1 Tupàn Tuweharupi Wiko Ma'e wiko tuwihawete romo a'e.

Teko uryryryryz wà.

Wapyk wenaw kerumin wa'aromo har rehe.

Ywy uryryryryz.

2 Tupàn Tuweharupi Wiko Ma'e ikàg Zeruzarez tawhu pupe.

Weruze'eg teko ywy nànànar wanereko wà.

3 Tuwe teko paw umume'u ikatu haw nehe, ta'e uhua'u a'e xe.

Her purumukyze kar har rehe uze'eg putar wà nehe.

Tupàn Tuweharupi Wiko Ma'e wiko imonokatu pyrer romo a'e.

4 O tuwihawete ikàg ma'e, erezamutar katu ikatu haw ne.

Eremur nekatu haw Izaew wanupe.

Ereruze'egatu kar teko tuwihaw wanupe ne wà. Neremu'emu'em kar kwaw a'e tuwihaw ne wà. Neremumunar kar kwaw ne wà no.

5 Pemume'u Tuweharupi Wiko Ma'e Zanezar ikatu haw nehe.

Peapyk pepenàràg rehe henaw henataromo nehe,

Ta'e imonokatu pyrer romo hekon a'e xe.

6 Moizez wiko xaxeto romo Tupàn henataromo Àràw rehe we a'e.

Xamuew umuwete katu Tupàn a'e no.

Uze'eg Tupàn Tuweharupi Wiko Ma'e pe wà. Uwazar waze'eg wanupe a'e.

7 Ywàkun upu'àm ma'e pupe wiko mehe uze'eg Izaew wanupe kwehe mehe.

Izaew weruzar ize'eg wà. Weruzar hemiapo putar haw wà. A'e 'ym mehe Tupàn omono a'e ze'eg Izaew wanupe.

8 O Tuweharupi Wiko Ma'e urezar. Erewazar neremiaihu waze'eg wanupe.

Teko wanemiapo kwer ikatu 'ym ma'e imunànar romo nereko haw erexak kar purupe.

Erexak kar teko wanehe nezepykaw wanemiapo kwer ikatu 'ym ma'e hekuzaromo no.

9 Pemume'u Tupàn Tuweharupi Wiko Ma'e Zanezar ikatu haw nehe.

Pemuwete katu henaw ywytyr imonokatu pyrer rehe har huwake nehe no,

Ta'e Tupàn Tuweharupi Wiko Ma'e, Zanezar, imonokatu pyrer romo hekon a'e xe.