2
1 Arie mamai nato, nanemi itomane yai ove eiwa gagurena, jimbo beyae ainyae. Ata embo da ainmi jimbo beyae aina gido awa, kaenato Toropu Embo, Iesu Keriso isira. Imo awa embo wasiri dambu darari. Ami kaena embo Mamo de benunu tedo aina. 2 God mi kaenato jimbo bebegae gido sinigambari esisina. Awatedo Iesu Keriso imo akuta kaenato jimboda rirowa budo besisina. Edo ainda betari kaena akuta awaembo ae, ata daedo embomai butu dededa awaembo.
Embo ainmi God gari awa, dá Iesu iwata kawata esisina ango eite ainda nameji dubobudo aina.
3 Nongo edo kaena God gari awa gara awa evire. Edo kaenanemi God da ge okain sisina awa kera edo ara gido awa, kaena God gari awa gara. 4 Embo da ainmi, “Na God gari,” taina, ata ainda ge okain awa kera edo ae gido, imo awa pitawa embo edo God da gebé ainda yai itae. 5 Ata embo ainmi God da ge kera edo eira awa, ami God dubobudo eira begata dá ango God mi jipapabé edo eira. Nongo edo kaena God doda itera awa gido era awa evire. 6 Embo da ainmi God da yaida isima edo eira taina gido, ami iwata kawata dá Iesu iwata kawata esisina ango aina.
7 Nanonameji,* Nanonameji da moka einda awa ‘Iesu gebé ari embomai’. ge okain eiwa teka ae, ata awa ge okain matu tuturoda buritewa awa nanemi imondemane gagurena. Edo ge okain matu eiwa awa ge imomane tuturoda ingitewa. 8 Awarata ge okain eiwa nane imondemane gagurena awa daedo teka. Nongo edo Keriso iwata kawata esisina awa teka, edo nongo edo imomane iwata kawata eite itewa awa teka, awatedo eiwa ge okain teka. Itomane iwata kawata bebegae dotureite iwata kawata dave God da jisida boroko edo ewa. Awa ango muyae itae eiuri pararabé boroko datembedo eira.
9 Embo da ainmi imo pararada itari site ainda nameji† nameji da moka awa ‘gebé ari nameji’. de sinigambari edo eira, embo awa muyaeda isiri jiriri matawa ango isira. 10 Embo da ainmi ainda nameji dubobudo eira, embo awa pararada isima edo eira, edo rorae da ji aemi imo jimbo beyae arida bawaina. 11 Ata embo da ainmi ainda namejide sinigambari edo eira, embo awa muyaeda isira. Aindabé muyaemi ainda jisi doiesira, imo muyaeda gundo maundo eira, edo yai nonda maundo eiri awa gae.
John mi God da gebé ari embomai tega neide kainde awamaneda yai kondade ari ge gagurisina.
12 Arie mamai nato, itomane jimbo bebegae awa God mi kotembedo doturisina, Iesu da dao da. Awatedo nane eiwa itomane yai gagurena. 13 Mamono, inemane embo tuturobéda isinesina‡ embo tuturobéda isinesina awa ‘Iesu Keriso’. awa gari. Awatedo nane eiwa itomane yai gagurena. Singabanga, imomane embo beyae§ embo beyae awa ‘Satan’ da dao nei. daginegetewa, awatedo nane eiwa itomane yai gagurena. Mamai nato, inemane Mamo* Mamo awa ‘Mamo God’. awa gari. Awatedo nane eiwa itomane yai gagurena. 14 Mamono, inemane embo tuturobéda isinesina awa gari. Awatedo nane eiwa itomane yai gaietena. Singabanga, itomane gebé ari God da yai awa okain, edo God da ge itomane yaida isima edo eira, edo imomane embo beyae daginegetewa. Awatedo nane eiwa itomane yai gaietena.
Butu embomaida wasiri bebegae awa dubobuove!
15-16 Butu embomai† Butu embomai awa embomai ainkain God dubobae, edo awamaneda tamopisida jipapa bebegae ambo ambo edo era. da wasiri bebegae berari awa engo: awamanemi tamopisida jipapa bebegae edo era, awamanemi embo neida rorae jisimi gido bain kotembedo era, edo dariga eite awamane akuta dao bain kotembedo era awa. Wasiri bebegae ango awa Mamo God da yaida edo gumbae, ata butu embomaida yai edo gundo eira. Awatedo butu embomaida wasiri bebegae awa dubobuove, edo rorae bebegae butu embomaimi jipapa edo era awa dubobuove. Embo da ainmi butu embomaida wasiri bebegae dubobudo eira awa, ine Mamo God dubobae edo eira. 17 Butu embomai ae rorae berari awamanemi jipapa edo era ainde awa sisigedo eira. Ata embo ainmi God da jipapa edo eira awa, imo natopo itaina.
Keriso da gitopo embobo jiwae butu beao arida iji idegara.
18 Mamai nato, butu beao arida iji awa aikae gumbira. Edo kotembewo, nanekare Keriso da Gitopo Embo‡ Keriso da Gitopo Embo. [English: Antichrist] Ove Kotopuda atopapasigari kotembedo era, butu beao ari iji ainde Satan mi embo eiwa gisijiari ami embomai jiwaebé udumaina (Daniel 11:31-39; Matthew 24:15; 2 Tesalonaika 2:1-12; Amboda Idegaina 13:1-8; 19:20). gumaina awa tetero ingitewa. Ango etewo iji boroko einde Keriso da gitopo embobo jiwae idegetera. Awatedo kaena gotera, butu beao arida iji awa atutumbesira. 19 Awamane gebé ari orobe kaenatobé ae, awatedo kaena dodo idegesitera. Awamane gebé ari orobe kaenatoda gido awa kaenamonde itetera. Ata awamane kaena dodo idegesitera ami arapa esira awa, awamane awa kaenato gebé ari orobe ae.
