1 Urezar, tuweharupi ereiko uremimaw romo ne.

2 Ywytyr iapo 'ym mehe we, ywy ywak iapo pà nezypyrog 'ym mehe we, ereiko Tupàn romo tuweharupi ne.

Nerezypyrog kwaw Tupàn romo nereko pà.

Nupaw pixik kwaw Tupàn romo nereko haw nehe. Tuweharupi ereiko Tupàn romo.

3 Ereze'eg nezewe teko neremiapo kwer wanupe.

— Peiko wi izypy mehe arer zàwenugar romo nehe, ere wanupe.

Eremuigo kar wi ywyku'i romo ne wà.

4 1.000 kwarahy nuzawy kwaw pitài 'ar newe.

Nuzawy kwaw 'ar karumehe arer. Upaw a'e 'ar.

1.000 kwarahy nuzawy kwaw pitài or pyhaw har. Na'arewahy upaw.

5 Eremumaw teko waneko haw ne wà.

Nuzuawy kwaw awa ipuahu haw. Na'arewahy upaw.

Waneko haw nuzawy kwaw ka'a ku'em mehe hezuz ma'e.

6 Itua'u. Iputyr kury.

Karuk mehe uxinig umàno pà.

7 Uremumaw pe nekwahy haw pupe ne.

Nekwahy haw uremukyze kar.

8 Eremuapyk urekatu 'ymaw nezenataromo hexak pà ne.

Ereme'egatu ureremiapo kwer ikatu 'ym ma'e imim pyrer rehe neratainy pupe.

9 Erekwahy. A'e rupi eremumaw ure 'ar na'arewahy.

Urereko haw upaw pytuhemaw ài.

10 Xo 70 kwarahy ru'u zo urumumaw uruiko pà.

Ikàg wera'u ma'e uhem 80 kwarahy pe wà.

A'e kwarahy werur xo urekene'o haw zo urewe. Xo ma'erahy ipuraraw paw zo werur urewe.

Na'iàrew kwaw urereko haw iahykaw. Na'e urukàzym.

11 Mo ukwaw nekwahy haw ikàgaw uhua'u haw wà. Nekwahy haw umukyze kar teko wà.

Mo ukwaw a'e newi wakyze haw wà.

12 Uremu'e pe nehe. Nezewe mehe urukwaw putar ure'ar heta tetea'u 'ymaw ure nehe.

Nezewe mehe urepy'a ukwaw katu putar ma'e nehe.

13 Eme'e wi urerehe, o Tupàn Tuweharupi Wiko Ma'e.

Màràn mehe erepytu'u putar urewe nekwahy re nehe.

Epuhareko neremiruze'eg ne wà nehe.

14 Ku'em mehe eremur ureamutar katu haw urewe temi'u ài nehe, te uhyk putar urewe nehe.

Nezewe mehe uruzegar putar urereko mehe tuweharupi nehe.

Urerurywete putar ure'ar nànàn nehe no.

15 Amo 'ar mehe uremuzemumikahy kar pe ne.

A'e 'ar mehe urupuraraw ma'erahy tetea'u.

Nezewegatete uremurywete kar tuwe pe ko 'ar rehe nehe kury.

16 Tuwe neremiruze'eg wexak ma'e neremiapo uhua'u ma'e wà nehe.

Tuwe urezuapyapyr wexak nepuner haw ikatuahy ma'e wà nehe no.

17 O Tupàn urezar, ezakook neze'egatu urerehe nehe.

Emukatu ureremiapo ràm paw rupi nehe.

Azeharomoete, ezapokatu ureremiapo ràm paw rupi nehe.