LLUK
Temani-Kaiéle LLUK-ni Turum Bukele
Buk Ilinga Ung-Pulu Mare
Ung-pulu mare ilinga buk-gomú 1 molemú. Yi LLuk yu dokta yi te mulurum (Kollosi 4:14). ‘Yunu Juda-yi te mólunje. Juda-yambumanga ulsukundu yi ténje.’ niku piliilimili. Yu Poll-kene wasie anduringli (Liipa Mundurum Yima 16:10-17, 20:5-15, Timoti Aelepale 4:11, Pillimon 24).
LLuk yunu-ni “Buk ili tokur.” nimba para sipa naa turum akiliinga-pe yu-ni Liipa Mundurum Yimanga bukele sika turum lem ya Temani-Kaiéle kepe yunu-ni sika turumko. LLuk 1:3-4 kene Liipa Mundurum Yima 1:1-2 kene molemú ung mare aima tilu-sipa mele. Matyu, Mak, LLuk, Jon kene, enini buk turingmanga LLuk-ni turum bukele kamu sulu. Temani mare Matyu, Mak, Jon yi kanuma-ni naa turing temani mare yunu-ni turum.
‘Oliu mana-yambuma tepa liipa, Pulu Yili liipu bulu sipu ulu-pulu-kis telemuláliinga mindili nomulú kupulanum-na molemuláliinga wendu liipa, Pulu Yili yi nuim kingele molupa yambuma nokupa konjulimú yambu-talapena sukundu pupu molomulú ulu-pulele liamili.’ nimba Yesos oliu tepa liipa oliunga nimba alko topa kulunjurum mele ‘Aima piliipu konjamili.’ nimba LLuk-ni buk ili turum.
LLuk-ni piliipa kene buk ili turum ung-pengéle mele 19:10 molemú (buk ambulkunaliinga alsena “21. kisim bek 21.2.”). Yesos-ni yunu “Yambumanga nimbu kolunjambu tangi.” nimba taki-taki numanale-ni kimbu-sipa mulurum ung tondulu te 9:51 molemú (Jon 3:14-18).
Ung te kamu piliani. Yi tale mola yupuku mola angere-ni ung tiluele mola temani tiluele bukna turing akiliinga-pe wale pulele laye-kolte lupa-lupa turing. Temani te mola ung te ‘aima mimi-sipu piliambu.’ niku kene bukmanga lupa-lupa molemú mele kanuku kene buk gomúma wendu liiku pali mimi-siku kanui. I-sipa mele: Mak 1:12-13 gar-sipale, Matyu 4:1-11 kene LLuk 4:1-13 kene sulu tepale. Temani kanili Matyu LLuk-seleni tilu-siku mele bukna turingli molemú, akiliinga-pe angkellama uring mele Matyu-ni mindi turum (4:11), Seten-ni “Walse kelepu ombú.” nirim ungele LLuk-ni mindi turum (4:13). Ung te LLuk 11:13 molemú akili Matyu 7:11 naa molemú. LLuk 22:62 Pita kola tirim temanele Matyu Mak-selenga molemúko akiliinga-pe Jon 18:27 naa molemú.
Ya ung-pulele pora nikem.
1
1:1-4 LLuk-ni Yesos-nga Temanele Koela Pulu Monjupa Tombandu Ui-Pulu-Pulu Buk Turum Temanele
1-2 Yi aima auli Tiopillas, oliu molemulu koleana Yesos-kene ulu wendu urum-ma pulu monjupa wendu urum kene kanuku, yandupa wendu urum-ma kanulsiliiku anduku muluring yambuma-ni penga oliu temani toku siring mele, temani akili ‘Sika’ nimbu tondulu mundupu piliilimulu kanili yambu pulele-ni ‘Temani akili bukna kamu mulupili tamili.’ niku buk turing.
3-4 Akiliinga, na-ni kepe pe kelepu ‘ ‘Temaneliinga pulele aima piliipu konjambu.’ nimbu ui-pulu-pulu wendu urum mele kepe yandupa ulu lupa-lupama wendu urum mele kepe akuma pali walsipu piliipu konjupu mulurundu-na na-ni ‘Ulu akumandu yambu mare-ni Tiopillas nundu temani toku ung-bo tonjilimele mele aku-sipa wendu urum uluma nu piliani.’ nimbu, ‘Na-ni nundu ulumanga pali aima sika wendu urum mele temani topu nimbu sambu.’ nimbu, buk te topu nu simbu kene kapula.’ nimbu piliipu kene temani akili topu buk ili tokur.