20 Ata Embo Kotopu§ Embo Kotopu awa ‘Keriso’ (Luke 4:34 edo Iwata Ari 3:14 giwo.). mi dodegari* dodegari awa ‘Asisi Kotopu’ (Iwata Ari 10:38 edo 2 Korinth 1:21 giwo.). itomane yaida piesiri buritewa, awatedo imomane rorae berari awa gari.† imomane rorae berari awa gari da moka awa ‘imomane atopatari berari awa gebéde ko pitawade awa gari’ (John 14:26 edo John 16:13 giwo.). 21 Aindabé imomane gebé gari edo gebéda yaida ge pitawa da ji gumbari tao ae, awatedo ove eiwa imondemane gaietena. Na imomane gebé gae ango site ove eiwa gaiae. 22 Edo ge pitawa tari embo awa averi? Embo ainmi Iesu awa Keriso‡ Keriso da moka awa ‘God da Avigari Embo’. ae tedo eira awara. Embo awa Keriso da gitopo. Ami Mamo ae Mai de ajiregedo eira. 23 Berari ainmi Iesu awa God da Mai awa ajiregedo eira awa, Mamo ainda yai itae; embo da ainmi Iesu awa God da Mai karigedo eira awa, Mamo ainda yai daedo isima edo eira.§ embo da ainmi Iesu awa God da Mai karigedo eira awa, Mamo ainda yai daedo isima edo eira. Ge eiwa Guriki ove gaiari indewaeda isira.
Edo God da ge itomane doda itaina, imomane Mai ae Mamo deda yai daedo itawa.
24 Awatedo ge ro tuturoda edo ingitewa awa, do itomaneda itarate tena. Edo ge tuturoda edo ingitewa itomane doda isima edo aina awa, imomane Mai ae Mamo deda doda daedo isima edo awa. 25 Edo tarigari eiwa God mi kaenamonde tarigari sisina awa, wasiri natopo itari kaenato yaida piaina.
26 Embomaimi imomane udumain era, awaembo na ge eiwa itomane yaida gaietena. 27 Ata dodegari* dodegari awa ‘Asisi Kotopu’ (1 John 2:20da kondade ari ge giwo.). awa ami piesiri buritewa awa, itomane doda isima edo eira. Awatedo inemane embo neimi imomane atopatain awa jipapa ae. Ata dodegari mi rorae berari gebémi imomane atopasido eira. Edo embo† embo awa ‘Asisi Kotopu’. awa gebé edo pitawa ae. Awatedo dá ami imomane atopaposisina ango, imomane ainda doda‡ ainda doda awa ‘Keriso da doda’. isima edo awa.
Keriso da doda isiwo!
28 Edo boroko, mamai nato, ainda doda isiwo! Ango eiawo embo awa idegari, kaena adu itae, edo ainda gumbari iji ainde, kaena mengari itae embo aindeda mina tamba ore.
29 Aindabé imomane awa gari, God awa wasiri dambu darari, inemane eiwa gotewa, embo ainmi wasiri dambu darari edo eira awa God mi engisina. John 3:3, 7-8; 1 Peter 1:3
*2:7 Nanonameji da moka einda awa ‘Iesu gebé ari embomai’.
†2:9 nameji da moka awa ‘gebé ari nameji’.
‡2:13 embo tuturobéda isinesina awa ‘Iesu Keriso’.
§2:13 embo beyae awa ‘Satan’ da dao nei.
*2:13 Mamo awa ‘Mamo God’.
†2:15-16 Butu embomai awa embomai ainkain God dubobae, edo awamaneda tamopisida jipapa bebegae ambo ambo edo era.
‡2:18 Keriso da Gitopo Embo. [English: Antichrist] Ove Kotopuda atopapasigari kotembedo era, butu beao ari iji ainde Satan mi embo eiwa gisijiari ami embomai jiwaebé udumaina (Daniel 11:31-39; Matthew 24:15; 2 Tesalonaika 2:1-12; Amboda Idegaina 13:1-8; 19:20).
§2:20 Embo Kotopu awa ‘Keriso’ (Luke 4:34 edo Iwata Ari 3:14 giwo.).
*2:20 dodegari awa ‘Asisi Kotopu’ (Iwata Ari 10:38 edo 2 Korinth 1:21 giwo.).
†2:20 imomane rorae berari awa gari da moka awa ‘imomane atopatari berari awa gebéde ko pitawade awa gari’ (John 14:26 edo John 16:13 giwo.).
‡2:22 Keriso da moka awa ‘God da Avigari Embo’.
§2:23 embo da ainmi Iesu awa God da Mai karigedo eira awa, Mamo ainda yai daedo isima edo eira. Ge eiwa Guriki ove gaiari indewaeda isira.
*2:27 dodegari awa ‘Asisi Kotopu’ (1 John 2:20da kondade ari ge giwo.).
†2:27 embo awa ‘Asisi Kotopu’.
‡2:27 ainda doda awa ‘Keriso da doda’.
2:29 John 3:3, 7-8; 1 Peter 1:3