1 Iwe, ewe Samol mi Lapalap a kapas ngeni Moses, 2 pwe epwe üreni ekewe chon Israel meinisin, “Ämi oupwe pin, pun ngang ewe Samol mi Lapalap ämi Kot üa pin. ✡ Lif 11.44-45; 1.Pet 1.16 3 Iteiten eman me eman epwe meniniti inan me seman. Oupwe pinini ai kewe ränin sapat, pun ngang ewe Samol mi Lapalap ämi we Kot. ✡ Eks 20.12; Tut 5.16; Eks 20.8; Tut 5.12 4 Ousap kul seniei o fel ngeni uluulun anümwäl, ousap pwal föri fän itemi uluulun kot seni mächä, pun ngang ewe Samol mi Lapalap ämi we Kot. ✡ Lif 26.1; Eks 20.23; 34.17; Tut 27.15

5 Lupwen oupwe eäni asoren kinamwe ngeniei ngang ewe Samol mi Lapalap, oupwe föri pwüngün ewe asor, pwe ngang üpwe etiwa. 6 Oupwe ochoch ewe mönün asor oua eäni lon ewe chök rän ika sorotän ewe rän. Nge mine a lusun tori aülüngatin rän oupwe kenala. 7 Iwe, are oupwe ochoch och seni ewe mönün asor lon aülüngatin rän, epwe eu föför mi anioput, ngang üsap etiwa ewe asor. 8 Iteiten eman mi ochoch ei sokun asor epwe püsin angei chappen an föför pokiten an apiningaua eu mettoch mi pin me ren ewe Samol mi Lapalap. Iwe, ewe aramas epwe käriwu me lein aramasan.

9 Iwe, lupwen oupwe kini resin fanüemi, ousap kiniela uän tanipimi tori kiännin, ousap pwal rusifengeni mine a turutiu seni kiniemi wiich. 10 Ousap kiniela uän fotämi irän wain meinisin, ousap pwal rusi ekewe uän irän wain mi morotiu lon tanipimi. Oupwe likitirela fän iten ekewe chon wöüngau me ekewe chon ekis, pun ngang ewe Samol mi Lapalap ämi we Kot. ✡ Lif 23.22; Tut 24.19-22

11 Ousap solä, ousap pwal atuputup ika chofana ngeni chon arumi. ✡ Eks 20.15; Tut 5.19; Eks 20.16; Tut 5.20 12 Ousap akapelmwäli itei, pwe ousap apiningaua itei ren. Ngang ewe Samol mi Lapalap ämi we Kot. ✡ Eks 20.7; Tut 5.11; Mat 5.33

13 Ousap ariaföüü chon arumi, ousap pwal angei och seni fän pöchökül. Ousap mwo nge amwöchü liwinin eman chon angang lon unusen eu pwin tori lesosor. ✡ Tut 24.14-15 14 Ousap turunufasei eman mi selingepüng, ousap pwal likatupu eman mi mesechun. Nge oupwe meninitiei, pun ngang ewe Samol mi Lapalap ämi we Kot. ✡ Tut 27.18

15 Ousap sorei mine a pwüng lon ämi kapwüng. Ousap peni eman mi wöüngau ika awina eman mi lap, nge oupwe eäni kapwüng ngeni chon arumi fän pwüng. ✡ Eks 23.6-8; Tut 16.19 16 Ousap fetalfeil lein aramasemi o luapas, ousap pwal föri och mi afeiengau ngeni manauen chon arumi, pun ngang ewe Samol mi Lapalap.

