3
Nonra Jesús lo Ches
1 Kwaanzee wech nu bzan, xaa nambey nak, nel Dios mrezh re be zee nya be naz yiba, tubka nzhaal wii be lo Jesucrist, xaa mxaal Dios, nu xaa nak ngwleyy non doo cheen be. 2 Lee xaa ngok tub xaa nali lo Dios, mod ngok Ches, dubse leezha mkee xaa zhiin lo re xaa Dios. 3 Per nzhaalra wii xaa lo Jesús ke lo Ches, mod ngwiira xaa lo tub xaa nza yoo ke lo yoo. 4 Zyen doo xaa nzho mod za yoo, per Dios nak xaa ndexkwaa rese kwaan. 5 Kwaanzee Ches, xaa ngok xmos Dios, ngok xaa tub xaa nali lo re xaa Dios, nu lee xaa mlu cho kwaan zle Dios. 6 Per Jesucrist, nak mer Xgann Dios, nak xaa tub xaa nali lo re xaa Dios, xaa nak re be. Nu nak be xaa xaa, chelee be kwaan dub lextoo be, ngwii be lo kwaan nkambaz be axta kayaa beya, nu nyakla be zaa be kwent cheena.
Nalenedt be lextoo be zee kayaa be pa chul cheen Dios
7 Kwaanzee mod nzhé Mbi Naban lo Xkyech Dios:
Cheleeya nalzhe kayon gu kwaan né Dios,
8 nalenedt gu lextoo gu, mod mle re xey gu xaa yilo,
leezha mle xaa nayii na gorna nambint xaa xtizh na naz wen.
9 Namzeyalt re xey gu wii lo na naz wen,
nixa tub choo liin mle na kwaan gro lo xaa.
10 Kwaanzee mnayii na ne na re xaa zee,
nu nzhé na:
“Tubka mlened xaa lextoo xaa,
kwaanzee namzet xaa xnaz na”.
11 Kwaanzee lo yalnayii cheen na nii na,
wlipa na tira nyent mod zeeb xaa pa mdexkwaa na le xaa deskans. [Sal. 95:7-11]
12 Kwaanzee wech nu bzan kanap be be, napa lee lextoo tub be kayak nakap nu kayak neda lo re kwaan nak xcheen Dios, zeeka laa be Dios, xaa tubka mban. 13 Mas wen nalzhe le be gak nye lextoo re wechxinn be, napa lee tub be kayak ned lextoo lo yalnkade cheen re kwaan nawent. 14 Nel tubka nak be kwaan Jesucrist, chelee be tubka ngwii be lo xaa, modxa mzelo be nu sbaaka gak be axta mbizh gwluzhtlaka.
15 Nu kwaanzee, lo Xkyech Dios nkee:
Cheleeya nalzhe kayon gu kwaan né Dios,
nalenedt gu lextoo gu,
mod mle re xey gu xaa yilo,
leezha mle xaa zee nayii na. [Sal. 95:7-8]
16 ¿Xana re xaa mbin kwaan nzhé Dios nu namlet xaaya? Xaa ne nak rese xaa kwaan mloo Ches yizhyo Egipto. 17 ¿Nu cho lo xaa mnayii Dios tub choo liin? Mnayii Dios lo re xaa mle jwalt, nu leeka wen ngut xaa. 18 ¿Nu cho lo re xaa mcheroo Dios zee narept xaa pa nzho mod le xaa deskans? Namrept re xaa nambint xtizh Dios. 19 Kwaanzee klar doo naka, lee re xaa ne nyent mod ngzeeb pa nzhé Dios zaa Dios lo xaa, nel namwiit xaa lo Dios.