1 Tupàn heko haw pe har wà, pemume'u ikatu haw nehe.

Pemume'u ipuràg eteahy haw nehe. Ipuner haw pemume'u nehe.

2 Pemume'u Tupàn ikàgaw nehe, ipuràgaw nehe no.

Pezeamumew Tupàn Tuweharupi Wiko Ma'e ikatuahy ma'e henataromo nehe,

Peme izexak kar mehe nehe.

3 Teko weinu Tuweharupi Wiko Ma'e 'y 'aromo ize'eg mehe wà.

Tupàn ikàg ma'e umuànoànog kar àmàn a'e.

Teko weinu ize'eg yryhu 'aromo a'e wà.

4 Tupàn Tuweharupi Wiko Ma'e ize'eg tynehem ikàgaw pupe a'e. Tynehem ipuner haw pupe a'e no.

5 Ize'eg uzuhaw ywyràkàxigyw a'e wà.

Uzuhazuhaw te ywyràkàxigyw Irimano ywytyr rehe har a'e wà.

6 Omopoopor kar ywytyr Irimano her ma'e tapi'aka'yr ài wà.

Ywytyr Eremon her ma'e omopoopor tapi'aka'yr awa ài a'e.

7 Tupàn Tuweharupi Wiko Ma'e ize'egaw umuhyape katu kar àmàn iweraw paw a'e.

8 Ize'eg umuryryryryz kar ywyxiguhu.

Umuryryz ywyxiguhu Kanez her ma'e.

9 Ize'egaw umutuhug ywyra kawar her ma'e wà.

O'ok huwer ywyra wi.

A'e 'ar mehe we, hàpuzuhu pupe, teko paw uhapukaz wà.

— Tuwe teko umume'u Tupàn ikatuahy haw a'e wà nehe, i'i wà.

10 Tupàn Tuweharupi Wiko Ma'e upyta 'y typya'u ma'e i'aromo tuwihawete romo.

Tuwihawete romo upureruze'eg putar tuweharupi nehe.

11 Tupàn Tuweharupi Wiko Ma'e umur ukàgaw wemiaihu wanupe.

Umur uze'egatu wanehe. Umur ikatuahy ma'e paw wanupe.