1 E Isu i pe a roho na Vure, i laho lokovonga. E huriki a murimuri vona ri valai ri vakasiria vona a maka roho na tabeke na roho na Vure. 2  * Luk 19:44Lakea e Isu i koli, i ta maea, “Ra maka roho nga, a taki muholi mua, i uka tara kedo ge tabuli langa vona a kedo tara. A kedo lobo bara ni ubi puka puru.”

3 Na tahuna e Isu i mamade na lolo e Oliva, e huriki a murimuri vona ri valai kapiloho vona, ri nanea, “Ra maki nga, garika ri gi bele? Ge mata navai a kilakila muga ne ioe go bele, muga na nilobona parava?”

4 E Isu i koli, i ta maea, “Mu mamata, nahea tara viri ge tami mua. 5  * Mat 24:23-24; 1Ion 2:18E huriki ala kupo bara ri valai na ragu, bara ri tami e huriki, ri ta maea, ‘Iau e Kristo.’ Lakea bara ri tami e huriki ala kupo. 6 Bara mu longo a ngava na vabinga, a nita viliha na vabinga. Pali naha ni turutu. A maki nga bara ri bele, pali a nilobona parava i tabana. 7 E huriki a kabu na robo tara bara ri vaubi turana kabu na robo tara. E huriki a tara na hariki tara bara ri vaubi turana tara na hariki tara. A pago, a vuruke bara ri bele na tabeke legelege. 8 Ra maki nga bara ri bele muga, i manga a nimadihi na ngatavine i pahea a koma.

9  * Mat 10:22 “Muri bara ni lakavu mua, ni vakamadihi mua, ni rabalaki mua. E huriki na tanga lobo bara ri marikoi ne mua, a vuhuna mu ramai iau. 10 Muri e huriki ala kupo bara ri lohopile iau, ri vatepu, ri vahabi ria na limana pile. 11  * Mat 24:5,24; 1Ion 4:1E huriki a nitamina propet ala kupo bara ri bele, ri tami e huriki. 12 E huriki ala kupo bara ri lobo ni vangaru, a vuhuna e huriki ala kupo bara ri longotaro a vinara. 13  * Mat 10:22Pali e rei i pesi tora ge harena na parava i mate vona, a Vure bara i korimulea. 14  * Mat 28:19A Velenga Kamumu na harikianga bara ni vakalongo taro na tanga lobo na malala. Muri bara i bele a nilobona parava.

15  * Dan 9:27; 11:31; 12:11 “I mavonga, na tahuna mu masia a bakovi i muma hateka i ratapile a maki, ra viri i takia hosi e Daniel a propet, ge pesi pololilo na roho na Vure. E rei a viri i gia a nita iea ge longokilala. 16 Na tahuna mu masia a maki iea ge bele, mu ha. E huriki ri made o Iudea ri gi ha sike na lolo. 17  * Luk 17:31E rei a viri i pesi polomeli na mapana roho vona, nahea ge dili na ruma ge bole a maki vona. Ge ha pa kunana. 18 E rei a viri i leho na hania, nahea ge hamule na tanga ge bole a varakia vona. Ge ha pa kunana. 19 E huriki a ngatavine ri singou, e huriki a ngatavine ri vakaruru a koma kiroko, bara ri marego hateka na parava iea! 20 Mu vasileki nahea ge bele a maki iea na tahuna na malangia o na Parava Nimalo.

21  * Dan 12:1Na parava iea a nimadihi dagi hateka bara i bele. A nimadihi dagi maea i uka ma i bele hosi, i vakatubu na ni doko na malala, i valai i harena mona. Pali a nimadihi dagi maea i uka ma ge bele tabu muri ma. 22 Bara a Vure i uka ma ge vakakapo a parava nga, e huriki lobo bara ri mate. Pali a Vure bara i vakakapo ria, ge korimule e huriki a bakovi a ngatavine i vulaki ria. 23  * Mat 24:5I mavonga, nahea mu gu longo mai e huriki a bakovi ri ta maea, ‘Mata valai! E Kristo ia koea,’ o ‘Mata lakea! E Kristo ia lake!’ Naha ni longo mai ria, 24  * Vin 13:1-3; 2Tes 2:8-9; Kap 13:13-14a vuhuna e huriki a nitamine kristo, a nitamina propet bara ri bele, ri rata a maka nivakasiri dagi, a maki dagi ni turutu vona, ri ngaru ni tami e huriki. Bara i kara ria, bara ri tami tabu e huriki a bakovi a ngatavine a Vure i vulaki ria. 25 Mu longo kamumu. Iau a vakalongo muga mua pali. 26  * Luk 17:23-24I mavonga, na tahuna ri taki mua, ‘Oi! Ia lilo na robo!’ naha ni dili mai ia. O a viri tara ge ta maea, ‘Oi! I made kapiloho lilo!’ naha ni longo mai ia. 27  * Mat 24:37-39Na tahuna a Tuna Bakovi ge valai, bara i luve kavakava manga a vila. A vila i maravila na nirike na haro, i para lobo vona a hini i lakea na nirolona haro. 28  * Luk 17:37Na hini i tabuli vona a podana viri, a maka pangopangokaba bara ri vapopo.

