Muⱪeddes Kalam (yǝngi yeziⱪ) Yuⱨanna «1» 4

Sahta pǝyƣǝmbǝrlǝrdin ⱨǝzǝr ǝylǝnglar

1 Sɵyümlüklirim, ⱨǝrbir «wǝⱨiy ⱪilƣuqi» roⱨlarning ⱨǝmmisigila ixiniwǝrmǝnglar, bǝlki bu roⱨlarning Hudadin kǝlgǝn-kǝlmigǝnlikini pǝrⱪlǝndürüx üqün ularni sinanglar. Qünki nurƣun sahta pǝyƣǝmbǝrlǝr dunyadiki jay-jaylarƣa pǝyda boldi.□ ■ 2 Hudaning Roⱨini mundaⱪ pǝrⱪlǝndürǝlǝysilǝr: Əysani, yǝni dunyaƣa insaniy tǝndǝ kǝlgǝn Mǝsiⱨni etirap ⱪilƣuqi ⱨǝrbir roⱨ Hudadin bolidu;□ 3 wǝ dunyaƣa insaniy tǝndǝ kǝlgǝn Əysa Mǝsiⱨni etirap ⱪilmaydiƣan roⱨ Hudadin kǝlgǝn ǝmǝs. Bundaⱪlarda ǝksiqǝ dǝjjalning roⱨi ixlǝydu; silǝr bu roⱨning kelidiƣanliⱪi toƣruluⱪ angliƣanidinglar wǝ dǝrwǝⱪǝ u ⱨazir dunyada pǝyda boldi.□ ■

4 Əy ǝziz balilirim, silǝr bolsanglar Hudadin bolƣansilǝr wǝ ularning üstidin ƣalib kǝldinglar; qünki silǝrdǝ Turƣuqi bu dunyada turƣuqidin üstündur.□ 5 Ular bolsa bu dunyaƣa mǝnsup; xunga ular bu dunyaning sɵzlirini ⱪilidu wǝ bu dunyadikilǝr ularƣa ⱪulaⱪ salidu.□ 6 Biz bolsaⱪ Hudadin bolƣanmiz; Hudani tonuƣan kixi bizning sɵzlirimizni anglaydu. Hudadin bolmiƣan kixi bolsa bizning sɵzlirimizni anglimaydu. Mana buningdin Ⱨǝⱪiⱪǝtning Roⱨi bilǝn ezitⱪuluⱪning roⱨini pǝrⱪ etǝlǝymiz.□ ■

Huda Ɵzi meⱨir-muⱨǝbbǝttur

7 I sɵyümlüklirim, bir-birimizgǝ meⱨir-muⱨǝbbǝt kɵrsitǝyli; qünki meⱨir-muⱨǝbbǝtning ɵzi Hudadindur wǝ meⱨir-muⱨǝbbǝt kɵrsǝtküqining ⱨǝrbiri Hudadin tuƣulƣan bolidu wǝ Hudani tonuydu. 8 Meⱨir-muⱨǝbbǝt kɵrsǝtmigüqi kixi Hudani tonumiƣan bolidu; qünki Huda Ɵzi meⱨir-muⱨǝbbǝttur. 9 Hudaning meⱨir-muⱨǝbbiti bizdǝ xuning bilǝn axkara boldiki, Huda bizni Uning arⱪiliⱪ ⱨayatⱪa erixsun dǝp birdinbir yeganǝ Oƣlini dunyaƣa ǝwǝtti. ■ 10 Meⱨir-muⱨǝbbǝt dǝl xuningdin ayanki, bizlǝrning Hudani sɵyginimiz bilǝn ǝmǝs, bǝlki U Ɵzi bizni sɵyüp gunaⱨlirimizning jazasini kɵtürgüqi kafarǝt boluxⱪa Ɵz Oƣlini ǝwǝtkini bilǝn ayandur.■

