Muⱪeddes Kalam (yǝngi yeziⱪ) Ayup 13

Ayupning dostliriƣa sɵzlǝxtin tohtap, yǝnǝ Hudaƣa ⱪarap sɵzlixi

1 Mana, mening kɵzüm bularning ⱨǝmmisini kɵrüp qiⱪⱪan;

Mening ⱪuliⱪim bularni anglap qüxǝngǝn.

2 Silǝrning bilgǝnliringlarni mǝnmu bilimǝn;

Mening silǝrdin ⱪelixⱪuqilikim yoⱪ.

3 Biraⱪ mening arzuyum Ⱨǝmmigǝ ⱪadir bilǝn sɵzlixixtur,

Mening Huda bilǝn munazirǝ ⱪilƣum kelidu.□

4 Silǝr bolsanglar tɵⱨmǝt qapliƣuqilar,

Ⱨǝmminglar yaramsiz tewipsilǝr. ■

5 Silǝr pǝⱪǝtla süküttǝ turƣan bolsanglar’idi!

Bu silǝr üqün danaliⱪ bolatti!■

6 Mening munazirǝmgǝ ⱪulaⱪ selinglar,

Lǝwlirimdiki muⱨakimilǝrni anglap beⱪinglar.

7 Silǝr Hudaning wakalǝtqisi süpitidǝ boluwelip biadil sɵz ⱪilamsilǝr?

Uning üqün ⱨiylǝ-mikirlik gǝp ⱪilmaⱪqimusilǝr?■

8 Uningƣa yüz-hatirǝ ⱪilip huxamǝt ⱪilmaⱪqimusilǝr?!

Uningƣa wakalitǝn dǝwa sorimaⱪqimusilǝr?

9 U iq-baƣringlarni ahturup qiⱪsa, silǝr üqün yahxi bolattimu?

Insan balisini aldiƣandǝk uni aldimaⱪqimusilǝr?

10 Silǝr yüz-hatirǝ ⱪilip yoxurunqǝ huxamǝt ⱪilsanglar,

U qoⱪum silǝrni ǝyiblǝydu.□

11 Buningdin kɵrǝ Uning ⱨǝywisining silǝrni ⱪorⱪatⱪini,

Uning wǝⱨimisining silǝrgǝ qüxkini tüzük ǝmǝsmu?

12 Pǝnd-nǝsiⱨǝtinglar pǝⱪǝt külgǝ ohxax sɵzlǝr, halas;

Silǝr ixǝnq baƣliƣan istiⱨkaminglar pǝⱪǝt lay istiⱨkamlar, halas.□

13 Meni ihtiyarimƣa ⱪoyuwetip zuwan sürmǝnglar, meni gǝp ⱪilƣili ⱪoyunglar.

Beximƣa ⱨǝrnemǝ kǝlsǝ kǝlsun!

14 Ⱪandaⱪla bolmisun, jenim bilǝn tǝwǝkkul ⱪilimǝn,

Mǝn jenimni alⱪinimƣa elip ⱪoyimǝn!□

15 U jenimni alsimu mǝn yǝnila Uni kütimǝn, Uningƣa tayinimǝn;

Biraⱪ ⱪandaⱪla bolmisun mǝn tutⱪan yollirimni Uning aldida aⱪlimaⱪqimǝn; □ ■

16 Bundaⱪ ⱪilixim manga nijatliⱪ bolidu;

Qünki iplas bir adǝm uning aldiƣa baralmaydu.

17 Sɵzlirimni diⱪⱪǝt bilǝn anglanglar,

Bayanlirimƣa obdan ⱪulaⱪ selinglar.

18 Mana, mǝn ɵz dǝwayimni tǝrtipliⱪ ⱪilip tǝyyar ⱪildim;

Mǝn ɵzümning ⱨǝⱪiⱪǝtǝn aⱪlinidiƣanliⱪimni bilimǝn.

