1 O hezar, hepyro pe heàmàtyry'ymar wanuwi nehe.

Hemunyryk kar pe herehe ipuruzuka wer ma'e wanuwi nehe.

2 Hepyro pe awa ikatu 'ym ma'e wanuwi nehe.

Hemunyryk kar pe a'e puruzuka ma'e wanuwi nehe.

3 O Tupàn Tuweharupi Wiko Ma'e, eme'e kury.

Heràro herereko hezuka àwàm rehe a'e wà.

Awa purupe ma'erahy ipuraraw kar har uzemono'og waiko hezuka àwàm imume'u pà wà.

Nazapo kwaw ikatu 'ym ma'e wanupe hezezuka kar pà ihe.

Nazezuka kar kwaw teko wanupe heaiw paw hekuzaromo.

4 Nazapo kwaw ikatu 'ym ma'e.

Nezewe rehe we uzàn hekutyr wà, ta'e herehe ipuruzuka wer wà xe.

5 O Tupàn Tuweharupi Wiko Ma'e Ikàg Wera'u Ma'e ne, epu'àm ezuwà hepytywà pà nehe.

Ne ae exak nehe, o Tupàn Izaew Wazar.

Eme'e teko amo ae ywy rehe har nerehe uzeruzar 'ym ma'e wanehe nezepyk pà nehe.

Epuhareko zo a'e neàmàtyry'ymar iaiw ma'e ne wà nehe.

6 Pyhaw uzewyr wà.

Umàmàn tawhu iwyr wà. Okororo zawar ài wà.

7 Wapeku nuzawy kwaw takihepuku wà.

Uhapukaz tawhu pe har wazuka àwàm imume'u pà wà, wanehe uze'eg zuawygatu pà wà.

— Teko nazanerenu kwaw a'e wà, i'i uzeupeupe wà.

8 O Tupàn Tuweharupi Wiko Ma'e erepuka wanehe.

Ereze'eg urywahyahy teko nerehe uzeruzar 'ym ma'e nànàn.

9 O Tupàn, azeruzar nekàgaw rehe ihe.

Ereiko hemimaw romo ne.

10 Tupàn hezar ur putar heàwàxi pà upuruamutar katu haw rupi a'e nehe.

Wexak kar putar heàmàtyry'ymar waneitykaw ihewe a'e nehe.

11 O hezar, ezuka zo heàmàtyry'ymar na'arewahy ne wà nehe.

Aze erezuka na'arewahy ne wà nehe, heànàm heharaz putar wakatu 'ymaw wi a'e wà nehe.

O urezar, uremimaw zàwenugar, emuhàmuhàz heàmàtyry'ymar nekàgaw pupe nehe. Eityk wamumaw pà ne wà nehe.

12 Tuweharupi uze'eg mehe heàmàtyry'ymar uzapo ikatu 'ym ma'e a'e wà.

Wiko wera'u amo wanuwi a'e wà. Tuwe waneko wera'u haw upaw nehe.

Omono ze'egaiw amo teko wanehe wà. Hemu'em wà no.

13 A'e rupi ainoz ko ma'e newe ihe kury. — Emumaw a'e teko nekwahy mehe ne wà nehe. Azeharomoete.

Tuwe uzezuka kar upaw rupi wà nehe.

Nezewe mehe ukwaw putar Tupàn Izaew waneruze'egar romo heko haw a'e wà nehe.

Ukwaw putar teko paw Tupàn hemiruze'eg romo waneko haw a'e wà nehe no.

14 Pyhaw heàmàtyry'ymar uzewyr wà.

Umàmàn wà tawhu izywyr wà. Uzemuakyr zawar ài wà.

15 Wata oho tawhu rupi zawar ài wà,

Wemi'u ràm hekar pà wà.

Uze'eg a'e wà, aze wanemi'u nuhyk kwaw wanupe.

16 Nezewe rehe we ihe azegar putar nekàgaw rehe ihe nehe.

Ku'em mehe amume'u putar nepuruamutar katu haw wahy haw rupi nehe,

Ta'e ereiko hemimaw romo ne xe.

Ma'erahy ipuraraw mehe apuner hezeàmimaw rehe nerehe ihe.

17 Amume'u putar nekatu haw ihe nehe, o Tupàn, herehe uzekaiw ma'e.

Ereiko hemimaw romo.

Ereiko Tupàn heamutar katu har romo.