11 I sɵyümlüklirim, Huda bizgǝ xu ⱪǝdǝr meⱨir-muⱨǝbbǝt kɵrsǝtkǝn yǝrdǝ, bizmu bir-birimizgǝ meⱨir-muⱨǝbbǝt kɵrsitixkǝ ⱪǝrzdardurmiz. 12 Ⱨeqkim ⱨeqⱪaqan Hudani kɵrgǝn ǝmǝs; lekin bir-birimizgǝ meⱨir-muⱨǝbbǝt kɵrsǝtsǝk, Huda bizdǝ yaxaydu wǝ uning meⱨir-muⱨǝbbiti bizdǝ kamalǝtkǝ yǝtkǝn bolidu. ■ 13 Biz bizning Uningda yaxawatⱪanliⱪimizni wǝ Uning bizdǝ yaxawatⱪanliⱪini xuningdin bilimizki, U Ɵz Roⱨini bizgǝ ata ⱪilƣan. □ 14 Biz xuni kɵrgǝn wǝ xundaⱪla xuningƣa guwaⱨliⱪ berimizki, Ata Oƣulni dunyaƣa ⱪutⱪuzƣuqi boluxⱪa ǝwǝtti. 15 Əgǝr kimdǝkim Əysani Hudaning Oƣli dǝp etirap ⱪilsa, Huda uningda, umu Hudada yaxaydu. 16 Biz bolsaⱪ Hudaning bizgǝ bolƣan meⱨir-muⱨǝbbitini tonup yǝttuⱪ, xundaⱪla uningƣa tolimu ixǝnduⱪ. Huda Ɵzi meⱨir-muⱨǝbbǝttur wǝ meⱨir-muⱨǝbbǝttǝ yaxiƣuqi kixi Hudada yaxaydu, Hudamu uningda yaxaydu. 17 Muxundaⱪ bolƣanda, meⱨir-muⱨǝbbǝt bizdǝ mukǝmmǝllixidu; xuning bilǝn biz soraⱪ künidǝ hatirjǝm-ⱪorⱪmas bolalaymiz. Qünki Əysa ⱪandaⱪ boluwatⱪan bolsa bizmu ⱨazir bu dunyada xundaⱪ boluwatimiz. □ 18 Meⱨir-muⱨǝbbǝttǝ ⱪorⱪunq yoⱪtur; kamil meⱨir-muⱨǝbbǝt ⱪorⱪunqni ⱨǝydǝp yoⱪⱪa qiⱪiridu. Qünki ⱪorⱪunq Hudaning jazasi bilǝn baƣlinixliⱪtur; ⱪorⱪunqi bar kixi meⱨir-muⱨǝbbǝttǝ kamalǝtkǝ yǝtküzülgǝn ǝmǝstur.□

19 Biz meⱨir-muⱨǝbbǝt kɵrsitimiz, qünki Huda aldi bilǝn bizgǝ meⱨir-muⱨǝbbǝt kɵrsǝtti. 20 Əgǝr birsi «Hudani sɵyimǝn» dǝp turup, ⱪerindixiƣa ɵqmǝnlik ⱪilsa, u yalƣanqidur. Qünki kɵz aldidiki ⱪerindixini sɵymigǝn yǝrdǝ, kɵrüp baⱪmiƣan Hudani ⱪandaⱪmu sɵysun? ■ 21 Xunga bizdǝ Uningdin: «Hudani sɵygǝn kixi ⱪerindixinimu sɵysun» degǝn ǝmr bardur.■

□4:1 «Sɵyümlüklirim, ⱨǝrbir «wǝⱨiy ⱪilƣuqi» roⱨlarning ⱨǝmmisigila ixiniwǝrmǝnglar» — ««wǝⱨiy ⱪilƣuqi» roⱨ» bǝlkim etiⱪadqining ɵz wujudiƣa yeⱪin kelip «sanga wǝⱨiy ⱪilimǝn» dǝydiƣan roⱨni, yaki eⱨtimalƣa ǝng yeⱪin bolƣini etiⱪadqilarning yeniƣa kǝlgǝn yaki ⱨǝtta jamaǝtning ɵz iqidin turup «Mǝn silǝrgǝ Hudaning wǝⱨiyini ⱨazir yǝtküzimǝn» degüqilǝrni kɵrsitidu; ayǝtning ikkinqi ⱪismi dǝl muxu «sahta pǝyƣǝmbǝrlǝr»ni kɵrsitidu.