29  * Ais 13:10; 34:4; Ese 32:7; Jol 2:10,31; 2Pe 3:10; Kap 6:12-13 “A nimadihi dagi i lobo, malaviriri kunana a haro bara i maparavunu, a keva tara i uka ma ge para. A maka hada bara ri mapasi, a maka nitora na hunu bara ni polu. 30  * Dan 7:13; Sek 12:10; Kap 1:7Muri a kilakila na Tuna Bakovi bara i bele na hunu. E huriki a kabu lobo na malala bara ri tangi. Muri bara ri masia a Tuna Bakovi i pesi langa na bubu, i puru valai na hunu turana nitora, a nipara dagi. 31  * 1Ko 15:52; 1Tes 4:16Muri a tavure bara i tangi dagi na tahuna i rudu e huriki a agelo vona ri gi bole sike palupu na tabeke lobo na malala e huriki a bakovi a ngatavine i vulaki ria. Bara ri bole ria na tabeke lobo, i vakatubu na tabeke tara na malala, i vano i lakea na tabekena tara.

32 “Mu bole a lohokanga vona a kai a balele. Na tahuna i tahoka a totona a rahana, i lubu a pagana, bara mu pasi­mata vona a tahuna na haro i tabukoi. 33 I mavonga kunana na tahuna mu matai a maki nga ri bele, bara mu lohoka vona a Tuna Bakovi i valai tabukoi hateka pali. 34  * Mat 16:28A taki muholi mua, e huriki a bakovi a ngatavine na tahuna iea i uka ma ri gi mate ma, bara i bele taro a maka maki nga. 35  * Mat 5:18A hunu a malala bara ru lobo, pali a nitagu bara i tabuli vakaroro.

36  * Apo 1:7; 1Tes 5:1-2 “I uka tara viri ge lohoka vona a parava, a kilala ge bele vona a maki nga. E huriki a agelo na hunu i uka ma ri lohoka vona a parava iea. A Tuna Vure tara i uka ma i lohoka vona. E Tamana kunana i lohoka vona a parava iea. 37  * Vuh 6:5-8A niluve na Tuna Bakovi bara i manga kunana a niluve na marungulolo hosi na tahuna e Noa i made na malala. 38 Muga na marungulolo e huriki ri kani, ri ninu, ri vaparangi, i vano i harena na tahuna e Noa i dili na agarungu. 39  * Vuh 7:21-23Ri made manga manga kunana, muri a marungulolo i bele vakaturutu, ria lobo ri mate. Bara i mavonga kunana na tahuna a Tuna Bakovi i valai. 40 Na parava iea, a bakovi ala rua bara ru leho na hania. A viri tara bara ni bole. A viri tara bara i made mule. 41 A ngatavine ala rua bara ru ubi momo a vit, ru gu rata a bret vona. A viri tara bara ni bole. A viri tara bara i made mule. 42  * Mat 25:13I mavonga mu mamata, a vuhuna i uka ma mu lohoka vona a parava ge valai vona e Bakovi Dagi. 43  * Luk 12:39-40; Kap 16:15Mu luhoia a ngava iea: A tahona ruma bara i lohoka vona a ra kilala ge valai vona a bakovi ni panaho, bara i matapara mavonga, i uka tara viri ge pukea a ruma vona. 44 I mavonga kunana mu matapara, a vuhuna a Tuna Bakovi bara i valai vakaturutu. Bara i valai na tahuna i uka ma mu luhoi ge valai vona.

45 “E rei ngane ge ia a voravora ge moro, ge rata kamumu a leho lobo a bakovi dagi vona i takia ge rata? A bakovi dagi vona bara i takia ge matakari e huriki a vora ranga, ge habi ne ria a maki ni kani na parava vakaroro. 46 Muri, na tahuna a bakovi dagi i hamule valai, i masia a bolekori iea i rata kamumu a leho vona, bara i rata kamumu hatekea. 47  * Mat 25:21,23A taki muholi mua, bara i ru ia ge matakari a mahala lobo vona. 48 Pali a vora iea bara ia a bakovi hale, bara i taki mulea, i ta maea, ‘A bakovi dagi nau i uka ma ge valai malaviriri.’ 49 Lakea i vakatubu ni ubi e huriki a vora turana, i kani i ninu turana e huriki a bakovi ni ninu. 50 Ra bakovi dagi vona, bara i valai vakaturutu na parava a vora i pahaluhoi ta i uka ma ge valai vona. Bara i luve na kilala a vora i pahadaki ta i uka ma ge luve vona. 51 Lakea a bakovi dagi bara i tolo pilea ra vora iea. Muri bara i ru turane huriki a tabele rua. Ra tanga iea, e huriki bara ri tangi, i vaheri mavonga a ngine ria, a vuhuna i madihi a hatene ria.