1 Horo ogoningi dege Tobidinaga mini wálayagola ibunaga muni mbira bamba agali mbira mini Gabaele Media dindiha Lagese tano wiagoria heago minigo mitangi bini. Gabaele ibugua muni ogoni mo ngelowa handaya ho hene. 2 Tobidi ibugua mitangi bialu i̱na Ngode Datagaliwabehondo lamialu, I̱ homoliya yupe habe, larugoda. Ainde anidagua larugodago i̱ igini Tobaiasa olowa íbu lalu muni ogoninaga te lamuliya lo mitangi bini.

3-4 Ani mitangi buwa Tobidihanda Tobaiasa olalu íbu lowa ibuhondo lamialu lalu, I̱ igini-o i̱ homaroangi baya hangu hora holene ngadagua hora habe. I̱ ani homedoha í̠ ai̱yahondo mana bayale hangu bialu haabo habe. Í̠na ibu baya hangu handaya ho haabo halu ibu homaragola i̱naga homali kagoria kaware dege hora habe. Ibugua genda tandaga handalu biruwa í̠ taba henenegobi í̠ handaya ho berenegobi embeda nahabe. Í̠na ibunaga bu miniha turu ho biraabo helo berelalu ibu mo genda nahabe.✡ Har 20.12, Sir 3.16

5 I̱ igini-o í̠na horo bibahendengi Anduane Homogo í̠naga Ngode Datagaliwabe kago embeda nahe habe. Ani bialu mana ko nabiore habe. Ngode Datagaliwabenaga mana ngago pugua nabi habe. Í̠na mana bayale tigabi ngaru bialu haabo howa mana ko biaga karu baba mandagi nahabe. 6 Mbirale í̠na bialu kego damene bibahende bayale hai helo í̠ni tigabi holene ngadagua haabo habe. 7 Mbirale bayale í̠na yu kego aria maru tale bialu wali agali maru Ngode Datagaliwabenaga hariga ngagoria pialu haga karu talebu migi bialu habe. Wali agali maru karuhondo mbirale talebu mialu howa hame nale mibe. Wali agali yagibano karuhondo biamogo bialu miriyagua nde Ngode Datagaliwabehanda í̠nibi biamogo bulebira.✡ Man 15.7-8, Min 19.17, Sir 3.30–4.6, 1 Yo 3.17 8 Í̠nime mbirale agua wirudabe hondole dagalo manda ala buwa talebu mibe. Dewaore wiriyagua nde dewaore mibe. Emene wiriyagua nde harugo lowa hanuni talebu ki howa mende mibe.✡ Sir 35.12, 2 Ko 8.11-13 9 Í̠na ogonidagua biriyagua nde í̠naga mbirale mo do haradagua berego mani í̠ha genda tagira ibirangi ibugua í̠ biamogo bulebirago ani bibe. 10-11 Mbiralime yagibano karu biamogo bialu kago Ngode Datagaliwabehanda dahuliya andaga kagome mana ogoniore loma baya gibiore ogonida lowa ibu turu haga ka. Í̠ homeneru haga humbirini andaga arumahe ngagoha pialu mo ko naholenaga mana urunidagua bialu habe. 12 I̱ igini-o í̠na wali bedaru baba mana ko nabibe. Ina Ngode Datagaliwabenaga biabe bia haga kemago ai í̠na wali inane aria bedaru aria dege dabu bibe. Wali tara bedaru aria mbira dabu bulene nawiorego nadabu bibe. I̱ igini-o Noa mitangi bialu Abarahama Aisaga Yagababi mitangi bibe. Agali uruni ti ina mamali bamba hene. Tigua wali tini damene berearu dege dabu bigi bini. Ani biyagola ti waneigini tini Isaraele dindiha helonaga Ngode Datagaliwabehanda waneigini tihondo migi bini.✡ Iba 37.9 13 I̱ igini-o í̠na í̠ damene bu karu gubalini ho habe. Í̠ mine halu daliga timbuni hene tingi howa ti wane bedaru mira dabu nabi wa nahabe. Mana ogoniale beregome genda erekuibi ngaru mo yu anda ibuleberego nabibe. Mana ogoni ogobi nga. Biabe bulene manga ho heagua nde mo ko holenebi hina garibilo holenebi mo yu anda ibagagobiore nga.✡ Min 16.18

14 Agali biabe biaga karu tinaga yolo horo biabe birangi dege abale mibe. Yolo horo mendengi mule ngelo nahabe. Í̠naga mana bayale tigabi bialu kegoni. Ngode Datagaliwabe andaneha kegola ibugua í̠hondo yolo bayale biadai bulebira. I̱ igini-o í̠niore baya hangu haru halu í̠naga hame baya hanguore haru hai habe. 15 Mendealime í̠nihondo mbira bilo hame nalariligo damene í̠na mende kagohondo nabibe. Í̠ lulu yu holigo waini iba dewa nanabe. Lulu iba naabo holeni nahabe.✡ Md 7.12, Lg 6.31

16 Wali agali tomo garibilo karu tomo nelo mialu aga nabi karu í̠ninaga aga golo mibe. Mbirale dewa wua hariyagua nde tale bialu maru yagibano karu mibe. Mbiralihondo mbirale talebu mialu howa í̠naga bu miniha hamelalu genda nahe howa mibe.

17 Agali tigabi kago homaragola í̠na ibu one waneigini homa duguanda bedaria tomo dawa hanalu puwa mibe. Anigo agali ko biaga kago homaragola anidagua bulene nawigo ani nabibe.✡ Man 26.14, Sir 12.4-7

18 Agali manda timbuniwi kagohondo ibunaga mini ngago hale hole taga nahe howa hale habe. Ani bialu mbirali mini gigabiwi kagome í̠ biamogo bule bialu kago erembira muleni namibe.

19 Í̠na horo bibahendengi Anduane Homogo í̠naga Ngode Datagaliwabenaga mini yaraga halu holene nga. Mbirale í̠na buleberego damene bibahende bayale helonaga í̠ heba mandagi haabo halu í̠ biamogo bia lalu Ngode Datagaliwabehondo bi laabo habe. Hale ha. Dindi tara tara ngaruha agali bu karu tiha manda bayale tininaga wini mbira nawiore ka. Ogonidagua bidago irane Ngode Datagaliwabe ibuni manda bayalenaga tene ka. Ibunaga hameme mbirale bayaleru mo talebu tahaga biaga hene. Ani bialu maru ibugua turu nahe karu bo wahai habehe ka. Bi mana bayale i̱na í̠hondo langigi berogoni baya hangu manda biaabo habe.✡ Min 3.6, 16.3, SMG 16.13, Lg 1.52-53

20 Tobaiasa-o áyu bi mbira í̠hondo langerogo, Bamba i̱na muni timbuni mbira Gabariasa igini Gabaele ibuhondo minigo ibugua ngelowa dindi mini Lagese tano Media dindi ngagoria wu ka. 21 Ani ngogo ainde i̱ni yagibano holobada lowa miniha genda nayi habe. Í̠na Ngode Datagaliwabenaga bi ledago talialu howa ko bulene ngaruhondo wandialu hariyagua nde ibugua í̠hondo miniha turu ho kagola í̠ agali mbirale dewawi holebere, lalu Tobidihanda Tobaiasa mana lene.✡ Sir 1.16-17, 2.8-9, 1 Ti 6.6-8