8 nu mle lu zee nabeyy xaa lo rese kwaan. [Sal. 8:4-6]
Nu snee mle Dios zee nabeyy xaa lo rese kwaan, nu nik tub kwaan nanabeyyt lo xaa, per zer yun lee xaa nabeyy lo re rese kwaan. 9 Per nal ne be lee Jesús ngut kwent cheen re jwalt cheen re myet, nel nkela Dios re myet. Nu nixa naxchet mle nanont Dios Jesús lo re mandad cheen xaa nu mded xaa bid nu ngut xaa, lee nal ne be lee Dios mzaa yalnabeyy lo xaa zee gon rese xaa xtizh xaa.
10 Kwaanzee mle Dios Jesús tub xaa nali doo, nu lee xaa nak xaa mdexkwaa rese kwaan nu kwaan yalnabeyy cheen xaa rese kwaan nanluxt. Mle xaa Jesús tub xaa nali doo kwent cheen re bid kwaan mded xaa zee nzho mod wee Jesús zyen doo xaa, gak xaa xinn Dios, naz pa chul cheen Dios. 11 Nu tubka Xuz re be, xaa kwaan nle nzhul myet, nu re xaa ngok nzhul. Kwaanzee nantont Jesús nii xaa lo re be: “wech” nu “bzan”, 12 nel nzhé xaa lo Xkyech Dios:
Za na kwent cheen lu lo re wech nu lo re bzan,
nu gol na lo lu tubka kwaan re xaa ne. [Sal. 22:22]
13 Noka nkee lo Xkyech Dios:
Wii na lo Dios. [Is. 8:17]
Nu noka nzhé xaa stub welt:
Nee nzo na kwaan re xiin na,
xaa mzaa Dios lo na. [Is. 8:18]
14 Nu Jesús ngok myet mod re be, xaa nak xinn Dios, nu gorna ngut xaa mle xaa gan lo xaa nabeyy lo yalgut, xaa nak Maxuu, zee luux xaa xaa. 15 Nu snee msela xaa re xaa kwaan nabeyy yalgut lo, xaa kwaan rese mbizh kwaan mban, nzheb yet. 16 Kwaan wli nak: Lee xaa myaad zee nalet xaa yudar re mandad cheen Dios sinka le xaa yudar be, xaa nak dii cheen Abraham. 17 Nu kwaanzee nkin ngok xaa myet, lal kwaan be, kwenta re wech xaa nu re bzan xaa, zee nzho mod gak xaa lo Dios tub xaa nlesla ne re wech nu re bzan; nu sbaa ngok xaa ngwleyy non doo, xaa nali nak, xaa nseleyy myet, nu snee mle xaa gan chee xaa jwalt cheen re myet. 18 Nu mkiil Maxuu xaa leezha mded xaa bid, kwaanzee nal nzho mod le xaa yudar re myet leezha nkiil Maxuu be.