1:5—2:52 Illisapet-ni No-Liinjili Jon Mirim Mele Kene Maria-ni Yesos Mirim Mele Temanema
1:5-25 Mulú-Koleana Angkella Te-ni No-Liinjili Jon Mingí Mele Kene Molupa Temba Mele Nimba Sirim Temanele
5 Yi Nuim King Erot kolea Judia nokupa mulurum kene Pulu Yili popu tunjurum yi te mulurum, yunga bili Sekaraya.
Pulu Yili popu tunjuring yambumanga talape tenga bi Apaya, Sekaraya yu talape kaniliinga yi te. Sekaraya min ambu Illisapet Pulu Yili popu tunjuring yimanga talape tenga ambu te. Elsengla wasie kumbi-lepa anda-kolepale Pulu Yili popu tunjuring yimanga kumbi-lepa yi nuim auli Eron. 6 Ambu-yi akusele muluringli mele Pulu Yili-ni kanupa ‘Yambu sumbi nili-sele.’ nimba kanurum. Elsele-ni yunga ung-manima kene “Yambuma teai.” nirim mele ungma pali piliiku liiku teku konjuku muluringli. 7 Akiliinga-pe Illisapet we wangnu pirim, kangambula te naa miringli. Elsele we ambu-anda liringli.
8-9 Walse Sekaraya-nga talapele-ni Pulu Yili popu toku kaluring kongunale tinjiring kene yunu kepe wasie Pulu Yili-nga kumbi-kerina kongun kanili tinjiring. Aku tenjiku molku kene, Pulu Yili popu tunjuring yima-ni tiring mele tingíndu eninga talapena yi te Pulu Yili popu toku kaluring lku-temboll akiliinga suluminana sukundu ‘Nae pupa mura tolemú paura-kikuele yambumanga ninjipa kalonjumbanje piliamili.’ niku ku-kas tiring. Aku-siku teku kene ‘Sekaraya yu kongun kanili tenjimba.’ niku piliiringeliinga yu lku-temboll suluminana sukundu pupa mura tuli paura-kikuele kalunju-purum. 10 Akili tepa angiliirim kene lku-tembolluna we-yambuma máku toku Pulu Yili popu turing koleana yambu pulele Pulu Yili-kene popu toku ung niku muluring.
11 ⸤Sekaraya mura tuli paura-kikuele kalunjupa angiliirim kene⸥ paura-kiku kanili kalunju-pui-upui tiring polaliinga ki-bokundu Auliele-nga angkella te omba mokeringa angiliirim kanurum. 12 Akili kanupa kene pung-pungu nimba mundu-mong auli-tepa tirim.
13 Kanu-kene angkellale-ni yundu nimba mele: “Sekaraya, mundu-mong naa ti.” nirim. “Nu Pulu Yili-kene popu tokunu mawa tellu mele kanili Pulu Yili yu-ni piliirim. Nunga ambale kang te membá. Yunga bili “Jon” niku niani. 14 Yu molumbáliinga nu numanu lakuku sikunu kamele akuku muluni. Yu minglí kene yambu pulele-ni numanu singí. 15 Auliele-ni yu kanupa yi-auli kaiéle nimba piliimba. No-waen kepe no-tonduluma kepe aima naa nupili. Anumunga oluna we sukundu mulupili Pulu Yili-nga Mini Kake Tiliele-ni omba yunga numanuna molupa kapula tenjimba.
16 “Jon-ni tembaliinga Isrel-yambuma-ni eninga Auli Pulu Yili liiku bulu siring yambumanga pulele-ni alsuku numanu topele toku Auli Pulu Yili kene wasie alsuku ung piliiku kapula-kapula mulungí. 17 ⸤Pulu Yili-ni “Ninjui!” nimba ung nimba sirimuma piliipa yambuma nimba sirim yi⸥ Illaija tondulu pípili uluma tepa mulurum mele Jon yu aku-sipa tondulu pípili uluma tepa molumba. Aku-sipa tondulu pípili uluma tepa molumbáliinga lapalii-ni numanu topele toku kangambulama alsuku numanu munjungíko; Pulu Yili-nga ung-manima liiku su silimele yambuma-ni numanu topele toku, numanu sumbi-nili yambuma-ni telemele mele ‘Aku-sipu teamili.’ niku mulungíko; Jon yu-ni tembaliinga Auliele ombá kene Auliele yunga ungele sumbi-siku piliiku liingí yambu-talape te mulungíko.” nimba angkellale-ni Sekaraya-ndu nirim.
