1 O Tupàn, eretyryk urewi ne. Urereityk pe ne.

Erekwahy urewe a'e 'ar mehe.

Ko 'ar rehe erezur wi urewe.

2 Eremuryryryryz kar ywy ne, ipe'a pà ne.

Erewàpytym a'e ywykwar ne wà kury,

Ta'e uzekazeka iko a'e xe.

3 Erepuraraw kar ma'erahy tetea'u neremiaihu wanupe.

Eremur win urewe i'u kar pà urewe.

A'e rupi uruata kwerupi ureka'u pà ure.

4 Ereupir pànuhu nerer hereko har newi ukyze ma'e wanenataromo. — Peraha ko pànuhu zeàmàtyry'ymawhu pe nehe, ere wanupe.

Nezewe mehe upuner weitykaw wi uhemaw rehe wà.

5 Urepyro pe nekàgaw pupe nehe.

Erewazar newe ureze'eg ma'e henoz mehe nehe.

Nezewe mehe erepyro putar teko neremiamutar ne wà nehe.

6 Nezewe uze'eg Tupàn wàpuzuhu pupe a'e.

— Heàmàtyry'ymar waneityk mehe azaikaikaw putar Xikez tawhu ihe nehe. Azaikaikaw putar ywyàpyznaw Xukot her ma'e nehe no.

Amono putar ipehegwer izaikaikaw pyrer heremiaihu wanupe nehe.

7 Zireaz wiko hema'e romo a'e. Manaxe wiko hema'e romo a'e no.

Eparai nuzawy kwaw u'yw wi heàkàg imimaw.

Zuta nuzawy kwaw tuwihawete ipokokaw ihewe no.

8 Moaw wiko putar zapepo zàwenugar ài hezepuez taw ài nehe. Aityk putar hexapat Enom ywy rehe nehe no.

Nezewe teko ukwaw putar a'e ywy hema'e romo heko haw a'e wà nehe.

— Zazegar putar Tupàn heitykaw rehe nehe, i'i ru'u Piri ywy rehe har uzeupeupe wà.

Aipo uzegar putar azeharomoete hereitykaw imume'u pà wà nehe, i'i Tupàn.

9 O Tupàn. Mo hereraha putar tawhu pupe nehe, pàrirogaw aiha katu ma'e zauxiapekwer wanuwi purumimaw hereko har pupe nehe.

Mo hereraha putar Enom ywy rehe nehe.

10 Aipo eretyryk tuwe urewi.

Aipo nereho kwaw zauxiapekwer urerehe uzekaiw ma'e wainuromo nehe.

11 Urepytywà pe ureàmàtyry'ymar waneityk mehe nehe,

Ta'e teko nupuner kwaw urepytywàgatu haw rehe wà nehe xe.

12 Aze Tupàn wiko zanerehe we nehe, xityk putar zaneàmàtyry'ymar zane wà nehe.

Tupàn weityk putar zaneàmàtyry'ymar a'e wà nehe.