17 Kosap oput pwiüm lon lelukom, nge kopwe fönöü chon arum, pwe kosap tolong lon tipis pokitan. ✡ Mat 18.15 18 Kosap püsin ngeni ätewe mi tipis ngonuk chappen an föför, kosap pwal chou ngeni eman lein aramasom. Nge kopwe echeni chon arum usun püsin om echenuk, pun ngang ewe Samol mi Lapalap. ✡ Mat 5.43; 19.19; 22.39; Mark 12.31; Luk 10.27; Rom 13.9; Kal 5.14; Jas 2.8

19 Iwe, kopwe aleasochisi ai kewe allük: Kosap apwüpwülüafengeni sokopaten man, kosap amora ruu sokun föün irä lon eu chök tanipi, kosap pwal üföüf echö üf seni ruu sokun kireen mangaku. ✡ Tut 22.9-11

20 Iwe, are eman mwän a lisowu ngeni eman amanau fefin mi fen kofot ngeni eman, nge neminewe esap mwo kamö, esap pwal mwo ngasala, epwe fokun fis kapwüng ngeniir, nge resap ninnila, pun neminewe esap mwo ngas. 21 Ewe mwän epwe uwato eman ätemwänin sip leasamalapen ewe imw mangaku ia aramas ra churiei ie, pwe an asoren pupungau ngeniei ngang ewe Samol mi Lapalap. 22 Ren ei ätemwänin sip ewe souasor epwe föri asoren amusamusen tipis fän mesei ngang ewe Samol mi Lapalap fän iten än ewe mwän tipis. Iwe, ewe tipis ätewe a föri epwe mus seni.

23 Lupwen oupwe tolong lon ewe fanü Kanaan o fotuki sokopaten irän mongö, ousap eni uar lon ükükün ülüngat ier, pun ra pin ngenikemi. 24 Iwe, lon ewe arüanün ier uar meinisin repwe eu asoren kilisou mi pin fän itei ngang ewe Samol mi Lapalap. 25 Nge lon ewe alimuen ier oua tongeni eni uar. Ren ei uän fotämi irä repwe chomongola. Ngang ewe Samol mi Lapalap ämi we Kot.

26 Ousap ochoch och fituk a chüen wor cha lon. Ousap föri angangen pwee ika pöüt. ✡ Ken 9.4; Lif 7.26-27; 17.10-14; Tut 12.16,23; 15.23; Tut 18.10 27 Ousap pwal fichi meten möküren asen selingemi ika amocha alüsemi. 28 Ousap nekelekei inisimi fän iten mönümä, ousap ichi sokopaten lios womi. Ngang ewe Samol mi Lapalap. x Lif 21.5; Tut 14.1

29 Kosap turunufasei noum fefin ren om mwüt ngeni pwe epwe amömö inisin fän iten lisowu, pwe ewe fanü esap wiliti fanüen chon lisowu, esap pwal uren föföringau. ✡ Tut 23.17 30 Kopwe pinini ai ränin sapat o meniniti imwei mi pin. Ngang ewe Samol mi Lapalap. ✡ Lif 26.2

31 Kosap feila ren watawa ika ren sourong, kosap angei ar öüröür, pwe kosap limengau rer. Ngang ewe Samol mi Lapalap om we Kot. ✡ Tut 18.11; 1.Sam 28.3; 2.King 23.4; Ais 8.19

32 Kopwe ütä me mwen eman mi pwech möküran o asamolu ekewe chinlap, kopwe meninitiei ngang ewe Samol mi Lapalap om we Kot. 33 Iwe, lupwen eman chon ekis a wasöla lon fanüemi, ousap kirikiringau ngeni. 34 Ewe chon ekis mi nom remi epwe usun chök eman re wilipos leimi. Kopwe echeni i usun püsin om echenuk, pun ämi oua fen piin wasöla lon ewe fanü Isip. Ngang ewe Samol mi Lapalap ämi we Kot. ✡ Eks 22.21; Tut 24.17-18; 27.19

35 Iwe, ousap eäni sokun aükük mi solä, lupwen oua aükük langatam, chou ika iteit. 36 Oupwe nöünöü kilo me föün kilo mi pwüngüöch, pwal eu aükük mi pwüngüöch. Ngang ewe Samol mi Lapalap ämi we Kot mi emwenikemiiwu seni ewe fanü Isip. ✡ Tut 25.13-16; SalF 20.10; Is 45.10 37 Iwe, oupwe aleasochisi ai kewe allük me pwüüng meinisin o apwönüretä: Ngang ewe Samol mi Lapalap.”