1 O Tupàn Tuweharupi Wiko Ma'e, hezar, hepyro har,

'aromo, pyhaw no, neruwarupi, ahapukaz hezemumikahy pà ihe.

2 Herenu pe newe heze'eg mehe nehe.

Ezeapyaka herehe hepytywà àwàm henozahy mehe nehe no.

3 Ta'e ma'erahy he'aromo u'ar ma'e kwer heta tetea'u a'e wà xe.

A'e rupi aiko hemàno haw huwake ihe kury.

4 Aiko teko umàno tària'i ma'e paw wazàwe ihe.

Hekàgaw paw uhem ihewi.

5 Hereityk umàno ma'e kwer wainuinuromo a'e wà.

Aiko zauxiapekwer umàno ma'e kwer tywypaw pe heityk pyrer wazàwe ihe.

Nereharaz amo teko wanuwi wanehe nezekaiw ire nepytu'u pà.

Aiko wazàwe ihe.

6 Hereityk pe umàno ma'e kwer wapyta haw pe ne. Ipytun a'e pe.

Ohoete ywykwar.

7 Nereikwahy haw ipuhuz katu herehe.

Ykotok yryhu pe har ài hezuhazuhaw a'e.

8 Eremunyryk kar hemyrypar ihewi ne wà.

Hemuro kar pe wanupe no.

Aiko imunehew pyrer uhemaw rehe upuner 'ym ma'e ài.

9 Apuraraw ma'erahy tetea'u ihe. Te, naexak katu kwaw ma'e ihe kury.

O Tupàn Tuweharupi Wiko Ma'e, 'ar nànàn aze'eg newe.

Aupir hepo newe heze'eg pà.

10 Aipo erezapo putar purumupytuhegatu kar haw umàno ma'e kwer wapyro pà nehe.

Aipo upu'àm putar nekatu haw imume'u pà wà nehe.

11 Aipo uze'eg nepuruamutar katu haw rehe umàno ma'e kwer wapyta haw pe wà.

Aipo a'e ma'e imumaw paw pe uze'eg puruwi netyryk 'ymaw rehe wà nehe.

12 Aipo teko wexak neremiapo kwer purumupytuhegatu kar haw ipytunahy mehe wà.

Aipo teko wexak putar puruwi netyryk 'ymaw ywy ma'e wi heharaz taw rehe wà nehe.

13 O Tupàn Tuweharupi Wiko Ma'e, aze'eg newe hepytywà àwàm henoz pà ihe.

Tuweharupi ku'em mehe aze'eg newe.

14 Màràzàwe tuwe hereityk pe ne.

Màràzàwe tuwe erezeàmim ihewi.

15 Hekwàkwàmo romo hereko mehe arer we apuraraw ma'erahy ihe. Màno haw huwake ata aha.

Hekene'o herehe nezepyk awer ipuhuz taw rehe.

16 Nekwahy haw u'ar herehe.

Wikwahy ma'e romo nereko haw u'ar he'ar romo. Heàmàtyry'ym awer iaiw ma'e hemumaw tària'i.

17 Umumaw 'ar katu heywyr umàmàn pà wà. Nuzawy kwaw àmàn ywy ipy kar wà.

Umàmàn heywyr paw rupi katete wà.

18 Eremunyryk kar hemyrypar ihewi ne wà. Utyryk heruwake wiko ma'e ihewi wà no.

Xo ipytunahy haw zo heta ihewe kury.