1 “Iwe, are eman mwän a pwülüeni eman fefin, nge mürin esap chüen sani, pun a küna och ter me won, ätewe epwe makei echö toropwen mwüfesen. Iwe, epwe ngeni neminewe ewe toropwe o tinala seni imwan. ✡ Mat 5.31; 19.7; Mark 10.4 2 A tongeni fis, pwe mürin an feila seni imwan, pwal eman mwän a pwülüeni. 3 Nge are aruomanün pwülüan a pwal oput o makei echö toropwen mwüfesen, mürin a ngeni neminewe o tinala seni imwan, ika ewe aruomanün pwülüan a mäla, 4 ätewe mi pwülüeni me mwan o tinala, esap tongeni pwülüenisefäli, pun a limengau. Ei sokun föför a anioput me fän mesen ewe Samol mi Lapalap. Kosap awarato tipis won ewe fanü ewe Samol mi Lapalap epwe ngonuk pwe kopwe fanüeni.

5 Iwe, are eman mwän a pwüpwülüfö, esap feila maun, esap pwal tolong lon och sokun angang. Epwe chök nom lon lenian lon ükükün eu ier, pwe repwe pwapwafengen me pwülüan.”

6 “Iwe, esap wor eman a tongeni angei seni eman an lenien üsüs, sap mwo nge ewe föün üsüs fän iten asisilen an liwinimang, pun epwe usun chök nge a angei seni mine a manau seni.

7 Are a pwä pwe eman aramas a soläni eman lein pwin kewe chon Israel, mürin a nöüni amanau ika a amömöla, ewe chon solä epwe ninnila. Iei usun kopwe limetawu ewe mi ngau seni leimi. ✡ Eks 21.16

8 Iwe, lupwen a toruk samaun rupun pwötür, kopwe afäluk pwe kopwe tümwünüöchü le apwönüetä meinisin mine ekewe souasor ir chon ewe ainangen Lefi ra aiti ngonuk. Kopwe tümwünüöchü le apwönüetä mine üa allük ngeniir. ✡ Lif 13.1–14.54 9 Kopwe chechemeni mine ewe Samol mi Lapalap om we Kot a föri ngeni Miriam, lupwen oua towu seni Isip. ✡ Num 12.10

10 Are ka mwüt ngeni chon arum och mettoch, kosap tolong lon imwan, pwe kopwe angei ewe asisilen an liwinimang ngonuk. 11 Kopwe chök ütä lükün, nge ewe mwän ka mwüt ngeni och mettoch epwe uwawu reöm ewe asisilen liwinimang. 12 Nge are ewe mwän a wöüngau, kosap annut fän üfan a ngonuk. 13 Iwe, lupwen akkar a tuputiu, kopwe aliwinala ngeni an we asisilen lwinimang, pwe a tongeni annut fän üfan owokot o afeiöchuk. Ren ei föför kopwe küna pwüng fän mesen ewe Samol mi Lapalap om we Kot. ✡ Eks 22.26-27

14 Iwe, kosap ariaföüü eman chon angang mi mö a wöüngau o mwelele, ese lifilifil ika i eman pwiüm chon Israel ika eman chon ekis mi imweimw lon eu lein om kewe telinimw. 15 Nge kopwe ngeni liwinin lon ewe rän a angang ngonuk mwen akkar esamwo tuputiu. Pokiten ewe mwän a wöüngau, a ekieki liwinin. Nge are ka amwöchü seni, epwe siö ngeni ewe Samol mi Lapalap, nge en kopwe tipis ren. ✡ Lif 19.13

16 Iwe, ekewe sam resap ninnila fän iten än nöür tipis, nge ekewe nau resap ninnila fän iten än semer tipis. Iteiten eman me eman epwe ninnila fän iten püsin an tipis. ✡ 2.King 14.16; 2.Kron 25.4; Is 18.20

17 Kosap sorei mine a pwüng ngeni eman chon ekis ika eman mi mäsen, kosap pwal angei üfen eman fefin mi mä pwülüan fän iten asisilen an liwinimang. 18 Kopwe chechemeni pwe ra nounuk amanau me lon ewe fanü Isip, nge ewe Samol mi Lapalap om we Kot a angasok seni ikenan. Iei mine üa allük ngonuk pwe kopwe föri iei usun. ✡ Eks 23.9; Lif 19.33-34; Tut 27.19

19 Lupwen ka kini uän wiich lon om tanipi o manlükala eu pilük, kosap liwiniti om tanipi pwe kopwe angei. Kopwe likitala fän iten ekewe chon ekis, ekewe mi mäsen me ekewe fefin mi mä pwülüer. Ren ei ewe Samol mi Lapalap om Kot epwe afeiöchuk lon om angang meinisin. 20 Lupwen ka wichiki om irä olif, kosap wichikisefäli palan. Kopwe likitala ekoch föün fän iten ekewe chon ekis, ekewe mi mäsen me ekewe fefin mi mä pwülüer. 21 Nge lupwen ka kini uän om irän wain lon om tanipi, kosap kinisefäli me mürin. Kopwe likitala ekoch föün fän iten ekewe chon ekis, ekewe mi mäsen me ekewe fefin mi mä pwülüer. ✡ Lif 19.9-10; 23.22 22 Iwe, kopwe chechemeni pwe ra nounuk amanau me lon ewe fanü Isip. Iei mine üa allük ngonuk pwe kopwe föri iei usun.