1 Pemuzàg amo zegar haw ipyahu ma'e Tupàn Tuweharupi Wiko Ma'e pe nehe,

Ta'e uzapo ikatuahy ma'e a'e xe.

Weityk wàmàtyry'ymar paw

Ukàgaw rupi upuner haw ikatu ma'e rupi a'e wà.

2 Tupàn Tuweharupi Wiko Ma'e umume'u wàmàtyry'ymar waneityk awer. Upuner teko wapyro haw rehe a'e.

Ukwaw kar upuner haw teko ywy nànànar wanupe.

3 Upuruamutar katu a'e. Nutyryk kwaw wemiaihu wanuwi.

A'e rupi uzapo ma'e uze'eg Izaew wanupe imume'u pyrer rupi katete a'e.

Te ywy muite wera'u ma'e rehe har wexak Tupàn Zanezar wàmàtyry'ymar waneityk awer wà.

4 Pezegar Tupàn Tuweharupi Wiko Ma'e pe penurywete haw rupi nehe, teko ywy nànànar wà.

Pemume'u Tupàn Tuweharupi Wiko Ma'e ikatu haw nehe, zegar haw wamuzàg pà nehe, penurywete haw rupi penehapukaz pà nehe.

5 Pemuzàg zegar haw Tupàn Tuweharupi Wiko Ma'e ikatu haw rehe har nehe, wioràwiràn imupu pà nehe.

Pemupu wioràwiràn irir her ma'e pezegar mehe nehe.

6 Pexi'àm pezupy nehe. Pezupy tapi'ak i'ak kwer xi'àm romo iapo pyrer nehe.

Pezegar penurywete haw rupi Tupàn Tuweharupi Wiko Ma'e Zaneruwihawete henataromo nehe.

7 Eànoànog nehe, yryhu. Pekororo nehe, yryhu pupe har paw wà.

Ezegar nehe, ywy. Pezegar nehe, ywy rehe har paw wà.

8 Pezepopetepetek nehe, yrykawhu.

Ywytyr, pezegar penurywete haw rupi Tupàn Tuweharupi Wiko Ma'e henataromo nehe,

9 Ta'e ur putar ywy rehe har waneruze'eg pà a'e nehe xe.

Weruze'eg putar ywy nànànar ukatu haw rupi nehe.

Waneruze'egaw ikatuahy putar nehe.