1 O Tupàn Tuweharupi Wiko Ma'e, tuweharupi azegar putar nepuruamutar katu haw rehe nehe.

Amume'u putar puruwi netyryk 'ymaw teko wanupe nehe no, wapurumuzàmuzàg wanupe nehe no.

2 Akwaw nepuruamutar katu haw ipaw pixik 'ym àwàm ihe.

Puruwi netyryk 'ymaw ikàg ywak ài.

3 Nezewe ereze'eg kwez ne. — Aexaexak heremiaihu Tawi ihe.

Azapokatu heze'egaw hehe we no.

Amume'u ko ma'e heremiapo ràm izupe.

4 — Tuweharupi amo nezuapyapyr wiko putar tuwihawete romo a'e wà nehe.

Azekaiw katu putar tuwihawete romo waneko haw rehe tuweharupi nehe, a'e newe kwehe mehe.

5 O Tupàn Tuweharupi Wiko Ma'e, ywak uzegar ikatuahy ma'e neremiapo kwer rehe a'e.

Nereko haw pe har uzemono'og ma'e kwer uzegar puruwi netyryk 'ymaw rehe wà no.

6 O Tuweharupi Wiko Ma'e, naheta kwaw amo nezàwenugar ywak rehe wà.

Ywak rehe har paw neawy a'e wà.

7 Nereko haw pe har nemuwete katu wà.

Neruwake har neywyr har paw ukyze tuwe newi wà.

8 O Tupàn Tuweharupi Wiko Ma'e Ikàg Wera'u Ma'e.

Ni amo na'ikàg kwaw ne ài wà.

Erezapo neremimume'u kwer upaw rupi, o Tupàn Tuweharupi Wiko Ma'e.

9 Ereiko yryhu ikàg ma'e izar romo.

Eremupytu'u kar ykotok uhua'u ma'e.

10 Erezuhaw àzàg Haw her ma'e izuka pà ne.

Nekàgaw uhua'u ma'e rupi ereityk neàmàtyry'ymar ne wà.

11 Ereiko ywak izar romo. Ywy izar romo ereiko no.

Erezapo ywy. Ywy rehe har paw erezapo ne wà no.

12 Erezapo ma'e kwarahy heixe haw awyze kutyr har paw rupi ne wà. Erezapo ma'e kwarahy ihemaw awyze kutyr har paw rupi ne wà no.

Tamor ywytyr a'e, Eremon ywytyr a'e no, umume'u nekatu haw urywete haw rupi a'e wà.

13 Erepuner azeharomoete ne.

Nekàgaw uhua'u tuwe no.

14 Nepureruze'eg mehe teko na'imunar kwaw ma'e rehe wà. Nahemu'em kwaw wà. Nekatu haw rupi erepureruze'eg iko ne.

Neretyryk kwaw puruwi. Ma'e paw iapo mehe erepuruamutar katu ne.

15 Hurywete teko zegar haw pupe nemuwete katu har wà. Hurywete nepyr wiko ma'e wà.

Nuzuawy kwaw tatainy rehe wiko ma'e wà.

16 'Ar katu umumaw nerehe urywete romo wà.

Umume'u nekatu haw wà, ta'e nekatuahy wanupe ne xe.

17 Ne, o Tupàn, ereiko urekàgaw ipuràg ma'e romo ne. Nekatu haw rupi ereityk kar urewe ne wà.

18 Erexarexak urerehe uzekaiw ma'e ne.

Ne, Tupàn, Izaew wazar ikatuahy ma'e ne,

Ne eremur ureruwihawete urewe ne.

19 Kwehe mehe aexak ma'e hepuahu pe har zàwenugar ihe.

Nezewe ereze'eg neremiruze'eg nerehe uzeruzar ire upytu'u 'ym ma'e wanupe.

— Apytywà amo zauxiapekwer ikwaw katu pyr ihe.

Amono pureruze'egaw awa teko wainuinuromo har ihe, heremixamixak kwer pe ihe.

20 Aexaexak heremiruze'eg Tawi penuwihawete romo ihe.

Azakook uri kawer ihewe imur katu pyrer hehe no, tuwihawete romo heko haw hexak kar pà purupe no.

21 Hekàgaw upyta putar hehe tuweharupi nehe.

Hepuner haw umukàg kar putar nehe.

22 Iàmàtyry'ymar nuweityk pixik kwaw wà nehe.

Ikatu 'ym ma'e nuweityk pixik kwaw wà nehe.

23 Amumamumaw putar iàmàtyry'ymar ihe wà nehe.

Azuka putar hehe iakatuwawahy 'ym ma'e ihe wà nehe no.

24 Natyryk pixik kwaw Tawi wi ihe nehe. Azamutar katu ihe nehe.

Wereko putar hekàgaw nehe, a'e rupi weityk putar wàmàtyry'ymar tuweharupi a'e wà nehe.

25 Amuhua'u putar ipureruze'egaw nehe.

Uzypyrog putar Mezitehàn yryhu pe. Oho putar Ewparat yrykawhu pe nehe.

26 A'e mehe uze'eg putar nezewe ihewe nehe.

— Ereiko heru romo. Hezar romo ereiko no.

Ereiko herehe uzekaiw ma'e romo. Itahu hemimaw zàwenugar romo ereiko no, i'i putar ihewe nehe.