18 Aku-sipa nirim-na piliipa kene Sekaraya-ni angkellalendu walsipa kene nimba mele: “Nikinu akili nambi-sipu na-ni ‘Sika nikinu.’ nimbu piliimbuye?” nirim. “Na anda lepu nanga ambale ambú lirim kanili. Pe nikinu ili nambi-tepa wendu ombálendu nikinuye?” nirim.
19 Angkellale-ni pundu topa kene nimba mele: “Nanga bili Gepriel. Na Pulu Yili-nga kumbi-kerina angiliu. Ya ekupu nundu niker akili mele Pulu Yili-ni “Aku-sikunu ni-pui.” nimba liipa mundumu-na nundu ombu temani-kaí ili topu siker. 20 Akiliinga-pe na-ni “Kang minglí.” nikerele ‘Gólu tokumnje?’ niku piliikunu akiliinga ulu ili ui wendu naa upili nu ung naa niku muluni. Penga “Wendu ombá.” niker akili mele ambuma kangambula oluna monjuku kene melemelemanga kaliimbuma omba pulimú mele aku-sipa kaliimbuma omba pumba kene niker ung ili aima sika wendu ombá.” nirim.
21 Aku-siku ung niku angiliangli Sekaraya lku-temboll suluminana sukundu sulu-tepa pupa molupa, wela wendu naa urum kilia yambuma-ni lku-tembolluna ulsukundu yu nokuku muluringima numanu pulele liiku munduring. 22 Kanu-kene yu wendu omba kene ung te kerina manda naa nimba kili-ni mindi manda lepa angiliirim kanuku kene, ‘Sekaraya yu suluminana sukundu molupa kene kalkale kanúmu-na omba angiliili mele te kumbi-kerale liipa pinjim-na kanum.’ niku piliiring.
23 Penga lku-tembolluna yunga kongun enama pora nirim kene yu lkundu purum. 24 Lkundu pupa ⸤ambu Illisapet-kene pekulu muluringli kene⸥ penga Illisapet kangambula munjurum. Monjupa kene kaliimbu angere te-guli ‘Yambuma-ni yu naa kanangi.’ nimba mo topa mulurum. 25 Yu-ni nimba mele: “Ekupu na-kene ulu tekemale Auliele-ni nanga nimba tenjikem. Nanga kangambula te naa mirindeliinga yambuma-ni na kanuku kis piliiring kene pipili kulurundeliinga Auliele yu-ni na kondu kulum lem.” nirim.
1:26-38 Mulú-Koleana Angkella Te-ni Maria-ni Yesos Membá Mele Nirim Temanele
26 ⸤Illisapet kangambula munjupili kaliimbu angere te-guli kolupa⸥ angere tale-guli sipale ke topa pirim kene Pulu Yili-ni mulú-koleana angkella Gepriel kolea Gallalli distrik Nasaret taon-na liipa mundurum. 27 Kanuna ambu-wenipu te, yi te-kene ui naa pili we mulurum ambu-wenipale mulurumna liipa mundurum. Ambu-wenipu kanili yunga pulu lirim yambuma-ni ‘Yu yi te pupili.’ niku alá sinjiring yilinga bili Josep. Yi kanili yunga anda-kolepa yi te ⸤yi nuim king⸥ Depit. Ambu-wenipaliinga bili Maria.
28 Maria mulurumna angkella Gepriel omba kene yundu nimba mele: “Ambale, nu mulununa na okur. Pulu Yili-ni nu aima kanupa kaí piliipa tepa kaí monjukum. Auliele nu-kene wasie tapú-toku molembele.” nirim. 29 Akiliinga-pe ung kanili piliipa kene yu numanu pulele liipa mundupa kene, ‘Apa! Nikem ili nambulka ung te nimba nikem-nje?’ nimba piliirim.
