6
Suŋuuŋ to tamtoghon to moroghooŋ tiina ighami
Mbouŋ to David
Ŋgeu to imuuŋ pa mbouŋ, irau isaav pa tamtoghon pa tirab gita ve timbou mbouŋ tonene
1 O Yoova, uyaan ghou toman atem yabyab malep.
Ve ighaze ughur pataŋani iŋarua ghou pa upasaluŋgan ghou, ughami toman atem yabyab kat malep. Mbo 38:1
2 Yoova, you mbesooŋa tiom. Lolom isamin ghou ve uul ghou lak! Pasa, tapirig isob wa.
O Maaron, ugham ghou tinig poia. Pasa, tuag tisob tiyabyab.
3 Yoova, lolog ipataŋan kat.
Pale upul ghou tovene ila ila le ŋeez o isob?
4 Yoova, lolom ineep tuŋia ila to tamtoghon tiom ve uluul di.
Tovenen matam iŋgal ghou muul, ve upas ghou navot pa pataŋani tonene.
Ugham mulin ghou lak.
5 Pasa, mateeŋa irau matadi iŋgal ghom muul maau.
6 You nayakyak le tapirig isob.
Mboŋ to naol ne, nataŋtaŋ le matag suru ipot ila moogh tiou.
7 Lolog ipataŋan kat ve nataŋ tiina le matag isarsar.
Pasa, koiagŋa katindi.
8 Yam ndiran to aghamgham ŋgar samsamia, asob aghau payou!
Pasa taŋiiz tiou, Yoova ilooŋa wa.
9 You nataŋ roran Yoova pa ulaaŋ, ve ilooŋ suŋuuŋ tiou.
Ghasoniiŋ tiou, ye pale iyok pani.
10 Pale igham koiagŋa tisob timatughez tiina ve mayadi.
Yes pale tiwaghamgham, ve titoor di rikia moghon, ve titud moghon ve tila.