22
Allük usun föförün aliwini mettoch
22.1-15
1 “Iwe, are eman aramas a soläi eman kow ika eman sip o niela ika amömöla, ätewe epwe liwini limman kow fän iten eman, pwal föman sip fän iten eman. Ewe chon solä epwe aliwinisefäli liwinin mine a soläni fiti liwinin an tipis. Nge are esap wor och ren, repwe amömöla ewe mwän.
2 Are eman a liapeni eman chon solä lepwin o wichi, nge a mäla, esap wor liwinin tipisin nimanau ngeni. 3 Are eman a niela eman chon solä lupwen a ränila, epwe wor liwinin tipisin nimanau ngeni. 4 Are ewe man a chüen nom ren ewe chon solä o manau, ese lifilifil ika eman kow, ika eman aas, ika eman sip, epwe liwini ruoman man fän iten eman.
5 Are eman aramas a amongöü ngeni nöün man fetilin eu mälämäl ika fetilin eu tanipin wain, nge a mwüt ngeni nöün man pwe repwe pwal eni fetilin än eman tanipi, ätewe epwe liwini ngeni ua mi mürina seni püsin an mälämäl ika an tanipin wain.
6 Nge are a wor eu kar mi küri iräfölüföl, pwe a ngeteri irän wiich mi pilük, ika irän wiich resamwo pöküpök, ika unusen eu tanipin wiich, ätewe mi popuetä ewe kar epwe liwinisefäli meinisin mine a karala. 7 Are eman a ngeni chon arun nöün moni ika pisekin pwe epwe iseis, nge eman a soläi, iwe, are a pwä ewe chon solä, epwe aliwini fän ruu mine a soläni. 8 Nge are ewe chon solä esap pwä, ätewe mi iseis ewe pisek lon imwan epwe feito lon imwenfel o pwärätä pwe esap angei pisekin ewe aramas.
9 Are eman aramas a silleni mettochun ren eman o apasa pwe an, ese lifilifil ika eman kow ika eman aas, eman sip ika üf, ika och mettoch a pöüt seni, ekewe ruoman repwe feito lon imwenfel. Nge ewe eman, Kot a atipisi, epwe liwini ngeni chon arun fän ruu.
10 Are eman a ngeni chon arun nöün aas ika nöün kow ika nöün sip ika sokun man pwe epwe tütümwünüetiu, iwe, are ewe man a mäla, ika feiengau, ika eman a süla fan, nge esap wor eman a küna, 11 ewe chon tümwünü ewe man epwe feila lon imwenfel o eäni eu akapel pwe esap angei nöün chon arun man. Iwe, ewe mine nöün ewe man epwe lükü ewe akapel, nge ewe mi tümwünü ewe man esap mönätiu liwinin. 12 Nge are eman a soläni ewe man seni ewe chon tümwünü, ewe chon tümwünü epwe mönätiu liwinin ewe man ngeni mine nöün. 13 Are eman manmwacho a ni ewe man, ewe chon tümwünü epwe uwato ewe man pwe an pisekin pwärätä, nge esap liwini mine a mäla ren manmwacho.
14 Are eman a tüngor eman man seni chon arun, nge ewe man a feiengau ika mäla, lupwen ewe mine nöün ese nom, ätewe mi tüngor epwe wisen mönätiu liwinin ewe man. 15 Nge are ewe mine nöün a nom, ätewe mi tüngor esap wisen mönätiu liwinin. Iwe, are eman a satani eman man, nge a feiengau, ewe sata a iwe chök liwinin.”
Allük usun manauen aramas pwal usun lamalam
22.16-31
16 “Are eman mwän a atupu eman föpwül esamwo tori mwän, esap pwal kofot, nge a kon ren, epwe ngeni kisan o pwülüeni. 17 Nge are semen ewe föpwül esap fokun tipeeu ngeni an epwe pwülüeni, ewe chon atuputup epwe mönätiu ükükün ewe kis a fis lupwen apwüpwülüen eman föpwül esamwo tori mwän. ✡ Tut 22.28-29
18 Oupwe niela ekewe sourong fefin meinisin. ✡ Tut 18.10-11 19 Eman mi kon ren eman man epwe ninnila. ✡ Lif 18.23; 20.15-16; Tut 27.21 20 Eman mi asor ngeni eman kot lüki ngang ewe Samol mi Lapalap, ätewe epwe fokun ninnila. ✡ Tut 17.2-7
21 Ousap föri och mi mwäl ngeni wasöla ika ariaföüür, pun oua fen piin wasöla lon ewe fanü Isip. 22 Ousap ariaföüü ekewe fefin mi mä pwülüer ika ekewe mi mäsen. 23 Pun are oua ariaföüür, nge ir repwe siö ngeniei, üpwe fokun aüselinga ar siö. ✡ Eks 23.9; Lif 19.33-34; Tut 24.17-18; 27.19 24 Üpwe fokun song ngenikemi o nikemi lon maun pwe pwülüemi repwe lipichsefäl, nge nöümi repwe mäsen.
25 Iwe, are ka mwüt ngeni eman moni me lein nei aramas mi mwelele pwe epwe paroni, kosap usun eman mi awattela winnen nöün moni. Kosap fokun angei seni winnan. ✡ Lif 25.35-38; Tut 15.7-11; 23.19-20 26 Are ka angei üfen eman chon arum pwe asisilen an liwinimang ngonuk, kopwe fokun aliwini ngeni mwen akkar esamwo tuputiu. 27 Pun ina chök üfan a pwölü ngeni inisin. Met chök epwe chenikameni le annut? Nge are epwe siö ngeniei, üpwe rongorong, pun üa eäni tong. ✡ Tut 24.10-13
28 Kosap turunufasei Kot, kosap pwal otteki samolun aramasom. ✡ Föf 23.5
29 Kosap amanga le uwato rei mwen uän kiniom wiich, pwal mwen ungutiom wain. Iwe, kopwe ngeniei noum mwänichi. 30 Kopwe pwal ngeniei mweinöün noum kow me noum sip. Ewe apanan epwe nom ren inan lon ükükün fisu rän, nge lon awaluen rän kopwe uwato rei. 31 Iwe, ämi oupwe aramas mi pin fän itei. Iei mine ousap ochoch fituken man mi mäla ren manmwacho, nge oupwe aochocha ngeni kolak kana.” ✡ Lif 17.15