1 Ani layagola i̱ miniha mogo lalu taga haru. I̱na dugu bialu howa Ngode Datagaliwabehondo bi ogodagua laru. 2 Anduane Homogo í̠ tigabiore kegoni. Í̠na dara holene nawi ngagoria howa dara haabo haga ke. Iname biabe bialu kemaru tiga tigaore mo tale biaga ke.✡ Yob 2.9 3 Áyu i̱na í̠hondo hale halu i̱hondo bayale bibe laro. I̱na ko bialu harugonagabi mana ko damene i̱na ko biruda lo manda nabi howa bialu harugonagabi pani nangibe laro. I̱ mamaliru tigua mana ko bamba bialu henerunaga i̱hondo pani nangibe. 4 Heneneore tigua í̠naga bi mo wahalu í̠naga bi mana lo ngagohondo mine halu hene. Ani bialu heagola í̠na waitigime inanaga mbirale wimaru mo kayu yalu inane garabaya mini yu pialu ina aria maru bo wahai halu biya. Í̠na ina taliatagi halu dindi tara wiaruha purogo lelalu wali agali tara bu hearu ti dege dombeneha heledegoni. Anidagua birigola ainde tigua inahondo gi do lalu mege timbuni bialu kagoni. 5 Halu dewaoreni í̠na i̱ mamalirume ko biyaru tale bialu ko i̱na binirubi tale bialu harigoni. Iname í̠hondo mana bayale nabi harima. Iname í̠naga bi mo waharima. Anidagua bialu harimagome í̠na mana inahondo bialu hariruni tigabi bulene wiadagua biri.

6 Áyu í̠na i̱hondo bulene ngago biai habe. I̱naga holene áyu ogoni biba helalu i̱naga tingini dindiha daibilabe. Heneneore i̱ homolene karulapeda. Tigua i̱hondo bameore mege bialu karunagabi genda tara tara i̱hondo mo ngialu kagonagabi i̱naga bu miniha mo ko henego ko. Anduane Homogo í̠na bi dege lalu i̱ha genda ngaruni mo wahai habe. Bayale haabobo bu holene ngagoria i̱ holiya helabe. Ainde i̱naga bi larogo hale hole í̠naga hale pai nahabe, lalu Tobidihanda Ngode Datagaliwabehondo bi lene.✡ Dag 11.15, 1 Kin 19.4, Yob 7.15, Yna 4.3

7 Horo ogoningi Media dindiha Egebadana tano wiagoria biabe bia haga wali mbira berenegome Laguele wane Sara bereago mege bini. 8 Ai Sara ibu agali kahalu penego ainde agali uruni Sara heba horo mbiru hangubi mbira mandagi palia nabi heaore dege dama mbira mini Asamodeusu laga heagome agali uruni homelo mbira mbira bo wahaga bialu bo wahai hene. Anidagua bini bereagola wali biabe biaga berearume Sarahondo lalu, I̱na agali í̠ agalini biaruni bibahende homelo bo manogo bia haga biriya. Í̠ agali kariali uruni baba mandagi paliai harigo yu ainde mbirago ibugua í̠ yamu ko bere nalayiya. 9 Í̠na bame keba halu ina balu kego irane agibe. Í̠ agalini ti homeneyagua nde í̠nibi ti haruru talima polene nga. Iname í̠ waneigini lenego mbira dengui nahondoloma̱ya í̠ aniore bulene nga, lene. 10 Sara ibugua bi gendabi uruni hale howa ibunaga bu miniha genda timbuni halu ibuni pu nogo dalu homolene kaware manda bu berene. Anigo ainde ibunaga mini iriari bialu ibuni lo manda bialu lalu, I̱ aba wane nde mbiraore i̱ hangu birarugo i̱ pu nogo dalu homaruyagua nde i̱ aba agali waheore kagoha dara holene timbuniore mo anda ibilolebada. Anidagua berogola ibu abale homaliha warape holeberoda. Anidagua buledago ai wahalu i̱ni manogo bialu homa nabi waholiya, lo manda bini.

11 Sara ibu windo wiagoria kaware heyu howa ibugua Ngode Datagaliwabehondo bi lamialu lalu, I̱naga Anduane Homogo Ngode Datagaliwabe í̠naga mini yaraga holene hameledo. Iname horo bibahendengi í̠naga mini yaraga haabo halu holoma̱ya. Mbirale bibahende í̠na wabini ngarumebi karumebi í̠ninaga mini yaraga haabo halu holene nga. 12 I̱na í̠ de handaya howa í̠na i̱ biamogo bibelonaga maliaho bedogoni. 13 Í̠na bi hangu laregola i̱naga holene ogoni ereba holene nga. Anidagua biragola bi ko lalu karuni lone hale naholebero. 14 Anduane Homogo-o i̱na agali baba mana ko mbira nabiore bedogo í̠ manda bide. 15 Ina dindi ogoha garabaya íbu harimago howa i̱na halu mbira hangubi i̱naga mini mo nagalone halu mo ko naheorebi i̱ abanaga mini mo ko nahebi biraru. I̱ aba ibunaga paluni ngaru holene ibu waneigini mende nahebi inane dameneore mbira i̱ dabu bulenebi naheore. I̱ aba ibu wane mbiraore i̱ hanguore bedogoni. Agali i̱ agalini karia biaru homai haya. Ainde i̱bi homolene ngago agi bialu biruliyada. Anigo ainde Anduane Homogo i̱nime i̱naga holene hamarobi naloleyagua nde í̠na i̱ dara halu baya hangu handaya ho holene nga. Mege bialu bi ko lalu karuni lone hale holene hame naledo, lene.✡ Dag 27.8

16 Ai horo ogoningi Ngode Datagaliwabehanda dahuliya andaga howa Tobidi Saralanaga bi layago hale hene. 17 Ibugua ani layago hale howa Tobidinaga deni mbirale pele ira hagua aleme dambi heago mo wahole dahuliyali mbira mini Labaele ibilene. Ani bialu Labaele ibugua Tobidi igini Tobaiasa ibu Laguele wane Sara dabu bilonaga bi mo tiga bule ibalu bini. Tobaiasa ibu Sara damene hameigini mbiraore dege howa libu dabu bulene karulape hene. Ani hayagola nde Ngode Datagaliwabe ibugua dahuliyali Labaelehondo dama mini Asamodeusu Saraha karulo heago taliatagi helo ibilene. Ai ogoningi dege Tobidi ibu tagiraha howa andagaha ibiyagola Sara ibu nde Egebadana tanoni ibuni andaha hobane daligahayagi heagoha howa tagira ibalu hene.✡ Dag 36.6-9, Tob 6.10-12