30 Angkellale-ni yunundu nimba mele: “Maria, Pulu Yili-ni nu kanupa kaí piliikemeliinga mundu-mong naa ti. 31 Piliiyo. Nu penga kang te monjukunu minéle. Mekunu kene yunga bili “Yesos” niku sani. 32 Yu yi-nuim molumba, yunga bi leku ‘Aima Olandupa Molemáliinga Málale.’ ningíko; Auli Pulu Yili-ni ‘Yunga anda-kolepa Depit Isrel-yambumanga yi nuim king tondulale mulurum mele yu aku-sipa mulupili.’ nimbáko. 33 Eninga anda-kolepa Jekop-ni kalupa liirim yambuma yu-ni kam-kamu nokumbako. Yu yi nuim king auliele molupa mindi pupili.” nirim.
34 Maria-ni angkellalendu nimba mele: “Nikinu ulu ili nambi-sipa tembalendu nikinuye? Na yi te naa purundu kanili.” nirim.
35 Angkellale-ni yundu nimba mele: “Nu mulunina Aima Olandupa Yili-nga Mini Kake Tiliele omba nunga oluna kang te monjunjumba. Aku temba akiliinga kang nu-ni minéle yu kang kake tiliele molumba; yunga bili leku kene ‘Pulu Yili-nga Málale’ ningíko. 36 ⸤Pulu Yili-ni nu-kene “Tembu.” nikem akili mele sika temba. Ulu-tondulu te “Tembu.” nimba kene tirim mele niambu.⸥ Nunga pulu lelemú ambu Illisapet-ndu “Ambu wangnu píliele.” nilimele akiliinga-pe ekupu yu ámbu-ambú lipili kaliimbu angere te-guli kolupa angere tale-guli-sipale ke topa angiliipili yu kang monjukum kanili. 37 Pulu Yili-ni ulu kapula naa temba ulu te aima naa pelemú. Yu-ni uluma pali kapula telemú kanili.” nirim.
38 ⸤Angkellale-ni yundu aku-sipa nirim-na piliipa kene⸥ Maria-ni nimba mele: “Na Auliele-nga kongun kendemande ambale moliu. Nu-ni nikinu akili mele Pulu Yili yu-ni na-kene aku-sipa tipili.” nirim.
Kanu-kene angkellale-ni Maria mundupa kelepa yu purum.
1:39-45 Maria Yunga Pulu Lirim Ambu Illisapet Pupa Kanu-Purum Temanele
39 ⸤Mulú-koleana angkellale-ni Maria-ndu ung nimba pora sipa kene kelepa purum kene⸥ penga Maria kolea Judia distrik pupa ma-pangi tenga olakundu taon te lirimna purum. 40 Pupa akuna yi Sekaraya-nga lkuna lkundu pupa kene ambu Illisapet kanupa “Na okur.” nirim kene kangulkulu ⸤numanu siringli⸥.
41 Illisapet-ni Maria-nga ungele piliirim kene Illisapet yunga oluna kangambulale puka topa ola-mania tirim piliirim. Kanu-kene Pulu Yili-nga Mini Kake Tiliele Illisapet-nga numanuna omba molupa kapula tirim kene “I-sikunu i-sikunu ni.” nirim akili 42 Illisapet-ni ung tondulu nimba kene nimba mele:
“Ambu molemelemanga pali nu maluya. Ambumanga pali Pulu Yili-ni nu olandupa tepa kaí munjurum. Kangambula nu monjullale kepe yu-ni tepa kaíko monjumba. 43 Na ambu kis te mulunduna nanga Auliele-nga anumele nu úneliinga na numanu pulele liipu mundukur. Tinu akiliinga na-kene teku kaí monjukunu. 44 Nu oku kene “Na okur.” níneliinga kumele-ni piliindu kene nanga oluna mulúm kangambulale aima numanu sipa puka topa ola-mania tímu. 45 Auliele-ni nundu nirim mele ungele piliikunu kene ‘Sika nikem. Yu-ni “Tembu.” nikem akili mele sika aku temba.’ niku tondulu mundukunu piliirineliinga yu-ni nu tepa kaí monjukum akili mele akiliinga nu numanu sikunu molani.” nirim.
