1 O Tupàn Tuweharupi Wiko Ma'e. Aha newe hepyro àwàm hekar pà ihe.

Hemunyryk kar pe hereityk àwàm rehe hemaranugar àwàm wi nehe.

Nekatuahy ne. Hepytywà àwàm ainoz newe.

2 Herenu pe hepyro pà na'arewahy kury.

Eiko itahu ài hemimaw romo nehe.

Eiko hepyro har romo nehe no.

3 Ereiko itahu hemimaw ài ne. Ereiko tàpuz imuàtà pyr heàmàtyry'ymar wanuwi hemimaw romo.

Hemuata katu kar pe nehe, hemu'e pe nehe, neremimume'u kwer rupi katete nehe.

4 Hemu'ar kar zo miar zuka haw zàwenugar pupe nehe, heàmàtyry'ymar wanemiapo kwer pupe nehe,

Ta'e ereiko hemimaw romo ne xe.

5 Amono hereko haw nepo pe.

O Tuweharupi Wiko Ma'e, hepyro putar pe nehe,

Ta'e ne Tupàn ereiko puruwi upuir 'ym ma'e romo ne xe.

6 Tupàn ua'u wamuwete har iro newe wà.

Xo nerehe zo azeruzar ihe.

7 Heamutar katu pe ne, a'e rupi herurywete ihe. Herurywete azeharomoete ihe.

Apuraraw ma'erahy ihe.

Ipuraraw mehe herexak pe ne.

Erekwaw ikatu 'ym ma'e ihewe uzeapo ma'e.

8 Nahepyhyk kar kwaw pe heàmàtyry'ymar wanupe ne.

Hemonokatu pe ikatu 'ymaw wi.

9 O Tupàn Tuweharupi Wiko Ma'e, hepuhareko pe nehe, ta'e apuraraw ma'erahy iteko ihe xe.

Hereha ikene'o, ta'e azai'o tetea'u ihe xe.

Hekene'o heretekwer rehe.

Uhem hekàgwer herekwe wi.

10 Hezemumikahy haw umumaw hekàgaw ihewi.

Herehaykwer weraha hekwarahy ràm ihewi no.

Nahekàg kwaw ta'e apuraraw ma'erahy tetea'u ihe xe.

Te hekagwer upaw wewer ihewi.

11 Heàmàtyry'ymar upuka herehe wà.

Heruwake wiko ma'e uze'eg urywahyahy herehe wà no.

Heremigwaw ukyze ihewi wà.

Nahu rupi herexak mehe uzàn ihewi wà.

12 Upaw rupi heharaz ihewi wà.

Aiko umàno ma'e kwer zàwenugar romo wanupe ihe. Aiko ma'e heityk pyrer zàwenugar romo.

13 Aenu heàmàtyry'ymar wanewowo mehe ihe wà.

Teko heruwake har tetea'u umume'u hezuka àwàm waiko wà.

Umume'u hereityk àwàm uzeupeupe wà.

— Ma'e zapuner iapo haw rehe izuka pà nehe, i'i uzeupeupe wà.

14 Ihe azeruzar nerehe o Tuweharupi Wiko Ma'e.

Ereiko hezar romo.

15 Tuweharupi erezekaiw katu herehe.

Hepyro pe heàmàtyry'ymar wanuwi,

Herehe ipurupyhyk wer ma'e wanuwi.

16 — Ikatu ihewe, ere ihewe nehe, herehe neme'e mehe nehe. Aiko neremiruze'eg romo ihe.

Hepyro pe nehe, ta'e heamutar katu pe ne xe.

17 O Tupàn Tuweharupi Wiko Ma'e, uruenoz iteko ihe.

Hepyro hereityk àwàm rehe hemaranugar haw wi nehe.

Tuwe ikatu 'ym ma'e imaranugar uzeityk awer rehe wà nehe.

Tuwe wezyw uze'eg 'ym pà umàno ma'e kwer wapyta haw pe wà nehe.

18 Hemu'em ma'e romo wanekon a'e wà. Tuwe nuze'eg wi kwaw wà nehe.

— Aiko wera'u amo wanuwi ihe, i'i wà. — Aiko ikàg wera'u ma'e romo pewi ihe, i'i wà.

Uze'eg zemueteahy teko Tupàn heruzar har wanehe wà.

19 Eremonokatu ikatuahy ma'e newi ukyze ma'e wanupe.

Teko paw upuner nekatu haw hexakaw rehe wà.

Erezekaiw katu nerehe uzeruzar ma'e wanehe ne.

Teko paw upuner nezekaiw haw hexakaw rehe wà.

20 Ereiko wainuromo ne.

A'e rupi erepyro ikatu 'ym ma'e iapo har wanuwi ne wà.

Aze ipurapo wer ikatu 'ym ma'e rehe wanupe wà, wamim katu haw pupe erezumim ne wà, wàmàtyry'ymar wanemiapo iaiw ma'e wi ne wà.

21 Tuwe pemume'u Tupàn Tuweharupi Wiko Ma'e ikatu haw nehe.

Heàmàtyry'ymar heywyr wamàmàn mehe, heàmàtyry'ym mehe,

Tupàn wexak kar tuwe heamutar katu haw a'e.

22 Akyze ihe.

— Hemono kar uzewi a'e, a'e hezeupe. Herenu herehapukaz mehe a'e.

— Hepytywà pe nehe, a'e izupe.

Wenu heze'eg mehe.

23 Ezamutar katu Tupàn Tuweharupi Wiko Ma'e nehe, hemiaihu uzeruzar ire upytu'u 'ym ma'e wà.

Uzekaiw katu uzeruzar ma'e wanehe a'e.

Uzepyk amo wanuwi wiko wera'u ma'e wanehe, ta'e na'ikatu kwaw izupe wà xe.

24 Pekàg nehe, pekyze zo nehe.

Pe, Tupàn Tuweharupi Wiko Ma'e rehe uzeruzar ma'e paw rupi pe wà.