■4:1 Yǝr. 29:8; Mat. 7:15,16; 24:4, 5, 24; 1Kor. 14:29; Əf. 5:6; Kol. 2:18; 2Pet. 2:1; 2Yuⱨa. 7.

□4:2 «Əysani, yǝni dunyaƣa insaniy tǝndǝ kǝlgǝn Mǝsiⱨni etirap ⱪilƣuqi ⱨǝrbir roⱨ...» — «insaniy tǝndǝ» (yaki «insan tenidǝ») grek tilida «ǝttǝ» bilǝn bildürilidu. «Əysani, yǝni dunyaƣa insaniy tǝndǝ kǝlgǝn Mǝsiⱨni etirap ⱪilƣuqi ⱨǝrbir roⱨ Hudadin bolidu» — muxu ayǝttǝ deyilgǝn «roⱨ» mǝlum insanning aƣzi arⱪiliⱪ gǝp ⱪiliwatidu, ǝlwǝttǝ. Ⱨalⱪiliⱪ mǝsilǝ: — mǝlum birsi jamaǝttǝ sɵz ⱪilip «Hudaning wǝⱨiyini silǝrgǝ yǝtküzimǝn» desǝ, biraⱪ «insaniy tǝndǝ kǝlgǝn Əysa Mǝsiⱨ»ni etirap ⱪilmisa, ǝmdi uningda sɵz ⱪilidiƣan roⱨ Hudaning Roⱨi ǝmǝs, bǝlki jin-xǝytanlarning biri yaki bu kixining ɵzining Huda bilǝn ⱪarxilixidiƣan insaniy roⱨ bolidu, halas.

□4:3 «wǝ dunyaƣa insaniy tǝndǝ kǝlgǝn Əysa Mǝsiⱨni etirap ⱪilmaydiƣan roⱨ Hudadin kǝlgǝn ǝmǝs» — xu waⱪitlarda, bǝzilǝr Əysa Mǝsiⱨni «ⱨǝⱪiⱪiy insan ǝmǝs, bǝlki insanning xǝklidǝ namayan bolƣan bir hil roⱨ, halas» degǝn yalƣan tǝlim tarⱪalƣanidi. «...Bundaⱪlarda ǝksiqǝ dǝjjalning roⱨi ixlǝydu; silǝr bu roⱨning kelidiƣanliⱪi toƣruluⱪ angliƣanidinglar wǝ dǝrwǝⱪǝ u ⱨazir dunyada pǝyda boldi» — oⱪurmǝnlǝrning esidǝ barki, «dǝjjal»ning mǝnisi «Mǝsiⱨgǝ ⱪarxi» ⱨǝm «Mǝsiⱨning ornini talaxⱪuqi»dur (yuⱪiridiki 2:18, 2:20 wǝ izaⱨatlarni kɵrüng).

■4:3 2Tes. 2:7; 1Yuⱨa. 2:18, 22.

□4:4 «Əy ǝziz balilirim, silǝr bolsanglar Hudadin bolƣansilǝr wǝ ularning üstidin ƣalib kǝldinglar» — «ular» muxu yǝrdǝ sahta pǝyƣǝmbǝrlǝrni wǝ tǝlim bǝrgüqilǝrni kɵrsitidu. «qünki silǝrdǝ Turƣuqi bu dunyada turƣuqidin üstündur» — «silǝrdǝ Turƣuqi» Muⱪǝddǝs Roⱨni, «bu dunyada turƣuqi» Iblisni kɵrsitidu.