1:46-56 Pulu Yili-ni “Enini Nokupa Konjumba Yi Te Liipu Mundumbu.” Nimba Makó Turum Yi-Nuim Kraisele Maria-ni Membá Mele Piliipa Kene Konana Nimba Pulu Yili Kape Nirim Temanele
46-47 Illisapet-ni nimba pora sirim kene Maria-ni nimba mele:
“Pulu Yili na Tepa Liipa, Mindili Nombu
Molupu Kis-Siliu Kupulanum-na Wendu Liipa,
Kapula Molupu Konjumbu Kupulanum-na
Liipa Monjumba Yili kene
na numanu aima lakupu sikereliinga
nanga numanale-ni
Auliele kape nimba bi paka tonjukumu.
48 Pulu Yili yu-ni na yunga we-kendemande-ambu kisele
mundupa naa kelepa numanu liipa mundurumeliinga
nanga numanale-ni aku-sipa yu kape nikem.
Yambuma-ni penga-penga kepe kalku liingí yambuma-ni
nandu “Pulu Yili-ni nu tepa kaí monjukum.
Nu maluya.” ningí.
49 Tondulu Pulieli-ni na ulu-tonduluma tinjirimeliinga
nandu aku-siku ningí.
Tondulu Puliele yu yi kake tiliele.
50 Yu-kene mundu-mong teku ung piliiku liilimele yambuma
yu-ni kondu kolupa molemú.
Enini penga-penga kepe kalku liingíma kepe
kondu kolupa molupa mindi pumba.
51 Yu-ni yunu ulu-tonduluma tirim.
Yambu kara puku eninga numanuna
enini kape niku molemele yambuma
yu-ni topa makurupa bulu-bale silimú.
52 Yambuma nuim molku koleama nokuku molemelema
yu-ni topa mania mundupa,
yambuma eninga bima
eni-enini toku mania mundulimelema
yu-ni eninga bima paka tonjulemú.
53 Engle-ni kolemele yambuma yu-ni
‘Olu tipili.’ nimba langi kaíma sipa,
yambu kamakoma mélema kepe naa sipa
“We pai.” nimba makorolemú.
54-55 Yu-ni oliunga kumbi-lepa anda-kolepalimandu
“Tembu.” nimba, nimba panjurum ungele
apera naa sipa piliipa molupa kene,
⸤anda-kolepa⸥ Eprayam kene, Eprayam yu-ni
yandupa-yandupa kalupa liirim yambuma kene,
eninindu “Tembu.” nimba,
nimba panjurum akili mele tembandu
oliu Pulu Yili yunga kendemande
Isrel-yambu molemulu akuma
yu-ni kondu kolupa liipa tapunjumba tepa molemú.”
nirim.
56 Maria yu Illisapet kene wasie molangli kaliimbu yupuku omba purum kanu-kene penga Maria yu yunga lku-koleandu kelepa purum.
1:57-66 Illisapet-ni Kang Jon Mirim Temanele
57 Illisapet kangambula membá enale wendu urum kene yu-ni kang te mirim. 58 Yunga lku-keri-kupu yambuma kene yunga pulu lirim yambuma kene Auliele-ni yu kondu lakupa kulurum mele piliiku kene enini yu-kene wasie numanu siku muluring.
59 Ena angere yupuku-guli kangale memba nosupa mulurum kene ena engkaki-sipaliinga yambuma sukundu-sukundu oku máku toku kene yunga kangi te kopsiku poku teku wendu liiku munduku kene, yunga bili yunga lapanga bili manda leku “ ‘Sekaraya’ niamili.” niring 60 akiliinga-pe kangalenga anumu-ni “Mólu.” nimba kene “Yunga bili ‘Jon’ nimulú.” nirim.
61 Enini yundu niku mele: “Elsengla pulu lelemú yambu tenga bili aku-sipa naa molemú.” niring.
62 Kanu-kene yambuma-ni niku mele: “lápale-ni nambulka nimba piliikemunje, yunga bili lepa nae nimbánje, walsipu piliamili.” niku lapandu kili-ni manda leku niring kene 63 yu-ni pundu topa kili-ni manda lepa kene “Buk te sai.” nimba kene, yu-ni bukna bi topa kene nimba mele: “Yunga bili Jon.” nirim. Akili kanuku kene yambuma-ni aima numanu pulele piliiring. 64 Kanu-kene walsekale Sekaraya yunga kerina kelepa ung nimba kene Pulu Yili kape nirim.
