1 Mürin, chon ekewe ainangen Israel meinisin ra feito ren Tafit lon Hepron o üreni, “Nengeni, äm chaom me fitukom. 2 Lon ekewe fansoun lom, lupwen Saul a chüen nemenikem, en ewe ka fen emweni ewe mwichen sounfiun Israel lon maun. Iwe, ewe Samol mi Lapalap a pwal urenuk, ‘En kopwe chon masen nei aramasen Israel, kopwe pwal ar king.’ ” 3 Lupwen ekewe souakomwen Israel ra feito ren ewe king Tafit lon Hepron, Tafit a eäni eu pwonen atipeeu ngeniir fän mesen ewe Samol mi Lapalap lon Hepron. Iwe, ra epiti Tafit pwe epwe kingen Israel. 4 Tafit a ierini ilik, lupwen a tolong lon wisan wisen king, nge a nemenem lon ükükün faik ier. 5 Iwe, Tafit a nemeni Juta lon ükükün fisu ier me wonu maram me lon Hepron, nge a nemeni unusen Israel me Juta lon ükükün ilik me ülüngat ier me lon Jerusalem. ✡ 1.King 2.11; 1.Kron 3.4; 29.27

6 Iwe, Tafit me nöün kewe mwän ra feila Jerusalem pwe repwe maun ngeni ekewe chon Jepus, ir chon wiliposun ewe fanü mi apasa ngeni Tafit, “Kosap fokun tolong ikei, pun ekewe mwo mi mesechun me ekewe mi mwen repwe pineek.” Ra ekieki pwe Tafit esap tongeni tolong lon. ✡ Jos 15.63; Souk 1.21 7 Nge Tafit a liapeni ewe leni mi pöchökül itan Sion, iei mine a iteni telinimwen Tafit. 8 Iwe, lon ena ränin Tafit a üra, “Iö a mochen niela ekewe chon Jepus epwe tötä me lon ewe alen koluk fän pwül o maun ngeni ekewe mi mwen me ekewe mi mesechun, chokewe ngang üa oputeer.” Iei mine a fis ei fos, “Ewe mi mesechun me ewe mi mwen resap tolong lon ewe imw.” 9 Mürin, Tafit a imweimw lon ewe leni mi pöchökül o aita ngeni telinimwen Tafit. Iwe, a aüetä ewe telinimw pwelin ünükün ewe leni popuetä seni ewe leni mi amasou peliötiuen ewe pal. 10 Nge Tafit a pöpöchökülela, pun Kot ewe Samol mi Unusen Manaman a eti.

11 Iwe, Hairam kingen Tirus a tinala chon künö ren Tafit, a pwal tinala irä setar, taikü me chon ses fau. Iwe, ra aüetä eu imw fän iten Tafit. 12 Iei mine Tafit a mefi pwe ewe Samol mi Lapalap a anüküchara lon wisan wisen king lon Israel, a pwal afefeitäi mwün fän iten nöün aramasen Israel.

13 Mürin än Tafit feito seni Hepron, a angei pwal ekoch ülüpwülüan me pwülüan lon Jerusalem. Iwe, a pwal wor nöün Tafit ät me nengin mi uputiu ngeni. 14 Iwe, ikkei iten nöün kewe mi uputiu ngeni me lon Jerusalem: Samua, Sopap, Natan, Salomon, 15 Ipar, Elisua, Nefek, Jafia, 16 Elisama, Eliata me Elifelet.

17 Iwe, lupwen ekewe chon Filistia ra rong pwe Tafit a seikitä kingen Israel, nöür kewe sounfiu ra feila pwe repwe aoi Tafit. Nge lupwen Tafit a rong usun, a feitiu ngeni ewe leni mi pöchökül. 18 Iwe, ekewe chon Filistia ra feito o chonifetalei lon ewe lemolun Refaim. 19 Nge Tafit a aisini ewe Samol mi Lapalap, “Ifa usun, üpwe feila maun ngeni ekewe chon Filistia? Ifa usun, kopwe awinnaei?” Iwe, ewe Samol mi Lapalap a üreni Tafit, “Kopwe feila maun, pun ngang üpwe fokun awinnok pwe kopwe akufu ekewe chon Filistia.” 20 Iei mine Tafit a feila Paal-perasim o akufu ekewe chon Filistia me ikenan. Iwe, Tafit a apasa, “Ewe Samol mi Lapalap a küütalong ekewe tettelin sounfiu mi oputaei usun puun eu chanpupu a pwangenalong ewe fanü ünükün.” Iei mine ewe leni a iteni Paal-perasim. 21 Iwe, lupwen ekewe chon Filistia ra sü, ra likitala nöür kewe uluulun anümwäl ikenan, nge Tafit me nöün kewe mwän ra uweerela.

22 Mürin, ekewe chon Filistia ra pwal feitosefäl o chonifetalei lon ewe lemolun Refaim. 23 Nge lupwen Tafit a aisini ewe Samol mi Lapalap usun mine epwe föri, i a üreni, “Kosap fetal wenewen ngeniir, nge kopwe pwelila lükisökürür o maun ngeniir seni akawenewenen ekewe irä pwokus. 24 Iwe, lupwen kopwe rongorong mwaataaten peche leülün ekewe irä pwokus, lon ena otun kopwe popuetä le maun ngeniir. Pun ngang ewe Samol mi Lapalap üpwe akomwola mwom, pwe üpwe niela ekewe sounfiun Filistia.” 25 Iwe, Tafit a föri usun mine ewe Samol mi Lapalap a allük ngeni o niela ekewe chon Filistia seni Kepa tori Keser.