19 Mǝn bilǝn bǝs-munazirǝ ⱪilidiƣan ⱪeni kim barkin?

Ⱨazir süküt ⱪilƣan bolsam, tiniⱪtin tohtiƣan bolattim!□

20 Aⱨ Huda! Manga pǝⱪǝt ikki ixnila ⱪilip bǝrgin;

Xundaⱪ bolƣandila, mǝn ɵzümni Sǝndin ⱪaqurmaymǝn:■

21 — Ⱪolungni mǝndin yiraⱪ ⱪilƣin;

— Wǝⱨimǝng meni ⱪorⱪatmisun.□

22 Andin meni sot ⱪilixⱪa qaⱪir, mǝn sanga jawab berimǝn;

Yaki mǝn Sanga dǝwayimdin sɵz ⱪilsam, Sǝnmu manga jawab berisǝn.

Ayup dǝwasini dawamlaxturidu

23 Mening ⱪǝbiⱨliklirim ⱨǝm gunaⱨlirim zadi ⱪanqilik?

Itaǝtsizlikim ⱨǝm gunaⱨimni manga kɵrsitip bǝr!

24 Nemixⱪa didaringni mǝndin yoxurisǝn?

Nemixⱪa meni Ɵz düxmining dǝp bilding?■

25 Uyaⱪ-buyaⱪⱪa uquruwetilidiƣan anqiki bir yopurmaⱪni wǝⱨimigǝ salmaⱪqimusǝn?

Ⱪurup kǝtkǝn pahalni ⱪoƣlimaⱪqimusǝn?

26 Qünki Sǝn mening üstümdin zǝⱨǝrdǝk ǝrzlǝrni yazisǝn,

Sǝn yaxliⱪimdiki ⱪǝbiⱨliklirimni manga ⱪayturuwatisǝn.■

27-28 Mǝn qirip kǝtkǝn bir nǝrsǝ,

Mǝn pǝⱪǝt küyǝ yegǝn bir kiyimla bolƣinim bilǝn,

Lekin Sǝn mening putlirimni kixǝnlǝysǝn,

Ⱨǝmmǝ yollirimni kɵzitip yürisǝn;

Tapanlirimƣa mangmasliⱪ üqün qǝk sizip ⱪoyƣansǝn. ■

Ayup
<
13
>

□13:3 «...mening Huda bilǝn munazirǝ ⱪilƣum kelidu» — yaki «...mening Huda bilǝn dǝwalaxⱪum kelidu».

■13:4 Ayup 16:2

■13:5 Pǝnd. 17:28

■13:7 Ayup 17:5; 32:21; 36:4

□13:10 «.... Silǝr yüz-hatirǝ ⱪilip yoxurunqǝ huxamǝt ⱪilsanglar, u qoⱪum silǝrni ǝyiblǝydu» — Ayupning sɵzliri iqidǝ adǝmni ⱨǝyran ⱪalduridiƣan nurƣun mǝnilǝr ipadilinidu. Ayupning bu bayani ulardin intayin gǝwdilik bolƣan bir misal ⱨesablinidu. U üq dostiƣa naⱨayiti kǝskin ⱨalda Hudaƣa huxamǝtqilik ⱪilixⱪa bolmaydiƣanliⱪini bildüridu. 12-babta u Hudaning adalitidin gumanlinip turup sɵzligǝn bolsimu, biraⱪ u muxu yǝrdǝ Huda ⱨǝⱪiⱪǝtni intayin ǝtiwarlaydu. Huda durus, lilla gǝpni bǝk sɵyidu, kixilǝrning Hudaƣa wakalǝtqi boluwelip, ɵzining yaki baxⱪilarning qirayliⱪ pikrini ipadilixigǝ ⱪǝt’iy bolmaydu, degǝn kɵzⱪaraxni ipadilǝydu. Hudaning ⱨɵrmitigǝ layiⱪ sɵzlǝrni ⱪilix üqün, Uning insanƣa bǝrgǝn wǝⱨiysini asas ⱪilix ⱨǝm xuning bilǝn bir waⱪitta realliⱪtin ⱪǝt’iy ayrilmay turup, bu dunyadiki kɵrünǝrlik pakitlarƣa yüzlinix zɵrürdur. Mǝyli Hudaƣa, mǝyli baxⱪilarƣa huxamǝtlik yaki yalƣan gǝp ⱪilixⱪa ⱪǝt’iy bolmaydu. U üq dostiƣa agaⱨlanduriduki, Hudaƣa huxamǝtqilik ⱪilsa, Huda ularni jazalaydu. Bu gǝp Ayupning Hudaning adalitigǝ ⱪǝt’iy ixǝngǝnlikini kɵrsitidu ⱨǝm uning ⱨazirⱪi etiⱪadi ⱨǝm gumani arisidiki iqidǝ bolƣan kürǝxni bizgǝ ayan ⱪilidu.

