1 O Tupàn Tuweharupi Wiko Ma'e, amume'u nekatu haw, ta'e hepyro pe ne xe.

Neremupuka kar kwaw heàmàtyry'ymar herehe ne wà.

2 O Tuweharupi Wiko Ma'e hezar, ahapukaz newe ihe. — Hepytywà pe nehe, a'e newe.

A'e rupi hemukatu pe ne.

3 Hepyro pe hemàno àwàm wi ne.

A'e 'ar mehe aiko umàno ma'e kwer waneta haw pe oho ma'e ràm wainuromo ihe.

Hemuigo kar wi pe ne.

4 Pezegar Tupàn Tuweharupi Wiko Ma'e pe nehe, ikatu haw rehe nehe.

Pe, hemiaihu hehe uzeruzar ire upytu'u 'ym ma'e wà.

Pema'enukwaw Tupàn ikatuahy ma'e hemiapo kwer rehe nehe.

Pemume'u peme hemiapo kwer ikatu haw izupe nehe.

5 Neremumaw kwaw 'ar tetea'u nekwahy pà ne.

Nekatu haw nupytu'u pixik kwaw.

Amo upuner pytun gatu imumaw paw rehe uzai'o pà ma'e rehe a'e wà.

Iku'em mehe ur wi hurywete haw.

6 — Nuzeapo kwaw ikatu 'ym ma'e ihewe nehe, a'e hezeupe.

— Ni amo nahereityk kwaw wà nehe, a'e hezeupe.

7 O Tupàn Tuweharupi Wiko Ma'e, nekatu ihewe.

Ereiko taw imuàtà pyrer ywytyruhu rehe har ài ihewe, heàmàtyry'ymar wanuwi hepyro pà.

Ihewe nezeàmim mehe

Akyze tuwe ihe.

8 O Tupàn Tuweharupi Wiko Ma'e, uruwenoz ihe.

— Hepytywà pe nehe, a'e newe.

9 Aze àmàno nehe, na'ikatu kwaw newe nehe.

Aipo umàno ma'e kwer upuner nekatu haw imume'u haw rehe wà.

Nerepuir kwaw neremiaihu wanuwi. Aipo umàno ma'e kwer upuner nepuir 'ymaw imume'u haw rehe wà.

10 O Tupàn, herenu pe hepuhareko pe nehe.

Hepytywà pe nehe, o Tupàn Tuweharupi Wiko Ma'e.

11 Hemupytu'u kar pe hezai'o re. Hemupynyk kar pe turywete haw rehe kury.

Eremunyryk zemumikahy haw ihewi ne.

Hemono pe turywete haw inuromo no.

12 A'e rupi napytu'u kwaw hezegar ire nehe.

Azegar putar newe nekatu haw rehe nehe.

O Tuweharupi Wiko Ma'e, ereiko hezar romo.

Nekatu haw amume'u putar newe tuweharupi nehe.