□4:5 «Ular bolsa bu dunyaƣa mǝnsup; xunga ular bu dunyaning sɵzlirini ⱪilidu wǝ bu dunyadikilǝr ularƣa ⱪulaⱪ salidu» — «ular bu dunyaning sɵzlirini ⱪilidu» yaki «ular bu dunyadin sɵzlǝydu» yaki «ular bu dunya toƣruluⱪ sɵzlǝydu».

□4:6 «Mana buningdin Ⱨǝⱪiⱪǝtning Roⱨi bilǝn ezitⱪuluⱪning roⱨini pǝrⱪ etǝlǝymiz» — «Ⱨǝⱪiⱪǝtning Roⱨi» Muⱪǝddǝs Roⱨni, «ezitⱪuluⱪning roⱨi» Xǝytanning ɵzi yaki jinlarni kɵrsitidu.

■4:6 Yⱨ. 8:47; 10:27.

■4:9 Yⱨ. 3:16; Rim. 5:8.

■4:10 Rim. 3:24, 25; 2Kor. 5:19; Kol. 1:19; 1Yuⱨa. 2:2.

■4:12 Mis. 33:20; Ⱪan. 4:12; Yⱨ. 1:18; 1Tim. 1:17; 6:16; 1Yuⱨa. 3:24.

□4:13 «Biz bizning Uningda yaxawatⱪanliⱪimizni wǝ Uning bizdǝ yaxawatⱪanliⱪini xuningdin bilimizki, U Ɵz Roⱨini bizgǝ ata ⱪilƣan» — «U Ɵz Roⱨini bizgǝ ata ⱪilƣan» grek tilida «U Ɵz Roⱨidin bizgǝ ata ⱪilƣan» bilǝn ipadilinidu.

□4:17 «xuning bilǝn biz soraⱪ künidǝ hatirjǝm-ⱪorⱪmas bolalaymiz» — «soraⱪ küni» yaki «ⱪiyamǝt küni». Oⱪurmǝnlǝrning esidǝ bolsunki, «ⱪiyamǝt küni»ni ǝtrapliⱪ qüxinix üqün Tǝwrat-Injilda uning toƣrisidiki kɵp tǝpsilatlar bar. «Qünki Əysa ⱪandaⱪ boluwatⱪan bolsa bizmu ⱨazir bu dunyada xundaⱪ boluwatimiz» — grek tilida «Qünki U ⱪandaⱪ boluwatⱪan bolsa bizmu ⱨazir bu dunyada xundaⱪ boluwatimiz». Demǝk, biz bu dunyada Əysadǝk adil, ⱨǝⱪⱪaniy, rastqil, kǝmtǝr, meⱨriban, muⱨǝbbǝtlik....bolimiz. Tǝkitlǝngini «bu dunyada» — qünki bu dunyada undaⱪ bolux pǝⱪǝt Hudaning meⱨir-xǝpⱪiti wǝ toluⱪ küq-ⱪudriti bolsa andin mumkin bolidu.

□4:18 «Meⱨir-muⱨǝbbǝttǝ ⱪorⱪunq yoⱪtur; kamil meⱨir-muⱨǝbbǝt ⱪorⱪunqni ⱨǝydǝp yoⱪⱪa qiⱪiridu» — yaki «meⱨir-muⱨǝbbǝt mukǝmmǝl bolsa, ⱪorⱪunqni ⱨǝydǝp yoⱪⱪa qiⱪiridu».

■4:20 1Yuⱨa. 2:4.

■4:21 Law. 19:18; Mat. 22:39; Yⱨ. 13:34; 15:12; Əf. 5:2; 1Tes. 4:9; 1Pet. 4:8; 1Yuⱨa. 3:23.