□13:12 «Silǝr ixǝnq baƣliƣan istiⱨkaminglar pǝⱪǝt lay istiⱨkamlar...» — yaki «Silǝr ixǝnq baƣliƣan jawablar pǝⱪǝt lay istiⱨkamlar...».

□13:14 «Ⱪandaⱪla bolmisun, jenim bilǝn tǝwǝkkul ⱪilimǝn» — sɵzmusɵz bolsa: «Ⱪandaⱪla bolmisun (yani «nemixⱪa») ǝtlirimni qiximda elip kürǝx ⱪilimǝn?» — u ɵzini kǝskin kürǝx ⱪilmaⱪqi bolƣan bir ⱨaywanƣa ohxitidu. «Mǝn jenimni alⱪinimƣa elip ⱪoyimǝn!» — yaki: «Nemixⱪa jenimni alⱪinimƣa elip ⱪoydum?».

□13:15 «U jenimni alsimu mǝn yǝnila Uni kütimǝn, Uningƣa tayinimǝn...» — bu ayǝt Ayupning etiⱪadⱪa ǝng tolƣan bayanliridin biri. Ibraniy tilida «kütüx» wǝ «tayinix» bir peil bilǝnla ipadilinidu.

■13:15 Zǝb. 23:4; Pǝnd. 14:32

□13:19 «Mǝn bilǝn bǝs-munazirǝ ⱪilidiƣan ⱪeni kim barkin? Ⱨazir süküt ⱪilƣan bolsam, tiniⱪtin tohtiƣan bolattim!» — bu tekistning tɵt hil tǝrjimisi yaki qüxǝnqisi bar: — (1) Ayup birǝrsining ɵzi bilǝn bǝs-munazirǝ ⱪilalaydiƣanliⱪiƣa ixǝnmǝydu; ⱨǝtta birsi bǝs-munazirigǝ qiⱪsila: «Mǝn Uning soaliƣa pisǝnt ⱪilmay, bu dunyadin ketimǝn» degǝndǝk; (2) ...undaⱪ adǝm qiⱪsa, mǝn gǝp ⱪilmay süküttǝ ɵlüp ketixkǝ razimǝn!; (3) U kimning ɵzini ǝyiblixidin ⱪǝt’iynǝzǝr, süküt ⱪilixⱪa ⱪǝt’iy unimaydu; (4) Birsining ɵzi bilǝn yǝnǝ bǝs-munazirǝ ⱪilƣusi bolsa, tez boluxi kerǝk, qünki u pat arida dunyadin ketidu. Biz üqinqisini ixlǝttuⱪ.

■13:20 Ayup 9:34; 33:7

□13:21 «Manga pǝⱪǝt ikki ixnila ⱪilip bǝrgin... ⱪolungni mǝndin yiraⱪ ⱪilƣin; — wǝⱨimǝng meni ⱪorⱪatmisun» — birinqi ix bolsa, Hudaning Ɵz ⱪolini uningdin yiraⱪ ⱪilixi bilǝn u azraⱪ dǝm alalaydu; ikkinqi ix, Hudaning wǝⱨimisi bolmisa u jür’ǝtlik bolup sɵz ⱪilidu, degǝnlik.

■13:24 Ayup 16:9; 19:11; 33:10; Yiƣ. 2:5

■13:26 Zǝb. 25:7

■13:27-28 Ayup 33:11