65 Aku-sipa tirim-na kanuku kene yunga lku-keri-kupu yambuma-ni aima mini-wale munduring. Kolea Judia distrik sukundu ma-pangimanga kolea lirimumanga pali temani akili mindi tolsiliiku puring. 66 Ulu akili piliiring kene yambuma-ni pali numanu liiku munduku kene niku mele: “Ulu akili we naa telemú. Auliele kang ili-kene molumbáliinga ulu akili tekem lem.” niku piliiku kene “Kang ili penga nambi-sipa molumbanje?” niring.
1:67-80 Sekaraya-ni Nirim Konanale
67 Mini Kake Tiliele Jon-lapa Sekaraya-nga numanuna omba molupa kapula tirim kene Pulu Yili-ni penga wendu ombá mele “Nikunu si.” nimba yundu nimba sirim ung te piliipa kene, Sekaraya yu-ni yambuma nimba sipa nimba mele:
68 “Auliele, Isrel-yambumanga Pulu Yili,
yu kape nimbu bi paka tunjamili.
Yu omba yunga yambuma tepa liipa
buni te-ni enini ambulurumeliinga
mindili noku muluring buni kanuna
wendu líímeliinga piliipu kene
yu kape nimbu bi paka tunjamili.
69 Pulu Yili-ni yunga kendemande ⸤yi nuim king⸥ Depit-ni
kalupa liirim yambumanga yi tondulu pili te
oliu ‘Tepa liipa mindili nombu
molupu kis-silimulu kupulanum-na wendu liipa,
kapula molupu konjumulú kupulanum-na
liipa munjupili.’ nimba símu.
70 (Yu-ni “Ninjai!” nimba ung nimba sirimuma
piliiku yandu niku siring yima-ni
penga tembalendu kórunga-ui niku mele:)
71 “Yu-ni oliu tepa liipa
oliunga ele-túma topa makurunjupa,
oliu kanuku kis piliiku mindili silimele yambuma
‘Aku-siku naa teangi.
Wendu oku kapula molangi.’ nimba
aku-siku telemele kupulanum-na wendu liimba.”
niring mele ekupu aku temba tekem.
72-73 Oliunga anda-kolepalima kondu kolupa,
oliunga kumbi-lepa anda-kolepa Eprayam-kene
“Tembu.” nimba, nimba panjipa mi lirim mele
“apera naa sipu, nirindu mele teambu.” nimba kene
aku temba tekem.
74-75 ‘Mundu-mong naa teku,
nanga kongunale tondulu munduku tenjiku,
numanuna kake tipili molku
na-ni kanupu kaí piliiliu uluma mindi
ma-koleana teku mololsiliiku pangi.’ nimba kene
oliunga ele-túma-ni oliu toku mindili liiku silimelema
‘Naa teangi. Oliu we molamili.
Tepu liipu, tokomele kupulanum-na wendu liimbu.’
nimba, nimba panjipa mi lirim mele
‘Teambu.’ nimba kene aku tekem.”
⸤nirim.⸥
76 “Nanga kang ⸤Jon⸥,
nu kumbi-leku pukunu Auliele ombá kupulanumele
akisinjenéliinga piliikunu kene,
yambuma-ni penga nundu ‘Olandupa Molemáliinga
ung “Ninjui.” nimba, nimba silimú ungma piliipa
yandu nimba sili yili’ ningí.
77 ‘Auliele yunga kupulanumele akisinjambu.’ nikunu kene
nu-ni yunga yambumandu i-sikunu nikunu sini:
“Auliele yunu-ni eninga ulu-pulu-kis telemelema
‘Mania pupili.’ nimba kanupa konde tenjipa kene
enini tepa liipa
mindili nolkemela kupulanum-na wendu liipa,
yu-kene wasie molku kunjingí kupulanum-na
liipa monjumba.”
niku, ung akili eninindu nikunu sini.
78-79 Pulu Yili-ni oliu kondu lakupa kolupa kene
oliu sumbulú túlina molupu kululi kupulanum-na
molomulúma
numanu waengu nipili molomulú kupulanum-na
‘Kapula kanuku pangi.’ nimba
‘Pa tinjipili.’ nimba oliu molemuluna
talangele liipa mundukum.”
nimba Sekaraya-ni nirim.
80 Kang Jon yu ai lepa numanu tondulu pupa kapula mulurum. Yu penga Isrel-yambumanga kumbi-kerina kongun tepa molumbandu ui kolea-wakana pupa mulurum.