27 Areko katu putar hera'yr ipy ài ihe nehe.

Amuigo kar putar amo tuwihawete paw wanuwi ikàg wera'u ma'e romo ihe nehe no.

28 Azamutar katu putar tuweharupi nehe.

Heze'eg izupe heremimume'u kwer nazuhaw pixik kwaw nehe.

29 Tuweharupi heta putar izuapyapyr izupe wà nehe.

Aze heta ywak nehe, amo izuapyapyr wiko putar tuwihawete romo wà nehe.

30 Aze izuapyapyr uzuhaw heze'eg wà nehe,

Aze nuiko kwaw heze'egaw rehe wà nehe,

31 aze nuzekaiw kwaw heremiapo putar haw rehe wà nehe,

Aze nomonokatu kwaw heremiapo karer wà nehe,

32 A'e mehe azepyk putar wanehe wanemiapo kwer ikatu 'ym ma'e rehe ihe nehe.

Apuraraw kar putar ma'erahy wanupe wanemiawy kwer hekuzaromo nehe.

33 Nezewe rehe we napytu'u kwaw Tawi iamutar katu re ihe nehe.

Azapo putar ma'e heze'eg izupe heremimume'u kwer rupi katete ihe nehe.

34 Nazuhaw kwaw heze'egaw hehe we heremiapo katu kwer nehe.

Azapo putar heremimume'u kwer tuweharupi nehe.

35 Xo pitài haw rupi amume'uahy ko ma'e ihe. Amume'uahy ko ma'e herer ikatuahy ma'e rehe.

Azapo putar a'e ma'e heze'eg awer rupi katete ihe nehe. — Naheremu'em pixik kwaw Tawi pe, a'e ihe.

36 Tuweharupi heta putar izuapyapyr izupe wà hehe.

Kwarahy ihyape mehe nehe, azekaiw katu putar izuapyapyr tuwihawete romo wiko ma'e wanehe ihe nehe.

37 Zahy upyta ywak rehe a'e. Nuzawy kwaw ywy rehe uzeapo ma'e hexakar a'e. Nezewegatete Tawi ipureruze'egaw nupaw kwaw a'e nehe no.

Zahy ywak rehe har nuzuawy kwaw ko heze'eg henu katu har a'e.

38 Erekwahy tuwihawete neremixak kwer pe ne.

Eretyryk izuwi Nerezekaiw kwaw hehe.

39 Erezuhaw neze'egaw neremiruze'eg rehe we neremiapo katu kwer.

Ereityk iàkà rehe har tuwihawete romo hexakar haw ywy rehe.

40 Ereityk pàrirogawhu tawhu neremimonokatu kwer izywyr har.

Erezuhazuhaw tàpuztàtà a'e pe har wà no.

41 A'e pe ukwaw ma'e imunar ma'e a'e tawhu pe har nànàn wà.

Teko a'e tawhu huwake wiko ma'e uze'eg urywahyahy hehe wà.

42 Ereityk kar tawhu waàmàtyry'ymar wanupe.

Eremurywete kar heityk arer ne wà.

43 Eremuaiw tuwihawete ikàgaw.

Ereityk kar zauxiapekwer wanupe zeàmàtyry'ymawhu pe.

44 Erezo'ok ipuner haw tuwihawete wi.

Ereityk henaw no.

45 Eremutua'uhez i'ar 'ym mehe we.

Erezapo heko haw maranugarahy haw romo.

46 Màràn 'ar eremumaw putar nezeàmim pà nehe, o Tupàn Tuweharupi Wiko Ma'e.

Aipo tuweharupi ereiko putar urewi utyryk ma'e romo nehe.

Màràn 'ar nekwahy haw umumaw putar tata ài ukaz pà nehe.

47 Nema'enukwaw hereko haw rehe nehe. Iaikwera'i a'e.

Teko neremiapo kwer paw umàno putar amo 'ar mehe wà nehe. Nema'enukwaw wamàno àwàm rehe nehe.

48 Mo wikuwe putar tuweharupi nehe.

Mo uhem putar umàno haw wi nehe. Mo upuner utym àwàm wi uhemaw rehe nehe.

49 O hezar, kwehe mehe erezapo ma'e ureamutar katu haw hexak kar pà urewe ne. Màràzàwe tuwe nerezapo kwaw agwer ma'e urewe kury.

Kwehe mehe eremume'u neremiapo ràm Tawi pe. Màràzàwe tuwe neremume'u kwaw neremiapo ràm urewe kury.

50 Heàmàtyry'ymar uze'eg zemueteahy waiko herehe wà. Aiko neremiruze'eg romo.

Nema'enukwaw herehe waze'egaw rehe nehe. Nerehe uzeruzar 'ym ma'e uzapo ikatu 'ym ma'e tetea'u ihewe wà.

51 O Tupàn Tuweharupi Wiko Ma'e, neàmàtyry'ymar uze'eg zemueteahy tuwe tuwihawete neremixak kwer rehe wà.

Wyzài taw pe iho mehe uze'eg zemueteahy hehe wà.

52 Ximume'u Tupàn Tuweharupi Wiko Ma'e ikatu haw tuweharupi nehe.

Azeharomoete. Azeharomoete.